Monday, December 14, 2009

အဲဒီ့ညနေ

ပေါက်တဲ့အိုးကိုလဲ ရေထပ်ဖြည့်ဖို့  မကြိုးစားပါနဲ့ တဲ့… ပြောရက်လိုက်တဲ့ အေသင်ချိုဆွေရဲ့တေးသွားတွေ လဘက်ရည်ဆိုင်က လျှံကျလာတယ်…
အလှပြင်ဆိုင်က ကောင်မလေးတွေ သီချင်းလေး ညည်းရင်း ခေါင်းလျှော်ပေးနေတယ်…
ကမ္ဘာကြီးပဲ ပူနွေးလာလို့ လား… ရန်ကုန်ဆောင်းကပဲ နေကောင်းရုံချမ်းလို့ လား…
လိပ်ပြာလေးတွေ လက်လေးလုံးဘောင်းဘီတိုလေးတွေနဲ့ ….
ဘီယာဆိုင်က အဆီပြန်မျက်နှာနဲ့  အန်ကယ်ကြီးတွေ… အန်ကယ်လေးတွေ မျက်လုံးတွေ လိပ်ပြာလေးတွေရဲ့ ခြေတံသွယ်သွယ်လေးတွေနောက်…
လိပ်ပြာလေးတွေ ရာခိုင်နှုန်းပြည့်ခေတ်မှီကြပါစေ…
ဘီယာဆိုင်ထဲက အသိအကိုကြီးတယောက်… သူ့ ဘေးမှာ မနှစ်ကတယောက် မဟုတ်တော့ဘူး…
တို့ အချစ်က နံပါတ်တစ်တဲ့… ညာနေတာ… သူ့ နံပါတ်တစ်အချစ်က ကလေးတွေ တရုံးရုံးနဲ့  အသက်ကြီးမှ ရုန်းကန်နေရတဲ့ (အသက်၁၆နှစ်ကတည်းက ရူးရူးမူးမူးချစ်လို့  လက်တွဲခဲ့တဲ့) အမကြီး…
ကောင်မလေးရေ မျက်တောင်တုလေး တဖြတ်ဖြတ်နဲ့  ယုံပြနေရတာကိုက အလုပ်လုပ်နေတာတဲ့လား…
နိုင်ငံတကာမှာ ၀င်ငွေကောင်းခဲ့တဲ့ 2012 တင်နေတဲ့ရုံရှေ့  ခပ်ခြောက်ခြောက်…
သူ့ ဘေးက မြန်မာဟာသကားမှာ ကြိတ်ကြိတ်တိုး…
သြော်… ရယ်ချင်လို့  ပိုက်ဆံပေးရတဲ့ ဘ၀တွေ….
တထောင်ဖိုး ၃ခွေ ကိုးရီးယားပေးပါ… မြန်မာစာတန်းထိုးနော်… သတိ…ကော်ပီရိုက်… ဘာတွေလာပြောနေတာလဲ…
မြန်မာပြည်က ကိုရီးယားမလေး ၀တ်မှုန်ရွှေရည်က ပိုစတာထဲက ပြုံးပြနေတယ်...
မုန့် ဟင်းခါးတပွဲပေးပါ… အိုးဘဲဥထည့်… အီကြာကွေးထည့်…
ဟိုဘက်က ရေမြောင်းကြီးထဲ ကြွတ်ကြွတ်အိတ်တွေနဲ့  အမှိုက်တွေ ကျွန်းမျောကြီးလိုပဲ… လေသင့်တော့ ရနံ့ လေးကလဲ သင်းလို့ …
ပေါ်လူးရှင်း… နားစမ်းပါ… ဟင်းရည်နဲနဲပေးပါ… ငှက်ပျောအူလေးထည့်….
ဟယ်… မိုးဟေကိုမှတ်လို့  ကြည့်နေတာ… သူ့ ဘေးက ကောင်ကလေးက တစိမ့်စိမ့်ကြည့်နေလိုက်တာ… ကောင်ကလေးအချင်းချင်းလို့ မေ့လောက်စရာ…
ခေတ်မှီတယ်နော်… ကရိဝိတ်မှာ ခပ်မိုက်မိုက် ကောင်လေးနဲ့ ကောင်လေး အတွဲတတွဲ…
အဲဒီလို အတွဲတွေ မနှစ်က သိပ်မတွေ့ ရပါဘူး…
HIV… မပူပါနဲ့  … သူတို့ က HIVနေ့ အထိမ်းအမှတ်တွေတောင် လုပ်နေတာပဲ… ဒီလောက်တော့ knowledgeရှိမှာပါ…
ပြီးတော့… အီးမေးလ်ခဏ၀င်ချက်…
အကိုကြားရလား… ညီမပါ… ညီမအကိုဆီလိုက်လာဖို့  ကိစ္စပြောချင်လို့ ပါတဲ့…
နံဘေးနားက ကောင်မလေးက မျက်နှာလှလှလေးပြင်ပြီး ဟိုဘက်က တယောက်ကို ချွှဲချွှဲလေးပြောနေတယ်…
ဂျီမေးလ်ကလဲ နှေးနေတော့ နားမထောင်မိပါပဲ ကြားနေရတယ်…
ချာတိတ်… ချာတိတ်… ကိုယ့်အသံကြားရလား…
အိုး… ဟိုဘက် ဒီဘက်… romantic… ကိုယ့်ကိုယ်ကို ရုပ်ရှင်ရုံထဲ ရောက်သွားသလား ထင်ရတယ်…
www.laynuaye.blogspot.com... ၀င်မရဘူး… ခဏနားလိုက်ဦး လေနုအေးရေ…
၃၁ ဘိုးဘိုးဘတ်စ်ကြီး က ကိုယ့်ကို ပြုံးပြတယ်… ခုထိကျန်းမာနေဆဲ…
ဆောင်းညနေက အကုန်မြန်လွန်းတယ်…
အိမ်ဘေးက ကွမ်းယာဆိုင်တောင် သိမ်းလို့  ကောင်ကလေးတွေ ဂီတာတီးဖို့  ပြင်နေကြပြီ…
ကျောင်းပြီးပြီလား… အဝေးသင်ပြီးတာ ၂နှစ်ရှိပြီ…
ဘာလုပ်နေသလဲ… အလုပ်ရှာနေတုန်းပဲ…
မနှစ်ကတုန်းကလဲ ဒီမေးခွန်းမေးတော့ ဒီအဖြေပဲထွက်တာ မေ့မေ့လျော့လျော့…
အိမ်ထဲဝင်တော့ မျှော်နေတဲ့ အဖေနဲ့ အမေ…
ဘာပဲဖြစ်ဖြစ် အဲဒီလို မျှော်သူရှိတဲ့ အမေ့အိမ်ကို ပြန်ရတဲ့ ညနေခင်းလေးတွေကို ဆွဲဆန့် ချင်သား…

တန်ခူး
11:48am 14-Dec-2009

Thursday, November 19, 2009

ငယ်ဖော်ကွင်း

အိမ်ပြန်ရောက်လို့  အိမ်ရှေ့ ဘက်ကို လှမ်းကြည့်မိရင် အစီအရီ တွေ့ ရတဲ့ တိုက်ခန်းတွေရယ်... ပြီးတော့ ခေတ်မှီလှပတဲ့ လုံးချင်းအိမ်ယာတွေရယ်ကို တွေ့ ရရင် တခါတလေ မျက်ရည်ဝဲမိတယ်။ ကျွန်မတို့ ငယ်ငယ်က ပြေးလွှားဆော့ကစား ခြေရာချင်း ထပ်ခဲ့တဲ့ ကွင်းပြင်ကျယ်ကျယ်ကြီးကို လွမ်းမိလို့ ပါ။ တကယ်တော့… မြက်ခင်းစိမ်းစိမ်းစိုစိုနဲ့  အဲဒီကွင်းပြင်ကျယ်ကြီးက ကျွန်မရဲ့ ငယ်ဖော်ပဲ မဟုတ်ပါလား။

ခုလို နတ်တော်လဆို အဲဒီကွင်းပြင်ကျယ်ကြီးကို ပိုလွမ်းမိတယ်။ ဒီရာသီရောက်ရင် ကျွန်မအဖေကတော့ သူ့ အဖွဲ့ တွေနဲ့ ရပ်ကွက်စာပေဟောပြောပွဲ အတွက် စလို့ လှုပ်ရှားနေတတ်ပြီ။ မနှစ်ကနဲ့ မတူ တမူထူးခြားအောင် ဒီနှစ် ဘယ်စာရေးဆရာတွေ ဖိတ်မလဲ၊ စာပေဟောပြောပွဲ စင်မြင့်ကို ဘယ်လိုလေး ဆောက်မလဲ၊ စာရေးဆရာတွေအတွက် ဧည့်ခံကြိုဆိုရေး၊ လက်ဆောင်ပြင်ဆင်ရေး… စတဲ့ အစည်းအဝေးတွေနဲ့  အဖေ အလုပ်ရှုပ်နေတတ်ပါပြီ။ ကျွန်မကတော့ ဒီနှစ်ဘယ်စာရေးဆရာတွေ ပါမလဲ ဆိုတဲ့ အဖြေကို ရင်တခုန်ခုန် မျှော်တလင့်လင့်နဲ့ ပေါ့။ ပင်တိုင်ပါတတ်တဲ့ စာရေးဆရာတွေကတော့ အဟောအပြောကောင်းလွန်းလို့  နှစ်တိုင်းပွဲတောင်းတဲ့ ဆရာအောင်သင်း… လူငယ်တွေအတွက် ပညာပေးလေးတွေ ဟောတတ်တဲ့ ဖေဖေ့သူငယ်ချင်း ဆရာလယ်တွင်းသားစောချစ် တို့ ပါ။ မှတ်မိသလောက် ကျွန်မတို့  ရပ်ကွက်စာပေဟောပြောပွဲကို လာဖူးတဲ့ စာရေးဆရာတွေက ဆရာချစ်ဦးညို၊ ဆရာသုမောင်၊ ဆရာမ မိုးမိုး(အင်းလျား)၊ ဆရာမ သာယာဝတီ စမ်းစမ်းနွဲ့ ၊ ဆရာမ ရွှေကူမေနှင်း တို့ ပါပဲ။ စာပေဟောပြောပွဲ မစခင် ကတည်းက ကွင်းထောင့်က အိမ်မှာ ဆရာတွေကို ဧည့်ခံတာမို့  ကျွန်မက အစောကြီး အဲဒီအိမ်ရောက်နေတတ်ပါတယ်။ မြန်မာဝတ်စုံလေးတွေနဲ့  ကျက်သရေရှိရှိလှနေတဲ့ ပေါ်ဦးပေါ်ဖျား သဇင်တွေ ဝေနေအောင် ပန်ထားတတ်တဲ့ ကျက်သရေရှိလွန်းတဲ့ စာရေးဆရာမတွေကို မလှမ်းမကမ်းက ပါးစပ်လေး အဟောင်းသားနဲ့  ငေးရတဲ့ အရသာက ဘာနဲ့ မှ မတူပါဘူး။ စာရေးဆရာတွေများ စာအရေးကောင်းရုံတင်မက စကားပြောကလဲကောင်းဆိုတော့ ဟောပြောပွဲမတိုင်ခင် ကတည်းက သူတို့ အချင်းချင်း စကားပြောကြတာ နားထောင်လို့  မ၀ပါဘူး။ စာပေဟောပြောပွဲ မစခင် အခမ်းအနားမှူး လုပ်တတ်တဲ့ ကျွန်မအဖေက စာရေးဆရာ တဦးချင်းဆီရဲ့ ကိုယ်ရေးရာဇ၀င်၊ သူနာမည်ကြီးခဲ့တဲ့ စာအုပ်တွေ အကြောင်း အနည်းငယ်ပြောပြီး တဦးချင်းဆီ ဖိတ်ခေါ်ပါတယ်။ ဆောင်းတွင်းချမ်းချမ်း စီးစီးထဲမှာ ဟိုးစင်မြင့်ထက်ကို ငေးမောနားထောင်ရင်း အချိန်ကုန်လို့  ကုန်မှန်း မသိနိုင်အောင်ပါပဲ။ စာပေပရိသတ် တစက်ကလေးမှ မငြီးငွေ့ အောင် ပြောတတ် ဟောတတ်လွန်းတဲ့ ဆရာ၊ ဆရာမတွေကို ကြည့်ပြီး စိတ်ထဲကြိတ်ပြီး အားကျမိခဲ့တာပါ။ ဆရာအောင်သင်းကတော့ အမြဲနောက်ဆုံးမှ ပွဲသိမ်းဟောတတ်ပါတယ်။ ခေတ်ကို အမြဲထင်ဟပ်အောင် ဟောတတ်လွန်းတဲ့၊ လူငယ်တွေအတွက် အလေးပေးဟောလေ့ရှိတဲ့ ဆရာ့ အဟောအပြောမှာ နစ်မြုပ်သွားတာများ မနက်လင်းအားကြီး ၂နာရီ ၃နာရီ ထိုးတဲ့အထိပါပဲ။ သားအဖနှစ်ယောက် ပွဲပြီးတော့မှ ချမ်းရကောင်းမှန်းသိပြီး လက်ကလေးတွေဖွက် အိမ်ပြန်ကြတဲ့ ဆောင်းနံနက်တွေ ခုချိန်ထိ လွမ်းမိပါရဲ့။

အဲဒီကွင်းထဲမှာပဲ လွတ်လပ်ရေးပွဲကို နှစ်စဉ်ကျင်းပတတ်ပါတယ်။ မနက် ၅နာရီလောက်ကတည်းက “စောစောအိပ်လို့  စောစောထလို့  စောစောလမ်းလျှောက်ကြပါစို့ ” ဆိုတဲ့ သီချင်းသံကို အိပ်ယာထဲက စကြားနေရပါပြီ။ အရင်က ကွေးနေအောင် အိပ်တတ်သူ ကျွန်မကတော့ ၀ိရိယကောင်းကောင်းနဲ့  အစောကြီးထပြီး မနက်စာတောင် ကောင်းကောင်း မစားဖြစ်ပဲ ကွင်းထဲကို ပြေးတော့တာပါပဲ။ အပြေးပြိုင်ပွဲ၊ မုန့် စားပြိုင်ပွဲ၊ အားလူးကောက်၊ လျှောတိုင်တက်၊ ထုတ်ဆီးတိုး၊ ဘောလုံးပွဲ၊ သံပုံးရိုက်ပြိုင်ပွဲ… စသဖြင့် သူ့ နေရာနဲ့ သူ ပြိုင်ပွဲတွေ အစီအရီ။ ကိုယ်ပြိုင်ချင်တဲ့ ပြိုင်ပွဲကို စာရင်းဝင်ပေးပြီး ပြိုင်ရုံပါပဲ။ ကျွန်မကတော့ အပြေးနဲ့  ပတ်သက်တဲ့ပြိုင်ပွဲ တော်တော်များများကို ၀င်ပြိုင်တတ်ပါတယ်။ တနေ့ လုံး ကွင်းထဲမှာ ပြိုင်ပွဲတွေ လုပ်လိုက်တာ ညကြီးမိုးချူပ်အထိပါပဲ။ အစီအစဉ်ကြေငြာသူတွေ ခမျာ အသံတွေ နာ။ ရပ်ကွက်ထဲက လူတွေ အကုန်လုံး ကွင်းထဲရောက်နေတယ် ထင်ရအောင် တကွင်းလုံး လူတွေ ဖွေးဖွေးလှုပ်နေတတ်ပါတယ်။

တခါတခါကျတော့ ကွင်းထဲမှာ ဇာတ်ပွဲတွေ ကန်ထရိုက်ယူတတ်ပါသေးတယ်။ မှတ်မှတ်ရရ ရွှေမန်းသဘင် ဇာတ်ပွဲကို ပထမဆုံး ကြည့်ဖူးတာ ကွင်းထဲက ဇာတ်ရုံထဲမှာပါ။ မင်းသားချမ်းသာကို ကောင်မလေးတွေ၊ အန်တီကြီးတွေ သဲသဲလှုပ်ကြတာ အဲဒီကွင်းထဲမှာ စတွေ့ ဖူးခဲ့တာပါ။ ညဘက်ဇာတ်က နေ့ ဘက်ကျတော့ နီးစပ်ရာအိမ်တွေမှာ ရေမိုးချိုးကြတဲ့ မင်းသမီးတွေကို ကလေးဆိုတော့ မြင်ဖူးချင်လို့  သွားသွားချောင်းကြည့်ဖူးပါတယ်။ ဦးမောင်မောင် ဆပ်ကပ် ကိုလဲ ကွင်းထဲမှာပဲ ကြည့်ခဲ့ဘူးတာပါပဲ။ ကမ္ဘာလုံးကြီးထဲ ဆိုင်ကယ်စီးတဲ့အသံကို ညတိုင်းလိုလို အိမ်ကကြားရပါတယ်။ ဘာအထိမ်းအမှတ်မှန်း မမှတ်မိတော့တဲ့ ဘဲလေးစိမ်း အငြိမ့်ပွဲ အလွတ်ပွဲ( ပိုက်ဆံပေးစရာမလို) ကိုလဲ ကျွန်မနဲ့  ကျွန်မကြီးကြီး ရှေ့ ဆုံးက နေရာရအောင် ဦးကြည့်ခဲ့ကြသေးတယ်လေ။ လူရွှင်တော် မိုးကျော်နဲ့  ဆိုနီဆိုတာ ခုထိမှတ်မိနေသေးတယ်လေ။

သင်္ကြန်မတိုင်ခင်မှာ အဲဒီကွင်းထဲမှာ ကုလားဘုရားမီးနင်းပွဲ နှစ်စဉ်ကျင်းပလေ့ ရှိပါတယ်။ ညနေစောင်းမှာ လမ်းထိပ် ဘုရားကျောင်းက အပ်တွေ တကိုယ်လုံး စိုက်ထားတဲ့ မီးနင်းသူတွေ တီးလုံးနဲ့ အတူ ဟိုရမ်းဒီရမ်းကလို့  ကွင်းထဲကို လာကြပါတယ်။ ၀ါသနာကြီးတဲ့ ကျွန်မတို့  တူအရီးက မီးရဲရဲထနေတဲ့ မီးနင်းမယ့် နေရာဘေးက စည်းရိုးမှာ အဆင်သင့်နေရာယူလို့ ပေါ့။ အဖေနဲ့ အမေက ကျွန်မ ထိမိခိုက်မိမှာ ကြောက်လို့  ဘယ်တော့မှ မသွားခိုင်းပါဘူး။ နှစ်တိုင်း အဆူခံထိသလို နှစ်တိုင်းလဲ သွားမြဲပါပဲ။ မီးအိုးပိုက်ပြီး မီးနင်းသူနဲ့ ၊ အပ်စိုက်ပြီးမီးနင်းသူနဲ့  အတော်စိတ်ဝင်စားစရာကောင်းပါတယ်။ တခါတလေ မီးနင်းသူတွေထဲ ရပ်ကွက်ထဲက အသိအဒေါ်ကြီးတွေ၊ အကိုကြီးတွေတောင် ပါလိုက်သေးပါတယ်။ အဲဒီလို မီးနင်းပွဲ အထိမ်းအမှတ်နဲ့  ညကျတော့ ကွင်းထဲမှာ ရုပ်ရှင် မိုးလင်းပေါက် ၃ကား အလကားပြပါတယ်။ ထုံးစံအတိုင်း ကျွန်မတို့  တူအရီးနှစ်ယောက်က ထိပ်ဆုံးမှာ ဖျာအဆင်သင့်ဦးပြီး မော့ကြတာပါပဲ။ တကားပြီးသွားတိုင်း မလှမ်းမကမ်းက မုန့် တန်းမှာ ရေမုန့် ၊ ခေါက်မုန့် ၊ မုန့် လင်မယား၊ အကြော်စုံ၊ သရက်ကင်… သွားရည်စာ အစုံစားရတာလဲ အရသာတမျိုးပါ။ မနက်လင်းအားကြီး ရုပ်ရှင်ပြီးရင် ဖျာလေးလိပ်လို့  အိမ်သော့ကို လူကြီးတွေ မကြားအောင် တိတ်တိတ်လေးဖွင့် ပြန်အိပ်တတ်ကြတာလဲ ကျွန်မတို့  တူအရီးပါပဲ။ သင်္ကြန်ဆိုရင်တော့ ကွင်းထဲမှာ သံချပ်ဆုပေးမဏ္ဍဋ်ကြီးက ခမ်းခမ်းနားနား။ အဲဒီအချိန်ဆို တမိသားစုလုံး ကြည့်နေကျမို့  ခိုးကြောင်ခိုးဝှက် သွားစရာမလိုပါဘူး။ အဖေက သံချပ်ဝါသနာပါသူမိုလား။ ကွင်းတခုလုံး သံချပ်သံ ဆူဆူညံနဲ့  သင်္ကြန်ပီသတဲ့ သင်္ကြန်နေ့ ရက်တွေပါ။ မှတ်မိနေတဲ့ သံချပ်အဖွဲ့ တွေက အင်အား၊ ယဉ်ကျေးမောင်၊ ဒဲ့ဒိုး စတဲ့အဖွဲ့ တွေပါပဲ။

အဲဒီကွင်းကြီးထဲမှာပဲ ငယ်ငယ်က အိုးပုတ်တိုင်း ကစားဖို့  ဟင်းသီးဟင်းရွက် အရှာထွက်ခဲ့တာ။ အဲဒီကွင်းကြီးထဲမှာပဲ အ၀တ်ရုပ်တမ်းဆော့ဖို့  စက်ချူပ်ဆိုင်က ဖြတ်စညှပ်စတွေ သွားကောက်တတ်ခဲ့တာ။ အဲဒီကွင်းကြီးထဲမှာပဲ အမေ့ပန်းပင်တွေအတွက် နောက်ချီး(နွားချီး) အကောက်ထွက်ခဲ့တာ။ အဲဒီကွင်းကြီးထဲမှာပဲ လူရည်ချွန်ဖြေဖို့ အတွက် အားကစားလေ့ကျင့်ခဲ့တာ။ အဲဒီကွင်းကြီးကို လှမ်းမြင်ရတဲ့ ၀ရန်တာမှာ နေ့ စဉ်နေ့ တိုင်း စာကျက်ခဲ့ရတာ။ အဲဒီကွင်းကြီးထဲက ဖြတ်သန်းလာတဲ့ လေနုအေးလေးကြောင့် နွေရက်တွေက နွေနဲ့ မတူ အေးမြခဲ့တာ။ ခုတော့ ကျွန်မငယ်ဖော်ကွင်းကြီးက အစိတ်စိတ် အမွှာမွှာ အပိုင်းပိုင်း အပြတ်ပြတ်။ အဲဒီနေရာမှာ တချိန်က ရပ်ကွက်ရဲ့ အစည်ကားဆုံးနေရာ၊ အထိမ်းအမှတ်ပွဲတွေ ကျင်းပခဲ့တဲ့နေရာ၊ ငယ်ဘ၀ရဲ့ ခြေရာတွေ ထပ်ခဲ့တဲ့နေရာ ကွင်းကြီးတကွင်း ရှိခဲ့တယ်လို့ ဆိုရင် ကျွန်မကို ကလေးတွေက မယုံနိုင်တဲ့ သံသယမျက်ဝန်းတွေနဲ့  ကြည့်ကြဦးမယ် ထင်ပါရဲ့။

တန်ခူး
2:54pm 19-Nov-2009

Thursday, November 12, 2009

ဟိုဟိုဒီဒီ နိုဝင်ဘာ

မြန်မာကျောင်းသားလေး ၂ ယောက် အိမ်ပြောင်းဖို့  တက်စီထဲ ပစ္စည်းတွေ တင်နေတုန်း လော်ရီကားက နောက်ကနေ ၀င်တိုက်လို့  ခြေထောက်တွေ အပြင်းအထန် ဒဏ်ရာရတဲ့ သတင်းကို ဖတ်ပြီး အတော် စိတ်မကောင်းဖြစ်မိတယ်။ ဒီမှာ တခုခုဖြစ်ရင် ဆေးကုသစရိတ်က အရမ်းများပါတယ်။ အသက်အာမခံ မ၀ယ်ထားရင် ပိုဆိုးပါတယ်။ ဒီကလေးနှစ်ယောက်က ကျောင်းလာတက်နေတာဆိုတော့ ဘယ်အသက်အာမခံ ၀ယ်နိုင်ပါ့မလဲ။ ကောင်မလေးရဲ့ ဆေးကုသစရိတ်ဆို ဒေါ်လာ ၇ သောင်းလောက် ကျနေပြီတဲ့။ ကိုယ်တတ်နိုင်သလောက် အလှူငွေ ပါဝင်ဖို့  အီးမေးလ်တွေ ရတော့ တော်ပါသေးရဲ့လို့  စိတ်ထဲ ဟင်းချနိုင်ပါတယ်။ ဒီနိုင်ငံမှာ မြန်မာတွေ အတော်များနေတာ တယောက်ကို အနည်းဆုံး $10 နှုန်းနဲ့  ဒါမှမဟုတ် $5 နှူန်းနဲ့ ပဲ လှူကြဦး သူတို့ အတွက် အတော် အထောက်အကူရမှာပါ။ နဲတယ်များတယ် သဘောမထားပဲ ကိုယ်တတ်နိုင်သလောက် လှူဖြစ်လိုက်တာက ပိုထိရောက်မယ်လို့  ထင်မိပါတယ်။ သူတို့ ခမျာ မိဝေးဖဝေး သူစိမ်းတွေ ကြားထဲ ကျောင်းလာတက်နေရတဲ့ အပြင် ဒီလို အဖြစ်မျိုးနဲ့  ကြုံရတော့ အတော်ကို အားငယ်ဝမ်းနည်းနေကြမှာပါ။ ဒီလို တကယ်လိုအပ်နေတဲ့သူကို လှူရတဲ့ အလှူက ပိုပြီး အကျိူးရှိပါတယ်။ တဆက်တည်း အလှူငွေ ထည့်ဝင်ဖို့  နှိုးဆော်တဲ့ volunteer တွေနဲ့  အသက်အာမခံကိစ္စ၊ ဆေးရုံကိစ္စ ကူညီပေးသူတွေကိုလဲ လေးစား ကျေးဇူးတင်မိပါတယ်။ ဘယ်နေရာရောက်ရောက် လူအချင်းချင်း ရိုင်းပင်းကူညီကြလိုတဲ့ မြန်မာလူမျိုးတွေရဲ့  စိတ်ဓါတ်ကို ဂုဏ်ယူမိပါတယ်။

ခုတလော လူက အလုပ်ရှုပ်ချက်ကတော့ သတင်းစာလဲ မဖတ်နိုင်၊ တီဗွီလဲ မကြည့်နိုင်နဲ့  မနက်မိုးလင်းတာနဲ့  ကွန်ပြူတာကြီးထဲ ခေါင်းဝင်မတတ် ညလဲအတော်မိုးချူပ်တဲ့အထိပါ။ ဟိုတနေ့ က အရာရှိက ကြားပြီးပြီလား သတင်းထူးဆိုတော့ ကျွန်မက မှုန်ဝါးဝါးနဲ့ ။ အဖေအရင်းက သူ့ မိန်းမမရှိတုန်း သူမွေးထားတဲ့ ၅နှစ်နဲ့  ၃နှစ်အရွယ် ကလေးနှစ်ယောက်ကို မီးရှို့ သတ်ပြီး သူ့ ကိုယ်သူပါ သတ်သေသွားတယ်တဲ့။ ဘုရား… ဘုရား။ အဲလိုသတင်းမျိုးကြားရရင် ရင်ထဲမှာမောပြီး အသက်ရှုတွေ ကျပ်မိတယ်။ မနှစ်ကလဲ အမျိုးသမီးတယောက် သူ့ ကလေးနှစ်ယောက်နဲ့ အတူ သတ်သေသွားတာ ကြားရသေးတယ်။ ခုလာပြန်ပြီ။ အရာရှိက အဲဒီသတင်းကြားရတာ သူအရမ်းpainful ဖြစ်တယ်လို့  ပြောတော့ ကိုယ်လဲ နားလည်မိပါတယ်။ မိခင်တွေဆို ခံစားချက်က ပိုဆိုးမယ်ထင်တယ်လေ။ အဲဒီမှာ ထုံးစံအတိုင်း စဉ်းစားပြီး မေးမိတာပါပဲ။ ဒီမှာက အိမ်ခန်းလေးတွေနဲ့  နေတာ။ ဟိုဘက်အခန်းက ချောင်းဟန့် တာတောင် ဒီဘက်အခန်းက ကြားရတတ်သေးတာ။ ဒီလောက် မီးရှို့ သတ်တာတောင် အိမ်နီးချင်းတွေက မသိလိုက်ဘူးတဲ့လား။ နဲနဲလေးမှ သံသယမဖြစ်ဖူးတဲ့လား။ ကလေးတွေရဲ့ “အဖေရယ်မလုပ်ပါနဲ “့ ဆိုတဲ့ အသံကိုတောင် အိမ်နီးချင်းတချို့ က ကြားတယ်ဆိုပဲ။ တခုခုပုံမှန်မဟုတ်ပဲ ဖြစ်ပျက်နေတာ တကယ်တော့ သိသာမှာပါ။ နေနိုင်လွန်းတဲ့ စိတ်တွေ။ တကယ်လို့ များ အပြင်က တံခါးဘဲလ်ကို နှိပ်တာပဲဖြစ်ဖြစ်၊ ရဲကို ဖုန်းလေး တချက်ကောက်လှည့်တာပဲ ဖြစ်ဖြစ် လုပ်လိုက်နိုင်ရင် ကလေးတွေရော လူကြီးအသက်ပါ ကယ်တင်နိုင်ရင် ကယ်တင်နိုင်မှာပါ။ (မနှစ်က ပို့ စ်တခုမှာ လေးလောင်းပြိုင်လူသတ်မှုတခုမှာလဲ အဲဒီလို တွေးပြီး ရေးခဲ့ဖူးပါတယ်)။ အရာရှိက သူ့ နိုင်ငံဖြစ်ပေမယ့် ကိုယ်ထောက်ပြတာကို လက်ခံတယ်။ နောက်ပိုင်းမျိုးဆက်တွေ ပိုဆိုးလာတယ်လို့  သူက ဆိုပါတယ်။ သားအတွက်တွေးပူမိရင်း မိဘဆရာတွေ့ ဆုံပွဲ ကြိုတင်ဆွေးနွေးတဲ့ formထဲမှာ ကလေးတွေ တယောက်နဲ့ တယောက် ပိုချစ်ခင် သံယောဇဉ်ရှိကြဖို့  မေတ္တာထားတတ်ဖို့  ရိုင်းပင်းကူညီတတ်ဖို့့ programလေးတွေ သင်ရိုးထဲ ထည့်သင်ဖို့ အကြံပေးမိတယ်။

ဟိုတလက အိပ်ခါးနီး တခုခုတူးတဲ့ အနံ့ ရလို့  အမျိူးသားကို အဖော်စပ်တော့ သူလဲ အနံ့ ရတယ်တဲ့။ တူးနံ့ က အမဲသားလို အသားတမျိုးတူးနံ့ ပါ။ အဲဒီနေ့ က အိမ်မှာ မီးခိုးတိတ်ဆိုတော့ ကိုယ့်အိမ်က မဟုတ်တာသေချာတာမို့  မိုးချူုပ်မှ ဟင်းချက်တတ်တဲ့ အောက်ထပ်အိမ်ကလို့ ပဲ စိတ်ထဲထင်မိတာ။ တဖြေးဖြေး အနံ့ က ဆိုးလာတဲ့ အပြင် မီးခိုးတွေပါ အပေါ်ရောက်လာတော့ နှစ်ယောက်လုံး လှုပ်လှုပ်ရှားရှား ဖြစ်သွားပါတယ်။ တံခါးဖွင့်ပြီး အပြင်ထွက်ကြည့်တော့ မီးခိုးတွေ တွေ့ ရပါတယ်။ အိမ်နီးနားချင်းတွေ တုပ်တုပ်မှ မလှုပ်ကြတော့ မနေနိုင်ပဲ တံခါးတွေ ခေါက်မေးမိတယ်။ သူတို့ ကလဲ အဲဒီတော့မှ ပြာပြာသလဲ။ သူတို့ အိမ်တွေက မဟုတ်တာ သေချာတဲ့အခါ အမျိုးသားက ဘယ်ကလဲ သေချာအောက် တိုက်အောက်ဆင်းကြည့်ပါတော့တယ်။ ၆ ထပ်က လူကြီးတယောက်က တတိုက်လုံး ထူးထူးခြားခြား သူတယောက်ပဲ ထွက်ကြည့်ပြီး တိုက်အောက်ရောက်နေတဲ့ အမျိုးသားကို အော်ပြောပါတယ်။ ၅ ထပ်က… မင်းလဲ တက်လာခဲ့ ငါနဲ့ အတူသွားမယ်တဲ့။ သူတို့  နှစ်ယောက်သွားပြီး တံခါးခေါက်တော့ ဘယ်သူမှ တံခါးလာမဖွင့်ပေးပါဘူး။ သူတို့ လဲ တံခါးကို မရရအောင် ဖွင့်မှ ဖြစ်မယ်လို့  တိုင်ပင်နေတုန်း လူငယ်လေးတယောက် အပြင်က ပြန်လာပုံနဲ့  ပြေးလာပြီး ဒါင့ါအိမ်ဆို တံခါးဖွင့်ပါတယ်။ တံခါးဖွင့်လိုက်မှ အိမ်ထဲဘာမှ မမြင်ရအောင် မီးခိုးတွေ ပိတ်မှောင်နေတယ်ဆိုပဲ။ ခဏနေတော့ မီးခိုးကြားထဲက အဖိုးကြီး တယောက်ထွက်လာမှ အားလုံးသဘောပေါက်ပါတော့တယ်။ လူငယ်လေးက ငါ့အဖေဟင်းချက်ပြီး မေ့သွားတယ်ထင်တယ်တဲ့။ မီးဖိုကတော့ မီးတွေတောက်နေလို့  အကုန်ဝိုင်းပြီးငြှိမ်းရပါတယ်။ ကံကောင်းလို့ ပါ။ တကယ်လို့ သာ လူငယ်လေး အချိန်မှီရောက်မလာခဲ့လို့ ရှိရင်… ကျွန်မအမျိုးသားနဲ့  ၆ထပ်က လူကြီးသာ ငါ့အိမ်က ညှော်တာမှ မဟုတ်တာဆိုပြီး အိမ်တံခါးလေး အသာပိတ်နေခဲ့ရင် အိပ်ပျော်နေတဲ့ အဖိုးကြီး မီးခိုးငွေ့ တွေထဲ တခုခုဖြစ်သွားနိုင်တဲ့အပြင် အဲဒီအခန်းကစတဲ့ မီးက ဘယ်လောက်ထိ ပျံ့ နှံ့ သွားမယ် မသိပါဘူး။ ကြွက်ကလေး ကြွက်ထောင်ချောက်တွေ့ တဲ့ ပုံပြင်လိုပါပဲ။ ငါနဲ့ မဆိုင်ဆို ဘာသိဘာသာနေခဲ့ရင် တချိန်ကျ ငါ့ဆီ ဆိုက်ဆိုက်မြိုက်မြိုက် ရောက်လာသလိုပဲပေါ့။ ငယ်ငယ်တုန်းက သင်ခဲ့ရတဲ့ ဖတ်စာလေးသွားသတိရတယ်။ လဲနေသူကို ထူပေးပါ… အားငယ်သူကို အားပေးပါတဲ့။

ဒီမှာ အဲဒီလို တယောက်နဲ့ တယောက် နွေးထွေးမှုတွေ ပါးလျလာလို့  ထင်တယ်။ ကိုယ့်ကိုယ်ကို သေကြောင်းကြံတဲ့ အဖြစ်တွေ၊ ရထားလမ်းထဲ အတင်းခုန်ချတဲ့အဖြစ်တွေ၊ ယဉ်ယဉ်လေးရူးရတဲ့အဖြစ်တွေ အတော်ကိုများပါတယ်။ ရုံးမှာ အဲဒီလို အခက်အခဲတွေ ခံနိုင်ရည်မရှိတဲ့အခါ တယောက်ထဲမြိုသိပ်မထားဖို့  အကြံဥာဏ်တောင်းခံဖို့  counselor လုပ်တဲ့ company တခုကို ငှားထားပါတယ်။ အဲဒီသတင်းကြားမိတော့ အဖိုးကို သတိရမိတယ်။ ဟိုတခါ အညာပြန်တော့ ကိုယ်နဲ့ စိမ်းတဲ့ မျက်နှာစိမ်းတွေ အဖိုးဆီ ၀င်လိုက်ထွက်လိုက်နဲ့ ။ သူတို့ က တိုးတိုး တိုးတိုးနဲ့  ပြောကြတော့ ကိုယ်လဲ စပ်စုမရ။ နောက်မှ သိရတာက အဖိုးတို့  ရပ်ကွက်ထဲက ကတောက်ကဆ ဖြစ်ကြတဲ့ လင်မယားတွေတို့  သားအဖအချင်းချင်း နားလည်မှုလွဲကြတာတွေကို အဖိုးဆီမှာ အဆုံးအမလာခံ အကြံဥာဏ် လာယူကြတယ်ဆိုပဲ။ ကျွန်မအဖိုးက အသက်၉၀နားနီးနေပြီဆိုတော့ ရပ်ကွက်ထဲက အကြီးဆုံးကို ဂါရ၀ပြူ အဆုံးအမ နာယူကြတာ ကြားရတာ ကြည်နူးစရာပါ။ သူများအပူကို မျှယူဖြေရှင်းပေးလို့  အပူတွေ ငြိမ်းသွားတာ သူလဲ ဘယ်လောက်ကုသိုလ်ရလိုက်ပါသလဲနော်။ ဒီနိုင်ငံက counselor အယူအဆလိုမျိုးကို ကျွန်မတို့ နိုင်ငံမှာတော့ ဟိုးရှေးခေတ်ကတည်းက ယဉ်ကျေးမှုတရပ် အနေနဲ့  ကျင့်သုံးလာတာ ဂုဏ်ယူစရာကောင်းလှပါတယ်။ ရပ်ကွက်ထဲ အချင်းချင်း ရန်ဖြစ်ကြရင်ပဲဖြစ်ဖြစ်၊ လမ်းမှာကားပေါ်မှာ ခရီးသွားအချင်းချင်း ကတောက်ကဆ ဖြစ်ကြရင်ပဲ ဖြစ်ဖြစ် ဖြန်ဖြေမယ့် counselorတွေက သူ့ အလိုလို အနီးအနားပတ်ဝန်းကျင်မှာ ပေါ်လာအောင် နီးစပ်လွန်းတဲ့ နှလုံးသားတွေ သံယောဇဉ်တွေကို ကျွန်မဖြင့် စေ့စေ့တွေးလေ ကြက်သီးမွှေးညှင်းထအောင် အံ့သြလေပါပဲ။

မနက်ဖြန် Nov 13th က World Kindness Dayပါ။ ကြင်နာမှုတွေ ရှားပါးတဲ့ အရပ်မှာ ကျွန်မ အီးမေးလ် တစောင် ခုလေးတင်ရပါတယ်။ ကျွန်မတို့  ဋ္ဌာနရဲ့ Kindness Dayကို ဂုဏ်ပြုတဲ့ အစီအစဉ်ကတော့ နေ့ တဓူဝ ကျွန်မတို့ ပတ်ဝန်းကျင်လေး သန့် ရှင်းသပ်ရပ်အောင် စေတနာ အပြည့်နဲ့  လုပ်ပေးရှာတဲ့ သန့် ရှင်းရေးအန်တီကို လက်ဆောင်လေးပေးဖို့  ကိုယ်တတ်နိုင်သလောက် ပါဝင်လှူဒါန်းကြတဲ့ အစီအစဉ်ပါပဲ။ အဲဒီလို မေတ္တာတရားလေးတွေနဲ့  နွေးထွေးတဲ့ ပတ်ဝန်းကျင်လေးဖြစ်အောင် လှုံ့  ဆော် စည်းရုံးပေးတဲ့ ကျွန်မလုပ်ဖော်ကိုင်ဖက် အမကြီးကို အရမ်းလေးစားကြည်ညိုမိပါတယ်။ အထူးသဖြင့် သူရွေးချယ်လိုက်တဲ့သူဟာ ကျွန်မသံယောဇဉ်ကြီးရတဲ့၊ အလုပ်မလာရင် နေများမကောင်းလို့ လားလို့  စိုးရိမ်မိတဲ့၊ သူ့ အိမ်က အပင်သေးသေးလေးတွေကို ကျွန်မအလုပ်စားပွဲဘေးမှာ အလှဆင်ဖို့  ပန်းအိုးလှလှလေးနဲ့  လက်ဆောင်ပေးတတ်တဲ့၊ သန့် ရှင်းရေးလုပ်တဲ့အခါ သူ့ အိမ်သူရာလို စေတနာထားလုပ်ပေးတတ်တဲ့ သန့် ရှင်းရေးအန်တီဖြစ်နေလို့  ပိုလို့ ကြည်နူးဝမ်းသာမိပါတယ်။ World Kindness Dayမှာ ကိုယ့်ပတ်ဝန်းကျင်က တစုံတယောက်ကို ကူညီဖြစ်အောင် ကူညီကြစို့ လား။

(Nov 13th World Kindness Day အမှတ်တရ)
(တခါတခါ အကြောင်းအရာ သေးသေးလေးတွေကို ရေးချင်ပြီး ပို့ စ်တခုလို ချဲ့ ရေးပြန်လဲ မကောင်း… ရေးကလဲရေးချင်ဆိုတော့… မရေးဖြစ်ပဲ စိတ်ထဲမှာသာ ရှိပြီး ပျောက်သွားတာ အတော်များပါတယ်… ဟိုတခါက ဟိုဟိုဒီဒီဆိုပြီး အသုတ်စုံလို ရေးခဲ့ဖူးပါတယ်… ခုလဲ အဲဒီလို အကြောင်းအရာလေးတွေ ရေးချင်လာပြန်တာကြောင့် ဟိုဟိုဒီဒီ နိုဝင်ဘာလို့  ပေးပြီး ရေးလိုက်ပါတယ်… နောင်လဲ ရေးဖြစ်တဲ့လလေး နောက်ကထည့်ပြီး ဟိုဟိုဒီဒီလေးတွေ စိတ်ထဲပေါ်ရင်ပေါ်လာသလို ရေးမိနေဦးမယ် ထင်ပါတယ်… တကူးတက ဖတ်ပေးကြတာ ကျေးဇူးအများကြီးတင်ပါတယ်)


တန်ခူး
5:36pm 12-Nov-2009

Friday, November 6, 2009

အမေတူသား

သားလေးမွေးခါစကနေ ၄နှစ်သား(မနှစ်ကလောက်အထိ) တွေ့ တဲ့သူတိုင်းက အဖေတူသားလေးလို့  မှတ်ချက်ချကြတော့ ပြုံးပြုံးလေး နေနေရပေမယ့် ကိုယ့်သားလေးဖြစ်ပြီး ကိုယ်နဲ့ သိပ်မတူတော့ စိတ်မကောင်းသလိုလို ၀မ်းနည်းသလိုလို ဖြစ်မိတာ အမှန်ပဲ။ ဘယ်သန်တာလေးရယ်၊ ပုတိုတို လက်သည်း၊ခြေသည်းလေးတွေ တူပါသေးတယ်ဆို စိတ်ကိုဖြေရတယ်။ သားမွေးခါစက သူ့ ဆံပင်တွေက ဒူးရင်းသီးလို မာမာထောင်ထောင်ကြီးတွေ။ သူ့ အဖေဆံပင်နဲ့  တပုံစံထဲ။ နောက် ဆံပင်သန်လွန်းလို့  ခလေးပင်ပန်းမှာကြောက်လို့  ရိတ်ရင်းရိတ်ရင်းနဲ့  သားဆံပင်လေးတွေက ကိုယ့်ဆံပင်လို ပျော့ပျော့လေး… ပြီးတော့ အညိုရောင်လေးဖြစ်လာတော့… ဟေး… ကိုယ်နဲ့ တူတာ တခုရပြန်ပြီဆို ပျော်လိုက်ရတာ။ ဒီနှစ်ပိုင်းအတွင်းမှာ လူတော်တော်များများက သားက အမေနဲ့ ပိုတူတူလာတယ် လို့ ဆိုတော့ သူ့ အဖေမသိအောင် ကြိတ်ပြီး ၀မ်းသာမိနေတာ။ အထူးသဖြင့်… သားမျက်လုံးလေးတွေက အမေနဲ့ တူတယ်ဆိုပဲ။

ညနေသူ့ အဖေလာကြိုပြီး ပြန်တဲ့လမ်းခရီးမှာ သားနဲ့ အမေ အကျင့်စရိုက်တူတာ ပိုပေါ်လွင်ထင်ရှားပါတယ်။ ကိုယ်ကလဲ သူ့ အဖေကို တနေ့ လုံး ရုံးမှာဖြစ်သမျှပြောပြချင်… သားကလဲ သူ့ ကျောင်းမှာဖြစ်သမျှပြောပြချင်နဲ့ … သားနဲ့ စကားလုပြောရပါတယ်။ တခါတလေ သူ့ အဖေက ဘယ်သူ့ စကားနားထောင်ရမှန်းမသိ… ကားကလဲ မောင်းရသေးဆိုတော့ ဒီသားအမိနဲ့ တော့ခက်ပါတယ်ဆို ဟားတိုက် ရယ်မောတော့တာပဲ။ သားကလဲ ဘယ်လောက်လူလည်ကျသလဲဆို ကျွန်မငြိမ်နေရင် သူပါလိုက်ငြိမ်ပြီး ကျွန်မပြောမှ လိုက်ပြောတတ်ပါတယ်။ သူ့ အဖေကို သူတယောက်ထဲ occupyလုပ်ချင်တာလေ။ သားမေမေပြောမယ်ပြီးမှ ပြောနော်ဆို သူ့ အဖေက ကိုယ့်ကို ကလေးနဲ့ ပြိုင်စကားလုပြောတယ်လို့  ဝေဖန်ပါသေးတယ်။ အိမ်မှာ တယောက်ထဲရှိပေမယ့် အချိန်ပြည့်သားအသံနဲ့  ဝေဆာနေတတ်ပါတယ်။ တနှစ်တခါ မြန်မာပြည်ပြန်ရင် ကိုယ့်အိမ်က ကိုယ့်အသံနဲ့ ဝေဆာနေသလိုပါပဲ။ အမေကတော့ ပြောတယ်… “ညည်းပြန်ရောက်နေတာ ကြေငြာစရာမလိုဘူး” တဲ့။ ခုဆို အမေတူသား မောင်စကားများလေးပါ ပိုတိုးလာတော့ အိမ်မှာ ခေါင်းလောင်းတွေ အများကြီးပေါ့။

ဟိုတလောက သူငယ်ချင်းတယောက်ရဲ့ သမီးလေးမွေးနေ့ ကို gameလေးတွေနဲ့  ကျင်းပပါတယ်။ တခုသောgameက အကပြိုင်ပွဲပါ။ သားများ ကြောင်နေမလား အောင့်မေ့တယ် အသားကုန် က နေတဲ့ သားကို ကြည့်ပြီး အားလုံးက ပွဲကျကြပါတယ်။ အကမှာ အပြတ်mood၀င်ပြီး ကနေတာပါ။ သူ့ ကို ဘယ်သူ့ မှလဲ မသင်ပေးရပဲ သူ့ ဘာသာ က နေတာကြည့်ပြီး သူ့ အဖေက တိုးတိုးလေး လာပြောပါတယ်။ အမေတူသားပဲ။ အဲဒီနေ့ က သားက အကအကောင်းဆုံးဆုရသွားတော့ သူရတဲ့ ဆုလေးကို တမြတ်တနိုးနဲ့ ။ ပြီးခဲ့တဲ့လက နောက်သူငယ်ချင်းတယောက် သမီးမွေးနေ့ သွားတော့လဲ အကဆု ရပြန်ပါသေးတယ်။ ကျောင်းတုန်းက သင်္ကြန်မှာ က ချင် ခုန် ချင်တဲ့ ပိုးကို အဖေ ဘယ်လိုမှ မသတ်နိုင်ပဲ နောက်ဆုံးလက်လျော့ ခွင့်ပြူလိုက်ရတဲ့ ကိုယ့်အဖြစ်ကိုယ် သတိရမိပါတယ်။ သူ့ အဖေက လူအများကြီးရှေ့  မင်းတို့ မို့  မရှက်တယ်လို့  ကိုယ်တို့  သားအမိနှစ်ယောက်ကို ကဲ့ရဲ့တတ်သေးရဲ့။

ပြီးခဲ့တဲ့ အပတ်က သားနေမကောင်းလို့  ကိုယ်နဲ့ သူ့ အဖေ တလှည့်စီ ခွင့်ယူကြပါတယ်။ ဆေးခန်းမှာ သားအလှည့်ရောက်ဖို့  စောင့်နေတုန်း သားက သူ့ ဆရာမဆီ စာရေးချင်တယ်ဆို ကိုယ့်ဆီက တယ်လီဖုန်းကိုတောင်းပါတယ်။ တယောက်ထဲငြိမ်နေလို့  ကြည့်လိုက်တော့ အတော်ခရီးရောက်နေပါပြီ။ သူ့ စိတ်ကူးနဲ့ သူ့ ဝါကျကို သူ့ ဘာသာစီပြီးရေးနေတာ အံ့သြသွားမိပါတယ်။ သူ့ အဖေဆို SMS ရိုက်ရတာ စပါးလုံးကောက်နေသလို အတော်ဒုက္ခရောက်တတ်ပါတယ်။ တခါတလေ သူ့ အတွက် ကိုယ်က SMS ရိုက်ပေးရပါတယ်။ ခုသားကျတော့ အမေကိုတောင် တခွန်းမမေးပဲ ချောလို့ မွေ့ လို့ ။ သူမသိတာ အောက်လိုင်းကို ဘယ်လို သွားရမလဲဆိုတာပါပဲ။ ကျန်တာတွေက ဘယ်လိုရိုက်လိုက်မှန်းကို မသိတာပါ။ သူ့ SMS လေးကို ချစ်လွန်းလို့  သိမ်းထားတာ ဖတ်ကြည့်ပါဦး။

I love you teacher nor. I love you so much. You always play I love you. You go to sc. Do u see the horse. U said yes. I miss you.

သားရေ သား SMSလေး မေမေ့ကို ပြန်ရှင်းပြဦးလို့ ဆိုတော့ တီချယ်က သူနဲ့ အမြဲကစားလို့  ပိုချစ်တယ်။ တီချယ်က SC(shopping centre) သွားတယ်။ ဟိုတနေ့ က zoo သွားတော့ မြင်းလေးပြတာ တွေ့ တယ်လို့ ပြောတယ်။ တီချယ့်ကို လွမ်းတယ်တဲ့။ အဲဒီ SMSလေးကို သူ့ ဆရာမပို့ လိုက်တော့ ဆရာမလဲ အံ့သြနေပါတယ်။ ညနေသူ့ အဖေကို ပြန်ပြတော့ မဖြစ်နိုင်ဘူးတဲ့။ ဒါသားရေးတာ မဖြစ်နိုင်ဘူးဆိုတော့ သားကို သူ့ ရှေ့ တင် ရေးခိုင်းလိုက်ပါတယ်။ သားက သူ့ စိတ်ကူးနဲ့ သူ ကောက်ရေးလိုက်တော့ သူအတော် အံ့သြသွားပါတယ်။ SMSကို ချောချောမွေ့ မွေ့ ရိုက်တတ်တာအပြင် သူ့ အရွယ်နဲ့  ၀ါကျလေးကို စိတ်ကူးနဲ့ စီတတ်တာကလဲ အံ့သြစရာပါ။ ထုံးစံအတိုင်း သူ့ အဖေက မှတ်ချက်ချပါတယ်။ မင်းရဲ့သားက ကြီးရင် မင်းလို စာတွေရေးဦးမယ် ထင်တယ်တဲ့။

အပေါ်ကအချက်လေးတွေကတော့ အမေတူတဲ့ကောင်းတဲ့ အချက်လေးတွေပေါ့နော်။ ကောင်းတာလေးတွေရေးပြီး ဆိုးတာလေးတွေလဲ ချန်ထားလို့ မရပြန်ပါဘူး။ ကိုယ်ငယ်ငယ်က အဖေဆော်ပလော်တော်တီးတာ အတော်ခံခဲ့ရပါတယ်။ မောင်နှမ ၃ယောက်မှာ ကိုယ်က အခံရဆုံး။ အကြောင်းရင်းက ခေါင်းမာလို့ ပါ။ မှန်တယ်ထင်ရင် ဘယ်လောက် ရိုက်ရိုက် မျက်ရည်မကျတတ်တော့ ရိုက်တဲ့သူတောင် မောယူရတဲ့အထိပါပဲ။ တခါတလေ ဘယ်လောက်ဆိုးလဲဆို ကိုယ်မှန်တယ်ထင်ပြီး အဖေက ရိုက်ဖို့ လုပ်ရင် အဖေ့ကို ဒုတ်တောင် ကိုယ်က ယူပေးလိုက်ပါသေးတယ်။ ဆိုးတယ်နော်။ ဆက်မပြောတော့ဘူး။ ကိုယ်ဆိုးတာတွေ ပေါ်ကုန်မှာ စိုးလို့  ။ ခုတော့ ကိုယ်ခေါင်းမာတဲ့ ၀ဋ်က ကိုယ့်ပြန်လည်နေပါပြီ။ သားက ဒုတ်ကို လုံးဝမကြောက်ပါဘူး။ သူလုပ်ချင်တဲ့အလုပ်ကို ဒုတ်မကြောက်ပဲ ဘယ်လောက်ရိုက်ရိုက် ဆက်လုပ်တတ်ပါတယ်။ ဒီတော့ ရိုက်တဲ့နည်းက မထိရောက်ဘူးဆိုတာ သဘောပေါက်ပြီး ခုတော့ လက်ဖြစ်ပုံပြင် (အဲဒီပုံပြင်လေးတွေ အကြောင်း ပို့ စ်တခု သတ်သတ်ရေးပါဦးမယ်) တွေနဲ့  ဆုံးမတာ အောင်မြင်နေပါတယ်။ ဘယ်လောက်ခံမလဲတော့ မသိ အမေတူသား ခေါင်းမာလေးရေ။

ငယ်က အမေက ဘယ်သန်ကိုယ့်ကို ဘယ်လက်နဲ့ ရေးမှာ စိုးလို့ ဆို ဘယ်လက်ကို ပတ်တီးကြီးစီးထားပေးပါတယ်။ ပြီးတော့ သမီးလက်မှာ နာနာကြီးဖြစ်နေတယ် ဘယ်လက်နဲ့  မရေးနဲ့ လို့  မှာလိုက်ပါတယ်။ မိဘစကားကို တသွေမတိမ်း နားထောင်တဲ့ ကိုယ်က ကျောင်းရောက်ရင် ပတ်တီးလေး တိတ်တိတ်လေးဖြုတ်ပြီး ဘယ်လက်နဲ့ ပဲ စာရေးပါတယ်။ ညနေကျောင်းဆင်းခါနီးရင် ပတ်တီးလေးပြန်ပတ်။ ကလေးဆိုတော့ ဘယ်ပတ်တီးကို လက်ရာမပြတ် ပြန်ပတ်တတ်ပ့ါမလဲ။ ဦးနှောက်လေး တထွာလောက်နဲ့  လူလယ်လုပ်တော့ နောက်ဆုံးအိမ်ကလဲ လက်လျော့ပြီး ဘယ်လက်နဲ့ သာရေးခိုင်းလိုက်ရတော့တာ။ ဟိုတနေ့ က သားဆရာမက သားအိမ်မှာ ဟင်းသီးဟင်းရွက်စားလား လို့ မေးတော့ စားပါတယ်.. ဘာများဖြစ်လို့ လဲလို့  ဆရာမကို မေးကြည့်မိပါတယ်။ ကျောင်းမှာ တခြားကလေးတွေသာ ထမင်းပန်ကန်ထဲ ဟင်းသီးဟင်းရွက်ကျန်မယ်… သားက အမြဲကုန်တယ်တဲ့။ အဖြစ်မှန်ကို ဟိုတနေ့ ကမှ သိလိုက်ရတာ ဟင်းသီးဟင်းရွက်လေးတွေကို ဆရာမမသိအောင် အနားက အမှိုက်ပုံးလေးထဲ သွားသွားထည့်တာပါတဲ့။ ဆရာမလဲ သူ့ ရဲ့လူလည်ကျပုံကို ငိုအားထက် ရယ်အားသန်ဖြစ်ရပါတယ်။ သူငယ်ချင်းကတော့ နင့်သား Mr Bean ကြည့်လွန်းလို့  အဲဒီအကျင့်တွေ ရတာဖြစ်မယ်တဲ့။ တကယ်တော့ Mr Bean လက်ချက်ထက် Ms တန်ခူးသွေးမို့ ဆို ပိုမှန်ပါလိမ့်မယ်။

မိဘတယောက်ရဲ့ အတ္တအတိုင်း ကိုယ့်သားလေးကို လောကကြီးမှာ အကောင်းဆုံး အနေအထိုင် အကျင့်စရိုက်လေးတွေ ရစေချင်တာမို့  အမေတူတဲ့ ကောင်းတဲ့အချက်လေးတွေ ယူစေပြီး မကောင်းတာလေးတွေတော့ ကိုယ်ပြောသလိုလုပ် ကိုယ်လုပ်သလို လိုက်မလုပ်နဲ့ ဆိုတဲ့ အတိုင်း ဒီကမေမေကြီးက ဆုံးမရပါဦးမယ်။

တန်ခူး
5:07pm 3-Nov-2009

Monday, November 2, 2009

Lets Make Our World The Most Beautiful Home

ချစ်သူငယ်ချင်းသက်ဝေက ကမ္ဘာပျက်ဖို့  တလအလိုတဲ့။ တက်ဂ်ထားတာကြာပေါ့။ တက်ဂ်ဂိမ်းတွေဆို ရှေ့ ဆုံးက တက်တက်ကြွကြွ ရေးတဲ့ တန်ခူး ဒီတခါတော့ ကြောက်လန့် သွေးပျက်ပြီး တံခါးကြားထဲ ပုန်းနေမိတာ။ သူများတွေ ဘာတွေရေးကြသလဲလို့  တံခါးကြားထဲက ချောင်းကြည့်နေတာ။ ပိုးဟပ်ကြောက်တဲ့ သက်ဝေက ဒီပို့ စ်ကို မတုန်မလှုပ်ရေးပြသွားလိုက်တာ… အေးလေ… ပိုးဟပ်မှ မဟုတ်တာ။ ကြောက်ပါတယ်ဆို… မမမေငြိမ်းရေးထားတာကလဲ ကြက်သီးမွေးညှင်းများတောင် ထ မိပါရဲ့။ ပန့် ပို့ စ်လေးဖတ်ရတော့ နဲနဲအသက်ရှုချောင်သွားတယ်။ ကာတွန်းလေးနဲ့ ဆိုတော့ ကြောက်အားလန့် အားနဲ့  ပြုံးမိသေးတယ်။ မမသိဂီင်္နဲ့ မမသီတာတို့ ကလဲ ရင့်ကျက်လိုက်ကြတာ။ အခုတော့ တံခါးကြားထဲက မထွက်မနေ ထွက်လာပါပြီ။ ရေးလိုက်ဦးမဟဲ့… အာဂသတ္တိ ဒေါ်တန်ခူး။

တရားမရှိဘူးပဲပြောပြော။ အဲဒါမျိုးကိစ္စဆို အတော်ကြောက်တတ်ပါတယ်။ ရုပ်ရှင်တောင် သွေးထွက်သံယိုကားတို့  နိမိတ်မကောင်းတဲ့ကားတွေဆို ဝေးဝေးရှောင်တတ်ပါတယ်။ အခွေဆိုင်မှာ အခွေငှားရင် စိတ်ညစ်စရာကောင်းတဲ့ကား မပေးနဲ့ နော်ဆို ငှားတတ်တာမျိုးကို။ အားလပ်ချိန်မှာ အနားယူပါတယ်ဆိုမှ ပျော်ပျော်ရွှင်ရွှင် စိတ်လက်ချမ်းသာလေး အနားယူချင်တာပါ။ ငယ်ငယ်တုန်းက စာမေးပွဲနားနီးလို့  ဂေါက်တောက်တောက် ဖြစ်လာရင် “အတ္တများနဲ့ အဆိပ်တက်လို့  အခန်းကျဉ်းလေးထဲမှာ ကိုယ်တယောက်ထဲရူး” လို့  မေဆွိရဲ့ အတ္တသီချင်းအော်ဆိုရင် မေမေက “ဟဲ့… နိမိတ်မကောင်း… ညည်းတကယ်ရူးသွားဦးမယ်” လို့  ဟန့် တတ်ပါတယ်…။ အဲဒီအခါ “အောင်ပါစေ…အောင်ကြပါစေ” ဆို ကမန်းကတန်းသီချင်းပြောင်းဆိုခဲ့တာ အမှတ်ရမိတယ်။ မေခလာရဲ့ “စိတ်… စိတ်နဲ့ တို့ နဲ့ ညစ်တယ်… သေရင်အေးမယ်” သီချင်းကို အပြတ်ဟစ်နေရင် အမေခေါင်းခေါက်တာ ခံခဲ့ရတာပါ။ အဖေကလဲ အိမ်မှာ သီချင်းဖွင့်ရင် “အောင်ခြင်းရှစ်ပါး”လို ဓမ္မတေးဖွင့်ရင်ဖွင့်… ဒါမှမဟုတ်.. သုမောင်ရဲ့ “သူဌေးဝါဒ” လို အတိတ်ကောင်း နိမိတ်ကောင်းသီချင်းတွေသာ ဖွင့်တတ်တယ်မိုလား။ ဒီတော့လဲ ကိုယ်က မိရိုးဖလာ အစဉ်အလာမပျက်အောင်… ပြီးတော့ ဘိုဆန်ဆန်လေးနဲ့  တက်ဂ်ဂိမ်းကို ရေးတော့မယ် ချစ်သက်ဝေရေ။ “Lets Make Our World The Most Beautiful Home” … ကဲ…လာ… တို့ ရဲ့ကမ္ဘာကြီးကိုအလှပဆုံး အိမ်ကလေး ဖြစ်အောင် ကြိုးစားကြစို့ လား။

အဲဒီသီချင်းလေးကို ခုတလော ဒီက channel 5 မှာ ညတိုင်းလို လွှင့်နေတာပါ။ သီချင်းလေးနားထောင်ရတာ ကြည်နူးမိသလို စာသားနဲ့ ရည်ရွယ်ချက်လေးကလည်း ကောင်းတာမို့  နှစ်သက်မိတာပါ။ ပတ်ဝန်းကျင် ထိန်းသိမ်းရေးအတွက် ရည်ရွယ်စပ်ဆိုထားတဲ့ သီချင်းလေးပါ။ စာသားတချို့ က…

(www.youtube.com/watch?v=QIX-jVka4PQ)

It only takes one heart, to make a start.
A dream to just go green, to keep it clean.

Side by side we’ll make it happen
So that we can live like we’re in heaven.

Let’s make our world the most beautiful home
Where everyone can live and breathe and they can easily roam.

We just have to make it ours to make it last
By giving our all & doing our best
Let’s keep our world the most beautiful home…oh yeah

ကမ္ဘာကြီးကျန်းမာရေးကောင်းဖို့ က ဒီကမ္ဘာပေါ်မှာ မှီတင်းနေထိုင်တဲ့ လူသားတွေ အားလုံးပေါ်မှာ တာဝန်ရှိတယ်မိုလား။ မလိုအပ်ရင် အိမ်က မီးခလုတ်လေးပိတ်ထားတာတို့ … အဲကွန်းမသုံးပဲနေတာတို့ … ပြီးတော့ Recycling လုပ်တာတို့ ဟာ တဦးချင်းအတွက် သိပ်မထိရောက်ဖူး ထင်ရပေမယ့် ကမ္ဘာကြီး အသက်တစက္ကန့်  ဆန့် မဆွဲနိုင်ဘူးလို့  ဘယ်သူပြောနိုင်မလဲ။ တယောက်ချင်းဆီက သစ်ပင်လေးတပင်စိုက်လိုက်ခြင်းအားဖြင့် ရာသီဥတုဆိုးဝါးပျက်ပြားလာမှု လျော့ပါးမသွားဘူးလို့  ဘယ်သူပြောနိုင်မလဲ။ ကျန်းမာရေး ချိနဲ့ လာတဲ့ ကမ္ဘာကြီးကို အားလုံးဝိုင်းဂရုစိုက်ကြရင် ကမ္ဘာကြီးအသက်ရှည် ကျန်းမာလာပြီး နေချင့်စဖွယ်… အလှပဆုံးအိမ်လေးလို ဖြစ်လာမှာအမှန်ပါပဲ။ Lets Make Our World The Most Beautiful Home.

(သက်ဝေရေ တန်ခူးဗားရှင်းနဲ့ ရေးပေးလိုက်တယ်နော်…)

တန်ခူး
9:13pm 2-Nov-2009

Saturday, October 31, 2009

ဝေးခဲ့သော်လည်း ပန်းခရမ်းပြာ



(အပေါ်ကပုံကိုသူငယ်ချင်းတယောက်ဆီက အီးမေးလ်နဲ့ ရပါတယ်)

သူငယ်ချင်းတယောက်က အီးမေးပို့ လိုက်တယ် ခရမ်းပြာ။ Youtube video clipလေးကို နှိပ်ကြည့်လိုက်တော့ ငါ့နှလုံးသားတွေ မြင်မကောင်းလောက်အောင် အပိုင်းအပိုင်းအစစ ကြေမွလို့ ။ ငါကြေကွဲတယ်။ငါယူကျူံးမရဖြစ်တယ်။ငါငိုနေမိတယ် ပန်းခရမ်းပြာရေ။

http://www.youtube.com/watch?v=9-80WGzkQog

ဟိုးတုန်းက ညနေခင်းများ
ကြည်ပြာကန်ဘေးမှာ သံစဉ်လှိုင်းခတ်
တေးဖွဲ့ လွင့်ပျံ့ နေတတ်စဉ် ကမ်းမဲ့ပန်းဗေဒါများ
ရေပြင်ပေါ်မှာ မှီရာတည်ရာ စွန့် ခဲ့မျောလို့ နေတော့တယ်

အိပ်မက်ထဲက ခရမ်းပြာ… စိတ်ကူးထဲက ခရမ်းပြာ… ဟိုးရွှေရောင်အတိတ်တွေထဲက ခရမ်းပြာ။ ဝေးခဲ့ရရင်တောင် အဲလောက် တမျှော်တခေါ်ဝေးခဲ့ရလိမ့်မယ်လို့ … အရင်က ငါတကယ်သံသယမရှိခဲ့တာပါ။

ကြွေသွားတဲ့နုပျိုခြင်းများ
လှောင်ရယ်သံကြားမှာမတည်ငြိမ်သေးခဲ့
ငြီးငွေ့ စိတ်ပျက်နေရစဉ် အပြစ်မဲ့အလွမ်းခြေရာများ
နာကျင်နေသူရင်မှာထင်ကျန်
တယုတယထွေးပိုက်နေခဲ့သူ

ငါက အတိတ်မှာ နေထိုင်သူ။ ဒီတော့ နုပျိုခြင်းတွေ ကြွေကြွေသွားတာကို တမင်မသိချင် ယောင်ဆောင်လို့ ။ အဖြူရောင်ဘာသာစကားတွေ ဘယ်သူနားမလည်လည် တကိုယ်တည်း ဆိုညည်းနေမိတယ်။ ခရမ်းပြာရဲ့ ပစ္စုပန်တွေ အဲလောက် အကျည်းတန်ခဲ့လိမ့်မယ်လို့  ဘယ်သူက ရက်ရက်စက်စက် နိမိတ်ဖတ်ခဲ့မလဲကွယ်။ ဘာပဲဖြစ်ဖြစ် ခရမ်းပြာရဲ့ပွင့်ဖတ်တွေ ဘယ်လောက်နွမ်းကြေခြောက်သွေ့ သွားဦးတော့… ငါ့ရင်ထဲ တယုတယ ထွေးပိုက်ထားနေဦးမှာပါ ခရမ်းပြာရယ်။


ဝေးခဲ့ပြီးပန်းခရမ်းပြာရေ
တခါတရံမှာ အိပ်မက်လို
ပင်ညိုညိုရိပ်တွေ
မြမြက်စိမ်းစိမ်းတွေ
ဘယ်ဆီမှာလဲမသိတော့ပါ

ငါ့အတွက် အငြိမ်းချမ်းဆုံး ရင်ခွင်ပါ။ ဒီရင်ခွင်မှာ ငါက ထာဝရ ခိုနားချင်သူ။ ဒါပေမယ့်… ဒါပေမယ့်ခရမ်းပြာရယ်… ငါနဲ့ အကျွမ်းတ၀င်ဖြစ်ခဲ့တဲ့ ပင်ညိုရိပ်တွေ… စိမ်းမြမြမြက်ခင်းလေးတွေ… ခု ဘယ်ရောက်သွားပြီလဲ… ဘယ်ဆီမှာလဲ… ဖြေပါဦးခရမ်းပြာ။ င့ါရင်ခွင်ကို ဘယ်သူက ဓားချွန်ချွန်နဲ့  ခြေမွ ဖျက်ဆီးသွားခဲ့သလဲ။

မျှော်လင့်ချက်မနက်ဖြန်ရက်များ
အဆင်မပြေနိုင်သေးခင်
ယုံကြည်တမ်းတ
အသိစိတ်လမ်းလျောက်နေဖြစ်စဉ်
စခန်းမဲ့နားခိုရာလည်း
ဘယ်ဆီဘယ်မှာရည်ရွယ်ရာကို
ခုထိလက်မလျော့နိုင်ဘူးကွယ်

ဘယ်တော့မှ ချန်မထားရစ်ပါဘူး ခရမ်းပြာ။ ငါ့မျှော်လင့်ချက်တွေက အသက်ပြင်းလွန်းလို့ ပါ။ မဖြစ်နိုင်တာကို ရူးသွပ်သူလို့  လှောင်ရယ်ကြပါစေ… ငါ့ယုံကြည်ချက်တွေက ဘယ်တော့မှ အရည်မပျော်နိုင်အောင် မာခဲနေကြပြီ။ မောပန်းလွန်းလှတဲ့ ဒီခရီးရှည်ကြီးမှာ ခရမ်းပြာမှ အနားမရှိတော့လဲ နားခိုရာရင်ခွင်မဲ့တဲ့ ငှက်ငယ်တကောင်လို ငါ့ဘ၀ပါ။ အတောင်တွေ ညောင်းလဲ ငါပျံသန်းနေဦးမှာ။ ဝေးခဲ့သော်လည်း… ခရမ်းပြာ။ တချိန်မှာ နီးကြရဦးမှာလို့  ငါခေါင်းမာစွာနဲ့  အော်ဟစ်နေတုန်းပဲ…. ချစ်တဲ့ခရမ်းပြာရယ်။

(ခုတလော စိတ်တွေ လေတယ်။ အဲဒီ Video Clip လေးကို ကြည့်မိတော့ ပိုစိတ်လေတယ်။ ချစ်ရတဲ့ ညီမလေး အိမ့်ချမ်းမြေ့က ခုတလောဆိုဖြစ်တဲ့ သီချင်းလေးတွေတဲ့ တက်ဂ်ထားတယ်။ အိမ့်ရေ… ခုတလော အိပ်မက်ထဲက လူတယောက်လို ယောင်ယောင်ဝါးဝါး ဆိုညည်းမိနေတဲ့ သီချင်းက ဝေးခဲ့ပြီ ပန်းခရမ်းပြာတဲ့။ အဲဒီတပုဒ်ထဲကိုပဲ အရူးတယောက်လို ထပ်ပြန်တလဲလဲ ဆိုညည်းမိနေတာပါ။ အိမ့်ကျေနပ်နိုင်ကောင်းပါရဲ့နော်။ ကိုယ်ချစ်တဲ့ ချစ်မမတွေရော ဘာသီချင်းလေးတွေ ဆိုညည်းနေမလဲ သိချင်နေမိတယ်… မမခင်မင်းဇော်၊ မမမေငြိမ်း၊ မမသိဂီင်္၊ မမသီတာ… ပြီးတော့ မမသက်ဝေ)

Monday, October 26, 2009

မောင်



ခပ်လှမ်းလှမ်းက ပန်းခရမ်းရောင်စွယ်တော်တွေက နိုင်ငံရေးသိပ္မံ ဘာသာရပ်ထက် စွဲငြိစရာကောင်းတာကြောင့် ဒီLဆောင်က အချိန်တွေ မဖျက်ဖြစ်တာပဲလား…။ အမှတ်တမဲ့နဲ့  Lဆောင် မှန်ပြူတင်းကို ကြည့်မိတော့ မြင်တွေ့ နေကျ ကောင်လေးနံဘေးက လူတယောက်ကို မှတ်မှတ်ထင်ထင် ရှိသွားခဲ့တယ်။ လှိုင်းခပ်ကြီးကြီးတွေပါတဲ့ ဆံပင်အကြီးကြီးရယ်… အောက်နားလေးမှာ ဘဲဥပုံလိုဖြစ်သွားတဲ့ မျက်မှန်ကြီးကြီးရယ်… ပြီးတော့ အဆင်ကြီးကြီး ဟာဝေယံရှပ်ရယ်… ။ အတော်ခင်စရာကောင်းတဲ့သူပဲ။

သူငယ်ချင်းက စာအုပ်ပေါ်မှာ တခုခုရေးပြီး ကိုယ့်ကို လှမ်းပေးတယ်။ စာသင်ချိန်တွေမှာ ဒီလို စာအုပ်နဲ့  စကားပြောတတ်တာ အကျင့်ဖြစ်နေပြီ။ “ဟိုမှာ မျက်ကပ်” တဲ့။ အဲဒီကောင်လေးရဲ့ မျက်လုံးတွေက နှာခေါင်းနားအတော်ကပ်နေတာမို့  ကိုယ်တို့ အုပ်စုမှာ Nick Name ပေးခဲတဲ့ ထူးက ပေးခဲ့တဲ့ နာမည်။ ထူးစာအုပ်ပေါ်မှာ ကိုယ်ပြန်ရေးလိုက်တယ်။ “သူ့ ဘေးက တယောက်က ဆံပင်က အကြီးကြီးပဲနော်… ရယ်ရတယ်… ခင်စရာပဲ” လို့ ။ ထူးနဲ့ ထိုက် ကိုယ့်စာဖတ်ပြီး ဟိုလူကြီးဆီ အကြည့်ရောက်ပြီး တခစ်ခစ်ရယ်ကြတယ်။ အဲဒီလူကြီးကတော့ မျက်ကပ်ဘေးမှာ သစ္စာရှိစွာနဲ့  အပါးတော်မြဲလို့ ။

မှတ်စုစာအုပ်အောက်က ထူးအိမ်သင်သီချင်းစာအုပ်လေး အကြည့်ရောက်သွားပြီး စိတ်ထဲက တိုးတိုးလေး ညည်းမိတယ်။ အဲဒီတုန်းက စတွေ့ ပြီး မှတ်မှတ်ထင်ထင်ရှိခဲ့မိတဲ့ အဲဒီလူကြီးက ထူးအိမ်သင် သီချင်းတွေ စွဲမက်စရာကောင်းလောက်အောင် ဆိုတတ်လိမ့်မယ်လို့  ကိုယ်သံသယမရှိခဲ့တာ အမှန်ပဲ။

*****************************

1-3/16 အခန်းရှေ့ မှာ လူကြားထဲ ပါတိတ်အဆင်ကြီးကြီး ရှပ်အကျီ်ကို အပြင်ထုတ်ဝတ်ပြီး ပုဆိုးတိုတိုနဲ့  အဲဒီလူကြီးကို ကွက်ကွက်ကွင်းကွင်း မြင်လိုက်ရတော့ ဘာရယ်မဟုတ် ကိုယ်ပြုံးမိတယ်။ သူ့ ကိုတွေ့ လိုက်ရင် အမြဲ လွတ်လွတ်လပ်လပ် ပေါ့ပေါ့ပါးပါးနဲ့  အတော်အေးအေးလူလူ နေတတ်မယ့်ပုံ။ လမ်းလျှောက်ရင် လက်တဘက်ထဲ လွှဲလျှောက်တတ်တာကို ကိုယ်ကလဲ ပေါက်ပေါက်ရှာရှာ သတိထားမိသေးရဲ့။

ခုလောလောလတ်လတ် ၀ယ်ထားတဲ့ လက်ရေးကဗျာစာအုပ်လေးထဲက ကိုသျှားကဗျာတပုဒ်ကို ဖတ်နေရင်း ဆရာရောက်လာတော့ ခပ်ဝေးဝေးရောက်သွားတဲ့ ပါတိတ်အကျီ်ကြားကြားကို လှမ်းတွေ့ လိုက်ရတယ်။ ခုနောက်ပိုင်း 8-1/2မှာ… နွေးအေးမှာ… ကားပတ်ကင်မှာ… မျက်ကပ်နဲ့ အတူ တွေ့ ရစိတ်လွန်းတော့ မျက်မှန်ကြီးကြီးအောက်က အဲဒီလူကြီးရဲ့ မျက်ရစ်မပါတဲ့မျက်လုံးတွေနဲ့ တောင် ကိုယ်ကရင်းနှီးလာသလို။

*****************************

တွဲတဲ့သူငယ်ချင်းနှစ်ယောက်နဲ့  မေဂျာ ကွဲသွားရတော့ ရင်ထဲဟာတာတာ။ အတန်းထဲ ၀င်လာသူတွေကို တယောက်ပြီးတယောက်ငေးရင်း လိုက်မှတ်နေတုန်း… ဗြုန်းဆို အဆင်ကြီးကြီး စီဝိုင်စီအကျီ်ကြီးနဲ့  အဲဒီလူကြီးကို တွေ့ လိုက်ရတော့ ဘာရယ်မဟုတ် ကိုယ်ဝမ်းသာသွားမိတယ်။ သူနဲ့ ကိုယ် စကားမယ်မယ်ရရ မပြောဖူးပါပဲ ဆွေလိုမျိုးလို ကိုယ့်စိတ်ထဲ ရင်းနှီးနေမိတာ ထူးဆန်းသားလား။ မျက်မှန်အောက်က မျက်လုံးတွေက ကိုယ့်ဆီအရောက် သူကယောင်ယောင်လေး ပြုံးပြသွားတယ်။ သူ့ ပုံကြည့်ရတာ ကိုယ်ဒီမေဂျာရတာ သိပြီးနေသလို။ ပြီးတော့… မေဂျာကွဲသွားတဲ့ သူ့ သူငယ်ချင်းလေးအတွက် ကြေကွဲနေသလို။

ပထမနှစ်ကတည်းက မတွဲဖြစ်ပေမယ့် ရင်းနှီးလက်စရှိတဲ့ ကောင်မလေး သုံးယောက်ကို ပြုံးပြလိုက်တယ်။ စကားဖောင်ဖွဲ့ တတ်တဲ့ ကိုယ့်အကျင့်အတိုင်း စကားတွေဖောင်ဖွဲ့ ။ ဆံပင်ရှည်ရှည်နဲ့  မြန်မာအကျီင်္လေးတွေ ၀တ်တတ်တဲ့ အမြဲပြုံးနေတတ်တဲ့ မဟာဆန်သူလေးရယ်… ရှပ်အကျီ်ပွပွလေးတွေ အမြဲဝတ်တတ်တဲ့ ယောင်္ကျားလေးနဲ့ တူတဲ့ ကောင်မလေးရယ်… မျက်မှန်လေးနဲ့  ပွင့်ပွင့်လင်းလင်းစကားပြောတတ်တဲ့ ကောင်မလေးရယ်… ပြီးတော့ ကိုယ်ရယ်။ အဲဒီလူကြီးနဲ့ ကိုယ်တို့ တွေ အမျိုးတော်ရလိမ့်မယ်လို့  မထင်မှတ်ခဲ့ဘူး။

*****************************

“ညည်းတို့ ကို ငါက programming ရှင်းပြမယ်… ငါ့ကို ညည်းတို့ က Microwave ရှင်းပြ”

ကိုယ်တို့ ကို အဲဒီလူကြီးက သူ့ တူမတွေကို စကားပြောသလို ညည်းတို့ လို့  နာမ်စားသုံးပြီး ပြောတတ်တယ်။ ဒါကြောင့်ပဲ သူနဲ့  မြန်မြန်ဆန်ဆန် လွယ်လွယ်ကူကူ ခင်မိသွားသလားမသိ။ သူနဲ့ စကားပြောရတာ ကိုယ့်ဆွေကိုယ်မျိုးနဲ့  စကားပြောရသလို လွတ်လွတ်လပ်လပ်ရှိတယ်။ ဘာအထာမှမရှိ။ သူဝတ်ထားတဲ့ အ၀ါရောင်တောက်တောက် တီရှပ်ပေါ်က ကာတွန်းရုပ်လေးကြည့်ပြီး သူ့ အကြိုက်ဆုံးအရောင်က အ၀ါရောင်ထင်ရဲ့လို့  ကိုယ်ကအတွေးနယ်ချဲ့ နေမိတယ်။

သူနဲ့ သူငယ်ချင်းဖြစ်မှ သူ့ ပုံစံနဲ့ မဆီမဆိုင် သိခဲ့ရတာတွေ…. လူကသာ လူကြီးပုံဖြစ်ပေမယ့် သူက ကိုယ့်ထက်တောင် ၆လ ငယ်သေးတာရယ်… သူ့ အိမ်ကကြောင်လေးတွေ အကြောင်းပြောပြတဲ့အခါ သူ့ မျက်လုံးတွေပြုံးနေတာရယ်… ပြီးတော့ သူဂီတာကို ခုံခုံမင်မင် တီးတတ်တာရယ်… ထူးအိမ်သင်သီချင်းတွေ အရူးအမူးကြိုက်တတ်တာရယ်။

*****************************

ကျောင်းရှေ့ တိုင်လုံးကြီးတွေ နောက်ခံထားပြီး လွတ်လပ်ပေါ့ပါးစွာ ရယ်မောနေကြတဲ့ ကိုယ်တို့  ၄ ယောက်ရဲ့ ကျောင်းသူဘ၀လွတ်လပ်ခြင်းတွေ အထင်းသား ပေါ်လွင်နေတဲ့ ဓာတ်ပုံလေးပြန်ကြည့် ဖြစ်ရင် အဲဒီလူကြီးကို လွမ်းတတ်တယ်။ (သူငယ်ချင်းတယောက်ရဲ့ ဖြူစင်တဲ့ အလွမ်းနဲ့ ပါ)။ အဲဒီဓာတ်ပုံလေးကို ကိုယ်တို့ နောက်ဆုံးနှစ်က သူရိုက်ပေးခဲ့တာ။

နောက်ဆုံးနှစ်အမှတ်တရ စာအုပ်လေးထုတ်တော့ သူ့ အော်တိုစာမျက်နှာမှာ ကိုယ်က သူ့ အတွက် ကောင်မလေးတယောက်ရှာပေးဖို့  တာဝန်ယူခဲ့တယ်။ ဘာရယ်မဟုတ်ပါဘူး။ ကိုယ့်ဦးလေး လူပျိုကြီးတယောက်အတွက် တူမက ကြင်ယာရှာပေးချင်ရုံသက်သက်ပါ။ ကျောင်းပြီးလို့  အလုပ်ဝင်တဲ့အထိ သင့်တော်တာလေးများတွေ့ ရင် ကိုယ်က သူ့ ကို သတိရနေမိတယ်။

ပြန်တွေ့ တဲ့အခါ သူ့ ဆံပင်အကြီးကြီး ပျောက်သွားတယ်။ အဲဒီဆံပင်အကြီးကြီးကို လွမ်းလိုက်တာ။ ကိုယ် သူ့ ကို စခင်မိတဲ့အထဲမှာ ဆံပင်အကြီးကြီးက စတာမိုလား။ ပြီးတော့ အဆင်ကြီးကြီး အကျီင်္တွေ သူ့ ကိုယ်ပေါ်မှာ မတွေ့ ရပဲ ရှပ်အဖြူလက်ရှည်ကို ပုဆိုးထဲ ထည့်ဝတ်လို့ … ကိုယ့်စိတ်ထဲ အရင်က ကိုယ်တို့ ဦးလေးမဟုတ်တော့သလို… ခပ်စိမ်းစိမ်းနဲ့ ။ လူကြီးအတော်ဆန်သွားတဲ့သူက ကွန်ပြူတာတွေကြားထဲမှာ ပျော်နေခဲ့ချိန်… ကိုယ်ကတော့ ကျောင်းတုန်းက ကလေးဆန်တဲ့အကျင့်တွေ မပျောက်ပဲ ဟိုမရောက်ဒီမရောက်နဲ့  အလုပ်ခွင်မှာ လူကြီးမဖြစ်တဖြစ်။

*****************************

အမှတ်မထင် သူနဲ့ ပြန်ဆုံတဲ့အခါ ရင်ထဲပိုလို့  နွေးထွေးခဲ့မိတယ်။ ကျောင်းကို လွမ်းနာကျနေတဲ့ ကိုယ်က ကျောင်းတုန်းက အရမ်းရင်းနှီးတဲ့ သူ့ ကို ပြန်အတွေ့  စကားတွေ ဖောင်ဖွဲ့ လို့ မကုန်။ အနာဂတ်အကြောင်းတွေလဲ ပြောဖြစ်ကြသေးရဲ့။ ခပ်ဝါးဝါး အနာဂတ်လမ်းတခုပေါ် ကိုယ်တို့  စမ်းတ၀ါးဝါး လျှောက်နေကြတဲ့အချိန်။

တစုံတခုသောအကြောင်းကြောင့် သူနဲ့ ကိုယ် မကြာခဏ ပြန်ဆုံမိခဲ့တယ်။ ဘာရယ်မဟုတ်ပါဘူး။ ညနေရုံးကပြန်ရောက်ချိန်ဆို သူ့ ဖုန်းသံကို ကိုယ်က မျှော်တတ်လာတယ်။ ကိုယ်တကယ် မေ့လျော့နေခဲ့မိတာ။ အရင်က သူဘာကြောင့် ကိုယ့်ဆီ ဖုန်းဆက်ဖို့  သတိမရပဲ ခုမှ နေ့ တိုင်းလိုလို ဖုန်းတွေ ဆက်နေခဲ့ရတာလဲ။ များသောအားဖြင့် ဖုန်းဆက်သူက နားထောင်သူဖြစ်ပြီး… ကိုယ်က ကိုယ့်အကျင့်အတိုင်း စကားတွေဖောင်ဖွဲ့  နေတတ်တာ။ သူ့ ဖုန်းသံတွေ စိတ်လာတော့ မေမေက သံသယစကား တခွန်းပြောခဲ့တယ်။ သံသယ…. ကိုယ်တို့ နှစ်ယောက်ကြားက အဖြူရောင်နံရံတခု ပါးသထက်ပါးလျလာတာ ကိုယ်တကယ် သတိမထားမိခဲ့တာပါ လူကြီးရေ။

*****************************

အဖြူရောင် ဗလာစာရွက်ပေါ်မှာ ခပ်ရှင်းရှင်းရေးထားတဲ့ ကဗျာသိပ်မဆန်လှတဲ့ စာတစောင်ကို အပြန်ပြန် အလှန်လှန် အလွတ်ရတဲ့ အထိ ကိုယ်ဖတ်နေမိခဲ့တယ်။ ဘယ်အရာတခုက ကိုယ်တို့ နှစ်ယောက်ကြားကို ခပ်ဆိတ်ဆိတ်ဝင်လာပြီး ပါးလျနေတဲ့ နံရံပါးပါးကို ဖြိုချခဲ့သလဲ။ ကိုယ့်ရင်ထဲမှာ မေးခွန်းတွေ မေးလိုက်။ အဖြေတွေဖြေလိုက်။ သံယောဇဉ်တွေကို ရေလိုက်နဲ့ ။ တယောက်ထဲ ရူးခဲ့ရတဲ့အချိန်တွေ။

ကိုယ့်နာမည်ကို တိုးတိုးလေးတလုံးထဲ သူခေါ်တဲ့အခါ ကိုယ့်ရင်ထဲမှာ သူ့ ကို ပေးဖို့ အဖြေတခု ဘာကြောင့် အဆင်သင့်ဖြစ်နေခဲ့သလဲ။ ထူးဆန်းလိုက်တာ လူကြီးရေ။ ဆယ်နှစ်လုံးလုံး ကိုယ့်နံဘေးမှာ သူရှိနေတုန်းက ဘယ်မှာ သွားရောက်ခိုပုန်းနေခဲ့တဲ့ အဲဒီအရာက ခုကျမှ ဘာကြောင့် ကိုယ်တို့ နှစ်ယောက်ကြားကို ရုတ်တရက် ရောက်လာခဲ့သလဲ။ သူပေးခဲ့တဲ့ အကောင်လေးတကောင်နဲ့ တူတဲ့ ဘောပင် လိမ္မော်ရောင်လေးကို မသုံးရက်ပဲ တိတ်တိတ်သိမ်းထားမိခဲ့တာ ဘာကြောင့်လဲ။ ကိုယ်တကယ်မသိတော့ဘူးလေ။

*****************************

ကိုယ်က စောင့်ဆို သူက တိတ်တိတ်ဆိတ်ဆိတ် စောင့်နေခဲ့တယ်။ ကိုယ်က လာဆိုမှ သူလှမ်းလာခဲ့တယ်။ သူများ သမီးရီးစားတွေလို ပျော်ရွှင်လွတ်လပ်မှု မရှိတဲ့ ကိုယ်ပေးတဲ့ဘ၀မှာ သူနေသားကျအောင် နေပေးခဲ့တယ်။ ကိုယ်က နေရစ်ခဲ့ဦး ဆိုတော့လဲ သူမတားရက်ပဲ တယောက်ထဲ နေခဲ့တယ်။

တကယ်ဆို ထားရစ်ခဲ့တဲ့ ကိုယ်ကပဲ ရူးမတတ်လွမ်းခဲ့တာ။ ကိုယ်တို့  နှစ်ယောက်ဆုံနေကျ အင်းလျားကန်နံဘေးက သစ်ပင်လေးကို ဘောင်ခတ်ထားတဲ့ ထိုင်ခုံလေး။ အင်းလျားကန်နံဘေးဆိုလို့  ကဗျာဆန်ဆန်လေးမှ မဟုတ်တာ။ ဘယ်သူမှ မသိတဲ့ လူသူရှုပ်ထွေးတဲ့ ကိုယ်တို့ ရုံး အ၀င်ဝက ခုံတန်းလေးပေါ့။ သူနဲ့ ပြန်ဆုံရဦးမှာလား… ပြန်မဆုံရတော့ဘူးလား… ရည်ရွယ်ချက်တွေနောက် လောဘတကြီးလိုက်ခဲ့တဲ့ ကိုယ်က တကိုယ်ကောင်းဆန်သူပါ ချစ်သူရေ။ တခါတခါ ရည်ရွယ်ချက်တွေကို လွှင့်ပစ်ပြီး ကိုယ့်လက်လေးကို ဖွဖွဆုတ်ကိုင်တတ်တဲ့ သူ့ ဆီသာ ထွက်ပြေးလိုက်ချင်မိတယ်။ လွမ်းတယ်မောင်။

*****************************

သူက ချစ်တယ်ဆိုတဲ့ စကားကို တဖွဖွမဆိုတတ်ပေမယ့် အခက်အခဲတွေနဲ့ ရင်ဆိုင်ရရင် မတည်မငြိမ်သွေးပျက်တတ်တဲ့ ကိုယ့်ကို တည်တည်ငြိမ်ငြိမ် လူကြီးဆန်လာအောင် မသိမသာ ပုံသွင်းပေးခဲ့တယ်။ ကိုယ့်ကိုယ်ကို သတိထားမိတဲ့အခါ… သူ့ ကို ကိုယ်အတန်တန် ကျေးဇူးတင်မိတယ်။ သူက ဒါလုပ်လို့  ကိုယ့်ကို ဘယ်တော့မှ အမိန့်  မပေးခဲ့ပေမယ့် လုပ်သင့်လုပ်ထိုက်တဲ့ လမ်းကြောင်းတွေကို ပါးနပ်စွာ ချပြပေးခဲ့တာ ကိုယ်တောင် မရိပ်မိလိုက်ပဲ… ရိပ်မိသိရှိလိုက်တဲ့ အချိန်မှာ ကိုယ်က သူချပြပေးခဲ့တဲ့ လမ်းပေါ်မှာ အတော်တောင် ခရီးရောက်ခဲ့ပြီလေ။

သူ့ ဆီက ရင်ခုန်လှိုက်မောစရာ ကဗျာဆန်ဆန်လက်ဆောင်ဘာတခုမှ မရခဲ့ဘူးပေမယ့်… သူ့ အတွေ့ အကြုံလေးတွေ ဝေမျှရင်း… သူ့ အတွေးအခေါ်လေးတွေ ဖြန့် ဝေရင်း… လောကကြီးကို ရင်ဆိုင်တတ်ဖို့  သူပေးခဲ့တဲ့အင်အားတခုဟာ ကိုယ့်အတွက်တော့ အဖိုးမဖြတ်နိုင်တဲ့ လက်ဆောင်တခုပါပဲ။ သူပေးခဲ့တဲ့ သူပေးနေဆဲဖြစ်တဲ့ သူပေးနေဦးမယ့် အိမ်ထောင်တခုရဲ့ အဆီအနှစ်ဖြစ်တဲ့ လှပတဲ့ သစ္စာတရားနဲ့  အေးမြတဲ့မေတ္တာတရား လက်ဆောင်လေးတွေထက် ကိုယ်က ဘာများလိုအပ်ဦးမှာလဲ။

ဖခင်နဲ့ တူသောခင်ပွန်း…
အကိုနဲ့ တူသောခင်ပွန်း…
သူငယ်ချင်းနဲ့ တူသောခင်ပွန်း…
ကိုယ့်ရဲ့ ချစ်သောမောင်… ဒီမွေးနေ့ မှသည် ချစ်တဲ့ မိသားစုလေးနဲ့ အတူ စိတ်ချမ်းသာ ကိုယ်ကျန်းမာစွာ ငြိမ်းချမ်းစွာနဲ့  မွေးနေပေါင်း ရာထောင်သောင်းတိုင်ပါစေလို့ …။

(25-Oct-2009 မှာ ကျရောက်တဲ့ ချစ်သောခင်ပွန်းမွေးနေ့ အမှတ်တရ)

တန်ခူး
10:26pm 26-Oct-2009

Thursday, October 15, 2009

တ for တန်ခူး

ချစ်မမကြီး မခင်မင်းဇော်က တက်ဂ်ထားတာလေးပါ။ အမှတ်တမဲ့ကြည့်ရင် လွယ်တယ်ထင်ရပေမယ့် တကယ်ရေးကြည့်မှ အတော် ဦးနှောက်စားရပါတယ်။ အမှတ်တရတက်ဂ်ပေးတာ ကျေးဇူးပါ ချစ်မမရေ။

T for Takhu…

1. What is your name : Takhu (တန်ခူးလမှာ မွေးသူမို့ လေ…)

2. A four Letter Word : Time (အချိန်နဲ့ ဒီရေသည် လူကို မစောင့်တဲ့…)

3. A boy's Name : Twitpi (ဟော်လီဝုဒ်မင်းသား မဟုတ်ပါဘူး… မြန်မာပြည်က နာမည်ကျော် တွတ်ပီ)

4. A girl's Name : Tabitha Nauser (Singapore Idol 2009 contestant ပါ… အသက် ၁၇နှစ်ထဲ ရှိသေးတဲ့ လှလဲလှ ချစ်စရာလဲကောင်းတဲ့ ကောင်မလေး… ဒါပေမယ့် လူကြိုက်နဲတာ အံ့သြစရာ… ကိုယ်ကတော့ ကြိုက်တယ်လေ…)

5. An occupation : Teacher (လုပ်ချင်ပြီး မလုပ်ဖြစ်ခဲ့တဲ့ အလုပ်…)

6. A color : Tomato (သားရဲ့ အကြိုက်ဆုံးအရောင်လေ…)

7. Something you'll wear : Tree Bulk (နေ့ တိုင်း သနပ်ခါးမလိမ်းရရင် မနေနုိုင်ပါဘူး…)

8. A food : Tea leaf salad (အကြိုက်ဆုံး… ဘယ်အချိန်ထမေးမေး စားချင်တယ်… ဒါပေမယ့် ကျန်းမာရေး အခြေအနေကြောင့် ဝေးခဲ့ရတာကြာပေါ့လေ…)

9. Something found in the bathroom : Towel ( တဘက်က ရေချိုးရင် မရှိမဖြစ်လေ…)

10. A place : Toa Payoh Buddhist temple ( ဘုရားတရားမမေ့တတ်သူပါ…)

11. A reason for being late : Traffic jam (ဖြစ်နေကျ… မိုးရွာတဲ့နေ့ ဆို ပိုဆိုးသေး…)

12. Something you'd shout : Tell me the truth (လိမ်လွန်းလို့ … သည်းမခံနိုင်ဘူး…ဘယ်သူ့ ပြောလဲ သဘောပေါက်တယ်မိုလား…)

13. A movie title : The Princess Diaries (မင်းသမီးလေးကလဲလှ ဇာတ်ကားလေးကလဲ မြူးမြူးလေးမို့  တီဗွီမှာ လာတိုင်းကြည့်ဖြစ်တယ်… ဘုရင်မကြီးကိုလဲကြိုက်တယ်…)

14. Something you drink : tea (Myanmar) (ရေနွေးကြမ်းကို ဆိုလိုတာပါ…)

15. A musical group : The eagles (မြန်မာသီချင်းတွေအများကြီး ကော်ပီလုပ်ထားလို့ လား မသိဘူး… ကြိုက်တယ်… ရင်းနှီးတယ်…)

16. An animal : Tiger (တင်္နလာကျားလေ… ကိုယ့်နေ့ နံပေါ့…)

17. A street name : TPE (ဘာလို့ လဲ မသိဘူး… အရောက်အပေါက်နဲ လို့ ထင်တယ်… အဲဒီ express way ကသွားရတာပျော်တယ်…)

18. A type of car : Trolly (အမြင့်ကြီးမမှန်းရဲပါဘူး… ကိုယ်ဟာ ဘ၀သမားပါ…)

19. The title of a song : Take me home ( ကာရာအိုကေမှာ အင်္ဂလိပ်သီချင်းဆိုခိုင်းရင် ဒါပဲရလို့  ဆိုရတာလဲ လွယ်လို့  ဆိုနေကျ…)

20. A verb : Try (တနေ့ တလံ ပုဂံဘယ်ရွေ့ မလဲတဲ့… အားမလျော့နဲ့ … ကြိုးစားကြပါစို့ နော်…)

**************
တ for တန်ခူး

1. What is your name : တန်ခူး (တ တမာပင် ရွာအ၀င်…ဟုတ်ပါဘူး…တ တန်ခူး ဘလော့ရူး… ဟိဟိ…)

2. A four Letter Word : တောက်တီးတောက်တဲ့ (ကောင်းကောင်းပြောပါ…အဲလိုတွေ လျှောက်မပြောနဲ့ … မကြိုက်ဘူး…)

3. A boy's Name : တွတ်ပီ (သိပ်ပေါ်ပြူလာဖြစ်တဲ့ကောင်ကလေး…)

4. A girl's Name : တင်ဇာမော် (girl တော့ မဟုတ်တော့ပါဘူး… အကြိုက်ဆုံးအဆိုတော်ထဲက တယောက်…)

5. An occupation : တူရိယာပညာရှင်( တကယ်တော့ ၀ါးလက်ခုပ်တောင် ဖြစ်မြောက်အောင် မတီးတတ်ပါဘူး… စန္ဒယားလေးတီးပြီး မာမာအေး သီချင်းလေးတွေ ညည်းချင်ရုံသက်သက်ပါ…)

6. A color : တောက်တောက်ခါးခါး ( ထင်ပေါ်အောင်လို့ လေ… မယုံပါနဲ့ … တထည်မှ မရှိပါဘူး…)

7. Something you'll wear : တရုတ်ပိတ် (RIT ပထမနှစ်၊ ဒုတိယနှစ်တုန်းက သိပ်ပေါ်ပြူလာဖြစ်ခဲ့တာပေါ့… အဆင်နုတ်နုတ်လေးတွေဆို ခုထိချစ်တုန်း…)

8. A food : တို့ ဘူးသုတ် (အထမ်းသည်တို့  မှောင်မှောင်သည်တို့ ရောင်းတာဆို ပိုကြိုက်တယ်…)

9. Something found in the bathroom : တစ်ရှုးပေပါ (အိမ်သာနဲ့ ရေချိူးခန်းတွဲလျက်မို့ ပါ…)

10. A place : တောင်ကြီး (ဒီတခေါက်ပြန်ရင်သွားချင်တာ… မရောက်တာကြာပြီလေ…)

11. A reason for being late : တိုးရကြိတ်ရ(saleဆိုသွားလိုက်တာ တိုးနေကြိတ်နေတာနဲ့  အိမ်ပြန်နောက်ကျသွားတယ်… မဆူနဲ့ နော်…)

12. Something you'd shout : တော်တန်တိတ် (ဆက်မပြောပါနဲ့ တော့… နားထောင်ဖို့  စွမ်းအားကို မရှိလို့ ပါ… ဘယ်သူ့ ကို ပြောတာလဲ…သဘောပေါက်)

13. A movie title : တခါကတဘ၀(ခင်သီတာထွန်း ဆံပင်စင်းစင်းလေးနဲ့ သိပ်လှတဲ့ကား… ကြည့်ဖူးလား…)

14. Something you drink : တွင်းရေ (အိမ်ပြန်ရောက်ရင် တွင်းရေလေးသောက်လိုက်ရတာကိုက အရသာတမျိူး… ရေကို အနံ့ အရသာမရှိဘူးလို့ ဘယ်သူပြောလဲ… တွင်းရေလေးက အေးပြီးချိူမြနေတာ…)

15. A musical group : တယောကိုတင်ရီ (ဟိဟိ… တ၀မ်းပူနဲ့  စတာ ဒါပဲ စဉ်းစားလို့ ရတယ်… အမှန်ပြောရရင် တယောကို သိပ်မခံစားတတ်ဘူး)

16. An animal : တောက်တဲ့…ဟုတ်ပါဘူး… တစ်တီတူး…ဒါလဲမကောင်းဖူး… တီကောင်… ဟင်း…ပိုတောင်ဆိုးသေး (ဘယ်လိုလုပ်ရပါ့…)

17. A street name : တက္ကသိုလ်ရိပ်သာလမ်း (ရင်ထဲ အမြဲရှိတဲ့ လမ်းကလေးပါ…)

18. A type of car : တက်စီ (အချိန်လုရတဲ့အခါ နှမျောမျောနဲ့ စီးရတဲ့ ကားပေါ့…)

19. The title of a song : တက္ကသိုလ်ကျောင်းက ငွေလမင်း (ချိုပြုံးဆိုတာ အကြိုက်ဆုံး… ဘာလို့ လဲ မသိဘူး နားထောင်မိတိုင်း ငိုချင်တယ်…)

20. A verb : တိုးတက်အောင်ကြံဆောင် (အဟဲ…အဆုံးပိတ်လေးကို တည်တည်တံ့တံ့နဲ့  ပိတ်လိုက်တာ…)

ဆက်တက်ဂ်ချင်သူများကတော့

၁) ညီမလေး ကေ ( ကကြီးက ရေးလို့ ကောင်းမယ် ထင်လို့ ပါ… တက်ဂ်တာ တက်ဂ်ရတာ စိန်ပန်းနဲ့ ကံ့ကော် အဆက်ပြတ်သွားရင် ဒုက္ခ… နှစ်မျိုးလုံးပြိုင်တူရေးနော်… နှိပ်စက်တာ ဟုတ်ဘူးနော်)
၂) ညီမလေး မိုမိချီ ( ဒီနာမည်အသစ်လေးနဲ့  တခါမှ မတက်ဂ်ဖူးလို့ )
၃) ညီမလေး ခွန်မြလှိုင် ( ပိုကြူးလေးအတွက် ဖတ်စာလေးကို ကြိုက်သွားလို့ လှိုင်ရေ)
၎) မောင်လေး ရွာသားလေး (Y က ခက်မယ်ဆိုတာတော့ သိပါတယ်… နှိပ်စက်တယ်လို့  မထင်ပါနဲ့ နော်)
၅) မောင်လေးပုလုကွေး ( Pကလဲ လွယ်မယ်… ပ ကလဲ လွယ်မယ်… တခါမှ မတက်ဂ်ဘူးလို့  လွယ်လွယ်လေးနဲ့  စတက်ဂ်လိုက်တယ် ပုလုရေ)

ပျော်စရာလေးမို့  ရေးပေးကြပါနော်… ကျေးဇူးတင်ပါတယ်။

တန်ခူး
9:50am 15-Oct-2009

Tuesday, October 13, 2009

ပိန္နဲစေ့ဟင်း

ပိတ်ရက် ဈေးသွားရင် သမားရိုးကျဟင်းတွေ ချက်ရတာ ငြီးငွေ့ လို့  ဘာလေးများ ထူးထူးဆန်းဆန်း ရှိမလဲလို့  မျက်စိကစားတတ်တာ ကျွန်မအကျင့်။ ပြီးခဲ့တဲ့အပတ်က ဈေးရောက်တော့ ပိန္နဲမွှာ အကြီးကြီးတွေ တွေ့ တာနဲ့  ပိန္နဲစေ့ဟင်း ချက်စားဖို့  သွားသတိရပါတယ်။ ထမင်းမြိန်တဲ့ ဟင်းတခွက်ဖြစ်တဲ့ အပြင် သက်သက်လွတ်စားသူများ အတွက်လဲ သက်သက်လွတ်ချက်လို့  ရတာမို့  ဘလော့ရောင်းရင်းတို့ အတွက် ဝေမျှလိုက်ပါတယ်။

ပိန္နဲစေ့ဟင်းကို ကျွန်မကို မိတ်ဆက်ပေးခဲ့တာ RITတုန်းက တွဲခဲ့တဲ့ သူငယ်ချင်း ရခိုင်မလေးပါ။ သူတို့ အိမ်မှာ ထမင်းသွားစားရင်းနဲ့  ပိန္နဲစေ့ဟင်းကို အစွဲကြီးစွဲခဲ့ရတာပါ။ အဲဒီတုန်းက ခုလို အစာအိမ်ရောဂါမရှိသေးတော့ ပိန္နဲစေ့ဟင်းခပ်ပြင်းပြင်းလေးကို ငရုတ်သီးငါးခြောက်ကျော် စပ်စပ်လေးနဲ့  တရှုးရှုး တရှဲရှဲ ဖြစ်အောင် စားရတာများ ခုပြန်တွေးတောင် အရသာရှိတုန်း။ ခုတော့ ပိန္နဲစေ့ဟင်းစားချင်ရင် အချိုချက်ပဲ ချက်စားဖြစ်ပါတော့တယ်။ ပေါက်ပေါက်ရှာရှာ သိပ်မစားတတ်တဲ့ ကျွန်မခင်ပွန်းတောင် ခံတွင်းတွေ့ တဲ့ဟင်းမို့  ဘလော့ရောင်းရင်းတို့ လဲ နှစ်သက်လိမ့်မယ်လို့  မျှော်လင့်မိပါတယ်။

တကယ်တော့ ပိန္နဲစေ့ဟင်းက သာမာန်ဟင်းတွေလိုပဲ လွယ်လွယ်ကူကူ ချက်လို့ ရတဲ့ ဟင်းပါ။ လိုအပ်တဲ့ ပစ္စည်းတွေကတော့ ပိန္နဲမွှာ၊ ကြက်သွန်နီ၊ ကြက်သွန်ဖြူ၊ ဆီ၊ ဆား (သက်သက်လွတ်အတွက် ဆား၊ အချိုချက်အတွက် ငံပြာရည်၊ အစပ်ချက်အတွက် ငါးပိ)၊ နှမ်း၊ အစပ်ချက်အတွက် ငရုတ်သီးစိမ်း ၄ ၅ တောင့်ပါပဲ။

ပိန္နဲမွှာထဲက ပိန္နဲစေ့လေးတွေ ထုတ်ပြီး ရေစင်အောင် ဆေးပါ။ ပြီးတော့ ဆားအနည်းငယ်ထည့်ပြီး နူးသည်အထိပြုတ်ပါ။ အရမ်းပျော့အောင် မထားရပါဘူး။ နူးတဲ့အခါ အခွံကြည်လေးတွေ နွှာပြီး နှစ်ခြမ်းခွဲပါ။



အသင့်ထောင်းထားတဲ့ ကြက်သွန်ဖြူနီကို ထုံးစံအတိုင်း နနွင်းမှုန့် ၊ အရောင်တင်မှုန့် ထည့်ပြီး ဆီသတ်ပါ၊ အစပ်ချက်အတွက်ဆို အသင့်ထောင်းထားတဲ့ ငရုတ်သီးစိမ်းလေးတွေပါ ထည့်ဆီသတ်ရပါမယ်။ ကြက်သွန်ညှိးပြီး မွှေးလာတဲ့အခါ ငံပြာရည်(သို့ ) ဆားအနည်းငယ် (အစပ်ချက်အတွက်ဆို ငါးပိ) ထည့်ပေးပြီး ခဏမွှေပါ။ ပြီးတဲ့အခါ ပိန္နဲစေ့လေးတွေ ထည့်ပြီး လုံးပါ၊ ၅မိနစ်လောက်လုံးပြီး ရေအနည်းငယ်ထည့်ပြီး ရေခမ်းခါနီးအထိ ပွက်ပါစေ။





ရေခမ်းခါနီးမှာ နှမ်းလေးတွေ ဖြူးထည့်ရပါမယ်။ ပြီးတော့ နှမ်းလေးတွေ နှံ့ သွားအောင် မွှေပေးပါ။ နှမ်းနဲ့  ပိန္နဲစေ့လေးတွေ ခပ်ထွေးထွေးဖြစ်သွားတဲ့အခါ ချလို့ ရပါပြီ။ အစပ်ချက်အတွက်ဆို ဆီသတ်တုန်းက ဆီလျှော့ထည့်ပြီး အရည်စပ်စပ်လေးနဲ့ ချရင် ပိုစားကောင်းပါတယ်။








တွဲဖက်စားလို့ ကောင်းတဲ့ဟင်းကတော့ အာဗြဲခြောက်ကျော် ကြွတ်ကြွတ်လေးနဲ့ ပေါ့။ ပိန္နဲသီးများ လွယ်လွယ်ကူကူ ၀ယ်လို့ ရခဲ့ရင် စမ်းကြည့်ပါလားမိတ်ဆွေ။ ထမင်းမြိန်မှာ အာမခံတယ်ဗျို့ ။

တန်ခူး
9:38pm 13-Oct-2009

Wednesday, October 7, 2009

မေ့တတ်သူ

သားတို့ ကျောင်းက lost and found ကောင်တာလေးမှာ ခြေအိတ်သေးသေးလေးတွေ၊ ဘောင်းဘီသေးသေးလေးတွေ၊ ကလစ်လေးတွေ တွေ့ တော့ ကျွန်မပြုံးမိပါတယ်။ ကလေးလေးတွေဆိုတော့ ဘယ်ကိုယ့်ပစ္စည်းကို သေချာ ထိန်းသိမ်းတတ်ဦးမလဲ။ ကျွန်မဆို အသက်တော်တော်ကြီး တက္ကသိုလ်ရောက်တဲ့အထိ ပျောက်လို့ ကောင်းနေတုန်းလေ။

ကျွန်မငယ်ငယ် မှတ်မှတ်ရရ ၃တန်းတုန်းကပေါ့။ အမေက ငယ်ငယ်လေး ကတည်းက အောက်က ဘလောက်စ်အဖြူလေးဝတ်၊ ပြီးရင် အပေါ်က အစိမ်းရောင် ဂါဝန်လက်ပြတ်လေး ထပ်ဝတ်… အဲဒါမျိုးလေးဆင်ပါတယ်။ ကျွန်မတို့ ခေတ်တုန်းက ဘယ်ဝတ်စုံဘယ်လိုပုံဆို သတ်မှတ်မထားပါဘူး။ အဖြူအစိမ်းဖြစ်ရင်ပြီးရော… ၆တန်းရောက်မှ ရင်ဖုန်းနဲ့ ထမီဝတ်ရတာပါ။ ၃ တန်းရောက်တော့ သူများတွေ စကတ်ဝတ်တာ အားကျတာနဲ့  အမေ့ကို ပူဆာပါတယ်။ အမေကလဲ အဖြူရောင်လက်ဖောင်းအကျီင်္လေးနဲ့  စကတ်ကားကားအစိမ်းရောင်လေး ၀ယ်ပေးတယ်။ တခါမှ စကတ်မ၀တ်ဖူးတော့ အရမ်းပျော်ရွှင်စွာနဲ့  ၀တ်သွားတာပေါ့။ ပြဿနာက ညနေကျောင်းဆင်းချိန်မှာ စတာပါ။ ညနေကျောင်းဆင်းချိန်ဆို ငုဝါပင်ကြီးအောက် လွယ်အိတ်ကို ပစ်ချ၊ အိမ်က လာမကြိုမချင်း ဆော့တတ်တဲ့ ကျွန်မ… စကတ်ကြီး တခါမှ မ၀တ်ဖူးတော့ စိတ်ထဲ ပြေးရလွှားရတာ မလွတ်လပ်ဖူးဆိုပြီး စကတ်ကိုချွတ် လွယ်အိတ်ပေါ်တင်၊ အောက်ခံဘောင်းဘီလေးနဲ့ အကျီင်္အဖြူလေးနဲ့  အားရပါးရပြေးလွှားဆော့တော့တာပါပဲ။ ဦးလေးလာကြိုတော့ လွယ်အိတ်လေးလွယ် ခပ်တည်တည်နဲ့  လိုက်မလို့  လုပ်တုန်း ဦးလေးက စကတ်ဘယ်မှာလဲဆိုမှ သတိရပါတော့တယ်။ ကျွန်မစကတ်မရှိတော့ပါဘူး။ အဲဒီပုံစံလေးအတိုင်း အိမ်ရောက်အောင်ပြန်ခဲ့ရပါတယ်။ အိမ်ရောက်တော့ စကတ်ဗလာနဲ့ ကျွန်မကို အမေက ဆူပြီး ဒဏ်ပေးတဲ့ အနေနဲ့  ၅တန်းအထိ စကတ်လုံးဝ ၀ယ်မပေးတော့ပါဘူး။ အဲဒီအဖြစ်ကတော့ မေ့တတ်တဲ့ ကျွန်မရာဇ၀င်တွင်တဲ့ အဖြစ်မို့  ဒီနေ့ ထက်ထိ သတိရတိုင်း အမေက ပြန်ပြောပြတတ်ပါတယ်။

သူများတွေများ ငယ်ငယ်လေး ကတည်းက ပစ္စည်းလေးတွေ ထိန်းသိမ်းတတ်လိုက်ကြတာ။ ကျွန်မညီမလေးက အစပါ။ ကျွန်မကတော့ မော့မော့ မော့မော့နဲ့ ။ လသာ၂တုန်းက ညနေကျောင်းဆင်းချိန် မဟာလှေခါးက ကျပ်ကျပ်သပ်သပ် ဆင်းတဲ့အခါ ခဏခဏ ပျောက်တတ်ပါတယ်။ နှစ်ထပ်ကွန်ဗာဘူးလှလှလေး ၀ယ်ပေးလိုက် တနေ့ မခံပါဘူး။ မနက်ကယူသွား ညနေပြန်ပါမလာတော့ဘူးလေ။ ဒါကြောင့် သူများတွေလို စာရေးကိရိယာ လှလှလေးတွေ ကျွန်မဆီမှာ မရှိပါဘူး။ မပျောက်တဲ့ သံကွန်ဗာဘူးပဲ ကိုင်ရပါတယ်။ အရောင်စုံတဲ့ ထီးလှလှလေးလဲ တပတ်လောက်သာခံပြီး ပျောက်တာပါပဲ။ ဒီတော့ မိုးကာအကျီ်နဲ့  စခန်းသွားရတော့တာပေ့ါ။

မျက်မှန်စတပ်ရတော့ မျက်မှန်နဲ့ မလိုက်တဲ့ ကိုယ့်ရုပ်ကြီး စိတ်ပျက်လွန်းလို့  ကျောက်သင်ပုန်းပေါ်က စာကြည့်ချိန်ကလွဲရင် ကျန်တဲ့အချိန် မတပ်ပါဘူး။ အဖေက အမြဲမတပ်ရင် ပါဝါတိုးမယ်ပြောလဲ အဖေ့ရှေ့ တပ်ပြီး ကွယ်ရာမှာ ဖြုတ်ထားတတ်ပါတယ်။ ရ တန်း စာမေးပွဲ သင်္ချာဖြေပြီးတော့ မျက်မှန်ကြီး စာသင်ခုံထဲမေ့ကျန်ခဲ့တော့ မျက်မှန်မတပ်ပဲနေတာ မိပါလေရော။ စာမေးပွဲတွင်းကြီး ချက်ချင်းမျက်မှန်ပြေးလုပ်ရတာမို့  အဖေအတော်ဒေါသထွက်ခဲ့တာပါ။ အဲဒီလို ခဏခဏပျောက်လဲ ကျွန်မက အမှတ်သညာနဲတုန်းပါပဲ။ RIT ရောက်တော့လဲ ပျောက်ကောင်းတုန်း။ ဒါကြောင့်လဲ သူများတွေ ကျောင်းသားကဒ်ဖြူဖြူလေးကိုင်နေချိန်မှာ ကျွန်မ ကျောင်းသားကဒ်က အညိုရောင်စာရွက်ကြီးပါ။ ပထမတခါ ပျောက်တုန်းက အဖြူရောင်လေးပြန်ပေးပေမယ့် ဒုတိယတကြိမ်ကျတော့ ကျောင်းသားရေးရာက မေ့တတ်လွန်းတဲ့ ကျွန်မကို အညိုရောင် စာရွက်ကြီးနဲ့ သာ တန်တယ်လို့  ဆုံးဖြတ်ချက်ချပြီး ဒဏ်ခတ်ခဲ့တာပေါ့။ အဲဒီအညိုရောင် စာရွက်ကြီးတောင် ထပ်ပျောက်တော့… အင်း… သူတို့ ဆုံးဖြတ်တာမှန်ပါသည်ပေါ့။

တခါမျက်မှန်ပျောက်တာလဲ မမှတ်ပါဘူး။ ဒုတိယနှစ်စာမေးပွဲတွင်းကြီး မျက်မှန်တခါထပ်ပျောက်ပါသေးတယ်။ သတိရတဲ့အချိန်က ညကြီးမှ။ ဘယ်လိုမှ မျက်မှန်ပြန်လုပ်ဖို့  အချိန်မရတော့တာမို့  ညကြီးမင်းကြီး RITကို ပြန်သွားရပါတယ်။ အစောင့်ဦးလေးကြီးကို ရှင်းပြပြီး စာမေးပွဲခန်းထဲ မျက်မှန်ရှာပုံတော်ဖွင့်ရပါတယ်။ ကံကောင်းတော့ မျက်မှန်လေးက ဘယ်မှလျှောက်မသွားပဲ သူ့ သခင်လာခေါ်တာကို စောင့်နေခဲ့ပါတယ်။ ကျွန်မရဲ့ မေ့တတ်တဲ့ ဇာတ်လမ်း အဲဒီမှာ တခန်းရပ်ခဲ့တာပါ။ အဖေဆုံးမတဲ့ စကားကို တသက်လုံးစွဲအောင် မှတ်ခဲ့လို့ ပါပဲ။ “ခဏခဏပြန်ပြန်ဖြစ်တတ်တယ်ဆိုတာ အမှတ်သညာ မထားလို့ … ကိုယ်ကမေ့တတ်ရင် ထ သွား ပြန် ကြည့် အကျင့်ကိုလုပ်… ကျင့်ခါစတော့ ပျောက်နေဦးမှာပဲ… နောက်ပိုင်း အကျင့်ပါသွားတော့ အားစိုက်စရာမလို သူ့ အလိုလို သတိထားမိသွားတာပဲ… ဒီအသက်အရွယ်အထိ သတိတရားမရှိတာ ရှက်ဖို့ ကောင်းတယ်…” ။ အဲဒီနေ့ က မေ့တတ်ပျောက်တတ်တာနဲ့  ပတ်သက်ပြီး စရှက်တတ်တဲ့နေ့ ပါ။ ပြီးတော့ စာကျက်ရမယ့်အချိန်မှာ ပေါ့ဆမှုကြောင့် အချိန်တွေ ဆုံးရှုံးသွားတာလဲ ယူကျူံးမရ နှမျောမိခဲ့တယ်။ အဲဒီနောက် ကျွန်မပစ္စည်းမပျောက်တော့ပါဘူး။

အသက်အရွယ်ငယ်လို့  မထိန်းသိမ်းတတ်တာနဲ့  အသက်အရွယ်ကြီးလို့  မေ့တတ်တာက လွဲရင်.. ကြားအရွယ်မေ့တတ်တဲ့ ရောဂါက ကုစားလို့ ရတာ ကိုယ်တွေ့ ပါ။ ပျက်အစဉ်ပြင်ခဏဆိုသလို ပြင်လိုက်တဲ့နေ့ က မပျက်တော့တဲ့ နေ့ ပါပဲ။ မေ့ချင်ယောင်ဆောင်တာက လွဲလို့ ပေါ့နော်။

(စာကြွင်း: ခုတလော ဘလော့ပေါ်အရောက်အပေါက်နဲနေတာ ခွင့်လွှတ်ပါနော်… မေ့နေလို့ မဟုတ်ပါဘူး… ရင်ထဲမှာ အမြဲရှိနေပါတယ်… အထူးသဖြင့် ဖတ်နေကျ ဘလော့လေးတွေကို အရမ်းလွမ်းမိတယ်… မိတ်ဆွေအသစ်လေးတွေ လာလည်တာတွေ့ ရတော့ ၀မ်းသာမိတယ်… သူတို့ အိမ်လေးတွေလဲ သွားလည်ဖြစ်အောင် လည်ပါမယ်… ခု ရုံးမှာ ပရောဂျက်အသစ်ပြီးသွားတော့ နဲနဲအသက်ရှုပြန်ချောင်နေပါပြီ။ ပုံမှန်ပြန်ရေးဖြစ်အောင် ကြိုးစားပါမယ်… ပြီးတော့… အိမ်ပြောင်းသွားတဲ့မိတ်ဆွေဟောင်းတွေရဲ့ ဘလော့လိပ်စာအသစ်တွေနဲ့  မိတ်ဆွေသစ်တွေရဲ့ ဘလော့လိပ်စာလေးတွေလဲ တင်ပါ့မယ်… နဲနဲဟောင်းနေတဲ့ အင်္ကျီလေးလဲ လဲပါဦးမယ်… လာလည်ကြသူများအားလုံး ကျေးဇူးပါ)

တန်ခူး
10:37am 7-Oct-2009

Friday, September 25, 2009

ကျွန်မနဲ့ အားကစား

မနေ့ က ကျွန်မတို့ ရုံးက မိခင်ရုံးနဲ့  အေရိုးဗစ်ပြိုင်ပွဲ လုပ်ဖြစ်တယ်။ ပထမတော့ လုပ်ဖော်ကိုင်ဖက် ကောင်လေးက လူမရှိလို့  ငိုမလို ရယ်မလို အတင်းဆွဲခေါ်တာနဲ့  မလုပ်ဖြစ်တာ အတော်ကြာတဲ့ အေရိုးဗစ်ကို တရက်လောက့် ပြန်မြည်းစမ်းကြည့်ဦးမှဆို ပါသွားခဲ့တာပါ။ နောက်မှ ဒီပြိုင်ပွဲက ရေရှည် ပုံမှန်ပြိုင်ပွဲဆိုတာ သိလိုက်ရတော့ ဆက်လုပ်ရမလို ထွက်ရမလိုနဲ့  အပျင်းရေချိန်တွေ မြင့်သထက်မြင့်လာပါတယ်။ ကျွန်မနဲ့  အားကစား… သူစိမ်းပြင်ပြင် ရှိခဲ့တာ ကြာခဲ့ပြီလေ။

ငယ်ငယ်တုန်းက ငြိမ်ငြိမ်နေရရင် ခေါင်းကိုက်တဲ့ အထဲပါခဲ့တာမို့  အားကစားရယ်လို့  သတ်သတ်မှတ်မှတ် မဟုတ်ပေမယ့် ပြေးလွှားလှုပ်ရှား ဆော့ကစားတဲ့ အချိန်က နေ့ တိုင်းပုံမှန်ဖြစ်နေတတ်ပါတယ်။ ကျောင်းပိတ်ချိန်ဆို တနေတောင်ကုန်ရော။ စဉ်းစားကြည့်တော့ မြန်မာကစားနည်း တော်တော်များများကလဲ လှုပ်ရှားမှုတွေ အများသား။ ထုတ်ဆီးတိုး၊ စိန်ပြေးတမ်း၊ ခို၊ ကျောက်ရုပ်ကျောက်ပျက်၊ ဒီ၊ ကုန်းလားရေလား… များသောအားဖြင့် ပြေးလွှားလှုပ်ရှားရတဲ့ ကစားနည်းတွေမိုလား။ ဒါကြောင့်လဲ သူ့ အလိုလို ကျန်းမာရေးနဲ့ ညီညွတ်ပြီး ဆေးခန်း၊ဆေးရုံ အရောက်အပေါက်နည်းခဲ့တာ ထင်ပါတယ်။ အနည်းဆုံး ကိုယ့်ခြံလေးထဲကိုယ် ဆင်းဆော့ဦး လှုပ်ရှားမှုကတော့ ရှိတာပါပဲ။ တခါတခါ ကိုယ်ငယ်ငယ်ကနဲ့  သားလေးကို ယှဉ်တွေးမိရင် စိတ်မကောင်းပါဘူး။ အခန်းကျဉ်းလေးထဲ လှုပ်ရှားမှုနည်းနည်ဲးနဲ့  သက်မဲ့ အရုပ်တွေနဲ့ သာ အဖော်ပြုနေရတာမိုလား။ ကစားကွင်းသွားလို့ ရပေမယ့်လဲ ကျွန်မတို့  ငယ်ငယ်ကလို အိမ်ရှေ့ ထွက်တာနဲ့  ကစားဖြစ်တာမျိုးမဟုတ်ဘူးလေ။ ဒါကြောင့်လဲ ဒီကကလေးတွေ ခဏခဏနေမကောင်းဖြစ်ကြတာ ထင်ပါရဲ့။

ငယ်ငယ်က အဆော့သန်တဲ့ ကျွန်မ အားကစားရယ်လို့  ထူးပြီးလေ့ကျင့်စရာမလို သူ့ အလိုလို အပြေးတွေက သန်နေတတ်ပါတယ်။ နိုင်ချင်တဲ့စိတ်တွေလဲ ပါတာပေါ့လေ။ ဒါကြောင့် ရပ်ကွက်ထဲက လွတ်လပ်ရေးပွဲဆို ဆုတွေဘာတွေ ရရလာတတ်ပါတယ်။ များသောအားဖြင့် အပြေးပြိုင်ပွဲတွေမှာပါ။ လူရည်ချွန်ဖြေရတော့မှ အားကစားကို စနစ်တကျ လုပ်တတ်လာခဲ့ပါတယ်။ သူများတွေ စောစောစီးစီးကွေးလို့ ကောင်းနေတဲ့ ဆောင်းမနက်တွေမှာ အပြေးလေ့ကျင့်လိုက်ရတာ။ ရပ်ကွက်လက်ရွေးစင် ဘောလုံးသမား အကိုကြီးက တာတိုပြေးရင်ဘယ်လို၊ တာရှည်ပြေးရင် ဘယ်လို အနီးကပ် လေ့ကျင့်ပေးခဲ့ပါတယ်။ မေမေကတော့ သိုးမွှေးဦးထုပ်လေးဝတ်၊ အနွေးထည်ပေါ်က လျှောတဘက်တထပ်ခြုံနဲ့  လက်မှာ နာရီလေးကိုင်ပြီး ကျွန်မ စံချိန်ကို မှတ်ပေးတတ်သူပါ။ အပြေးလေ့ကျင့်ပြီး အိမ်ပြန်ရောက်တာနဲ့  ကုတင်ခြေရင်းက တန်းမှာ ခြေထောက်ကို အဖေ့ပုဆိုးနဲ့  ချည်ပြီး အိပ်ထမတင် လေ့ကျင့်ရပါတယ်။ အိပ်ထမတင်က လုပ်နေမကျရင် ခြေထောက်ကြီး မိုးပေါ်ပြန်တတ်တာမို့ ပါ။ ပြီးရင် ကုတင်ကို လက်ထောက် ဒိုက်ထိုးကျင့်ရပါသေးတယ်။ လူရည်ချွန်ဖြေတာ ဗဟုသုတကျက်ရင် အပျင်းကြီးတဲ့ကျွန်မ အားကစားဆို ဘယ်တော့မှ မငြီးတတ်ပါဘူး။ ရ တန်းကနေ ၁၀ တန်းထိ အားကစားရယ်လို့  သတ်သတ်မှတ်မှတ် လေ့ကျင့်ဖြစ်ခဲ့တာ လူရည်ချွန် စာမေးပွဲနားနီးချိန်တွေပဲ ရှိပါတယ်။

တက္ကသိုလ်ရောက်တော့ အဖေမကြိုက်တဲ့ တက္ကသိုလ်မို့  ဘာလှုပ်ရှားမှုမှာမှ ပါခွင့်မရခဲ့ပါဘူး။ သူငယ်ချင်းတွေ အားကစားလေ့ကျင့်ကြရင် ပါးစပ်လေးအဟောင်းသားနဲ့  ငေးရုံပါပဲ။ လူက အရွယ်ရောက်လာတော့ အရင်ကလို ရပ်ကွက်ထဲလဲ ပြေးလွှားဆော့လို့  မသင့်တော်။ တခါတလေ ကြက်တောင်လေးရိုက်တာ လွဲလို့  အားကစားက ဟိုးအဝေးမှာပါ။ အရေးအခင်း ၃နှစ်ပိတ်တော့ အားကစားက ကျွန်မဆီ အလည်တခေါက်ပြန်ရောက်ခဲ့ပါရော။ ကျောင်းတွေပိတ်တော့ ရှိသမျှသင်တန်းတွေ စုံနေအောင် တက်ဖြစ်ခဲ့တယ်။ ဒီအထဲ အေရိုးဗစ်ကလဲ ပါတာပေ့ါ။ ဘယ်နေလိမ့်မလဲ။ တီးလုံးလေးနဲ့  ခပ်သွက်သွက်လေး ကစားရတာမို့  ကျွန်မက သိပ်သဘောကျ။ သင်တန်းတက်ရုံတင် မကပဲ အိမ်မှာ သင်တန်းပြန်ပေးဖြစ်ပါတယ်။ ကျောင်းတွေပိတ်တော့ အိမ်မှာ အားနေကြတဲ့ ရပ်ကွက်ထဲက ကောင်မလေးတွေ စုရပ်က ကျွန်မတို့ အိမ်ဖြစ်လာခဲ့ပါတယ်။ ကျွန်မဆီမှာ သိုးမွှေးထိုး လာသင်ကြ၊ အေရိုးဗစ်လာသင်ကြနဲ့  မိန်းခလေးအုပ်ကြီး အိမ်မှာ တရုံးရုံး။ မုန့် တွေ အမျိုးမျိုးလုပ်စားကြ၊ ဖျာလိပ်နတ်မေးကြ၊ အလှဓာတ်ပုံတွေ စုရိုက်ကြနဲ့ … အတော်ပျော်စရာကောင်းခဲ့ပါတယ်။

အဲဒီတုန်းက ကျွန်မရဲ့ သင်တန်းသူတွေထဲမှာ များသောအားဖြင့်က ခေတ်ပေါ်အေရိုးဗစ်ကို မြည်းစမ်းချင်သူတွေဖြစ်ပေမယ့် တချို့ ကတော့ တကယ့်ကို ၀ိတ်ကျချင်လို့  လေးလေးနက်နက် လာကစားသူတွေ ရှိပါတယ်။ ကျွန်မသင်တန်းချိန်က အပျော်ကစားချင်သူနဲ့  အလေးအနက် သေချာကစားချင်သူဆို ၂ချိန်ခွဲသင်ခဲ့ပါတယ်။ တက္ကသိုလ်က ဆရာမတယောက်ကတော့ ကျောင်းတွေ ပြန်ဖွင့်ရင် သူငယ်ချင်းတွေက ဟာကနဲ ဖြစ်သွားအောင် သူ့ ရဲ့မလိုအပ်တဲ့အဆီတွေ ကုန်နေအောင် ချပစ်ချင်ပါသတဲ့။ ဆရာမဖြစ်ပေမယ့် အဲဒီအဆီတွေကြောင့် မြန်မာအကျီင်္ခါးတိုလှလှလေးတွေ ၀တ်မရတာလဲ အတော်ကို စိတ်မကောင်းဖြစ်နေသူပါ။ သူ့ စိတ်က ပြင်းထန်တာကြောင့် ကြိုးကြိုးစားစားလေ့ကျင့်တာ တလအတွင်း ၀ိတ်က သိသိသာသာ ကျသွားခဲ့ပါတယ်။ အေရိုးဗစ်ဆရာမ ကျွန်မကတော့ တနေ့ ကို သင်တန်း ၃ကြိမ် ၁လခွဲလောက် ကစားပြီး အားတွေ အရမ်းနည်းတာကြောင့် ဒရစ်တွေဘာတွေ သွင်းရတဲ့အဖြစ်ကို ရောက်သွားခဲ့ပါတယ်။ လိုတာထက်ပိုပြီး ကစားတာကြောင့်ပါ။ အဖေက ဆက်ခွင့်မပြုတာကြောင့် သင်တန်းတွေလဲ ရပ်လိုက်ရပါတယ်။ နောက် ၃ ၄ လလောက်မှာ ကျွန်မသင်တန်းသူ ဆရာမကို ပြန်တွေ့ တော့ ကျွန်မတောင် မမှတ်မိလောက်အောင် အရမ်းလှပတဲ့ ကိုယ်လုံးလေးနဲ့ ဖြစ်နေပါပြီ။ အိမ်မှာ ပုံမှန်ဆက်လုပ်ဖြစ်တာတဲ့။ ပြီးရင် ကျွန်မကို ကျေးဇူးတင်ကြောင်းတွေပြောပြီး သူဝတ်ထားတဲ့ မြန်မာအင်္ကျီခါးတိုလေးကို ၀မ်းသာအားရပြပါတယ်။ ဘယ်လောက်ကောင်းတဲ့ အကျိုးလဲနော်။ ကျန်းမာရေးနဲ့ လဲညီညွတ် လှလဲလှ။ ဒါတွေသိပေမယ့်လဲ ဟိုအကြောင်းပြ ဒီအကြောင်းပြနဲ့  အဲဒီကစလို့  အားကစားက ကျွန်မနဲ့ ဝေးသွားခဲ့တာ မနေ့ ကအထိပါပဲ။

လူကလဲ အဆီတွေ တရစ်ပြီးတရစ်တက် အကျီင်္လှလှလေးတွေနဲ့ လဲ ဝေးသထက်ဝေးလို့ ပေါ့။ အားကစားလုပ်ဖို့  တိုက်တွန်းလာရင် ထွက်ပေါက်တွေ ကိုယ့်ကိုယ်ကို ပေးပြီး အလှုပ်အရှားတွေနဲလာခဲ့တာပါ။ အိမ်နားလေးက ဈေးလမ်းလျှောက်သွားဖို့ တောင် အချိန်က တန်ဖိုးရှိပါတယ်ဆိုတဲ့ အကြောင်းပြချက်လေးနဲ့  ဘတ်စကားကို ထိုင်စောင့်နေတတ်တဲ့ ကျွန်မပါ။ သားလေးမွေးပြီးတော့ အားကစားဆိုတာ ဟိုချောင်ထဲကို ပိုရောက်သွားခဲ့ပါတယ်။ ရုံးမှာ အဆင့်သင့်သွားကစားလို့ ရတဲ့ နေရာရှိတာတောင် ရုံးဆင်းရင် အိမ်အမြန်ပြန် ချက်ပြုတ်စားသောက်ဖို့ ပဲ ပိုစိတ်ဝင်စားလာခဲ့တာပါ။ ဒီတော့လဲ ပေါင်ချိန်စက်ကို တမင်မေ့ထားတာ ဘာဆန်းသလဲနော်။

တကယ်တော့ လှဖို့ ပဖို့ ထက် ကျန်းမာရေးအတွက် အားကစားတခုခုက ပုံမှန်လုပ်သင့်တာ အမှန်ပါပဲ။ ကျွန်မအဖေဆို မနက်တိုင်း ပုံမှန်လမ်းလျှောက်တတ်သူပါ။ ဒါကြောင့်လဲ ဖေဖေ ဒီကို လာလည်လို့  ရှောပင်းထွက်ကြရင် ကျွန်မတို့ ကသာ မောမယ် သူက မမောပါဘူး။ ခုတော့ အားကစားက ကျွန်မဆီ တံခါးလာခေါက်နေပါပြီ။ မနေ့ က တနာရီဆက်တိုက် အေရိုးဗစ်ကစားလိုက်ရတာ ကျွန်မအတွက် မဟာစွန့် စားခန်းကြီးလို ပင်ပန်းလွန်းလှပါတယ်။ ဒီပုံအတိုင်းသာ ဆက်သွားရင် အားကစားဆိုတဲ့ အသံကြားတာနဲ့  ထွက်ပြေးတော့မယ့် အခြေအနေဖြစ်လာတော့မှာမို့  အားကစားကို ကြိုဆိုလက်ခံဖို့  အားမွေးနေမိပါတော့တယ်။


တန်ခူး
10:16am 25-Sep-2009

Monday, August 31, 2009

ဟိုဟိုဒီဒီ

ဒီနေ့ မနက် “ယနေ”့ သတင်းစာမှာ လမ်းမကြီးပေါ်မှာ ယောင်္ကျားတယောက် နှောက်ယှက်တာ ခံလိုက်ရတဲ့ မိန်းမတယောက်က သူ့ ကို ဖြတ်သွားဖြတ်လာတွေ ဘယ်သူမှ မကူညီကြတာကို ရင်ဖွင့်ထားတယ်။ ဒါနဲ့ ဆက်စပ်ပြီး ဟိုတလောက သတင်းစာပေါ်မှာ ဒီနိုင်ငံရဲ့ ဖော်ရွေမှုနဲ့  ပတ်သက်ပြီး စစ်တမ်းတွေကောက်ကြ ရေးကြတာကို သွားသတိရတယ်။ ခက်တာက ကူညီဖို့  ဆိုတာကလဲ ကူညီချင်စိတ်ရင်းခံရှိမှ၊ ဖော်ရွေဖို့ ဆိုတာကလဲ ဖော်ရွေတဲ့ နှလုံးသားတခု ပိုင်ဆိုင်မှ။ ဒါကို အလုပ်ကြီးတခု အနေနဲ့  တိုက်တွန်းနေရတယ် ဆိုကတည်းက တခုခုက မှားယွင်းနေပြီ။ ရထားပေါ်မှာ နိုင်ငံကျော်တီဗွီမင်းသား ဂါးမက်စင်းက သူ့ ရဲ့နာမည်ကျော် ဇာတ်ကောင် ပိုချူးကန်ပုံနဲ့  လိုအပ်တဲ့သူတွေကို ထိုင်ခုံနေရာပေးဖို့  ပြူးပြူးကြီး ကျော်ငြာထားတယ်။ သားနဲ့ ရထားစီး အိမ်ပြန်တော့ မေမေ အဲဒီဦးဦးက ဘာပြောနေတာလဲတဲ့ လို့  စပ်စပ်စုစုမေးရော။ သားက တကယ်ကို မသိရှာလို့  မေးတာပါ။ သားက အင်္ဂလိပ်လို မေးတာဆိုတော့ သားရှေ့ က ထိုင်နေတဲ့ မိတ်ကပ်အဖွေးသားနဲ့  ဒီနိုင်ငံသူက သားကို မျက်စောင်းထိုးတယ်။ သူ့ နေရာလုချင်လို့  ကလေးက သက်သက်မေးတယ်လို့  ထင်နေပုံပဲ။ ပထမတော့ သားကို မြန်မာလို ပြန်ရှင်းပြမလို့ ပါပဲ။ ကလေးကို နေရာမပေးပဲ မျက်စောင်းလာပေးတဲ့ တယောက်ကို ချဉ်ချဉ်ရှိတာနဲ့  အင်္ဂလိပ်လို ရှင်းပြလိုက်တယ်။ သားက ကိုယ်ပြောတာကို နားထောင်လိုက်… ရှေ့ က မိန်းမကို ကြည့်လိုက်နဲ့  အတော်ကို ရှုပ်ထွေးသွားပုံပဲ။ ဟုတ်တယ်လေ… သူက ကိုယ်ဝန်သည်မဟုတ်… မသန်မစွမ်းမဟုတ်… ပြီးတော့ အသက်က ကိုယ့်ထက်တောင် ငယ်ဦးမယ်။ ပြူးပြူးပြဲပြဲ ပိုချူးကန်တောင် အားနာမိရဲ့။

ဒီရုံးကို ပြောင်းလာတော့ ကျောက်ရုပ်ကြီးတွေလို securityလူကြီးတွေ ကြည့်ပြီး ပျင်းလိုက်တာ။ မြင်ပါများလို့  ပြုံးမိတာတောင် ပြုံးရမှာမေ့နေတဲ့ပုံ။ တပါတည်း အရင်ရုံးက ဖော်ရွေတဲ့ securityလူကြီးတွေလဲ လွမ်းမိသေးတယ်။ အမျိုးသားက ရှင်းပြတယ်။ သူတို့ လုပ်ငန်းသဘာဝက အဲဒီလိုပဲတဲ့။ securityအလုပ်ဆိုတာ လူတွေနဲ့  မရင်းနှီးလေ ပိုလုံခြုံလေတဲ့။ သိပ်ကြီးမကျေနပ်သေးဘူး။ ပြီးခဲ့တဲ့လက ဒီရုံးကို securityလူကြီး အသစ်တယောက် ရောက်လာတယ်။ လုံခြုံရေးကို မျက်ခြေမပြတ်တဲ့ အပြင် လူတွေကို ပြိုင်တူကူညီတတ်တာ ချီးကျူးစရာ။ ဓာတ်လှေကားနားမှာ တာဝန်ကျရင် ကျန်တဲ့သူတွေလို ကျောက်ရုပ်ကြီးလို တောင့်တောင့်ကြီး ရပ်မနေဘူး။ မနက် ရုံးတက်ချိန်လူတွေ အပေါ်ထပ်တက်မှာ များတာမို့  ဓာတ်လှေကားအမြဲခေါ်ပေးထားတာ။ ကျောင်းပို့ ရမယ့် ကလေးတွေနဲ့ အမေတွေဆို တံခါးကို ပြေးဖွင့်ပေးသေးတယ်။ အဓိကက စေတနာပေ့ါနော်။ သူ့ ကိုတွေ့ လိုက်ရရင် အမြဲပြုံးပြီး စိတ်ချမ်းသာနေသလိုပဲ။ အပေါ်က ပြောခဲ့သလိုပေါ့။ ဒါမျိုးဆိုတာ တွန်းလို့ မရဘူး။ နှလုံးသားက အရင်းခံတာလေ။


ရုံးမှာ သန့် ရှင်းရေးလုပ်တဲ့ အန်တီကြီး ဟိုတလောက ပျောက်နေတော့ ကိုယ့်မှာ စိတ်ပူလိုက်ရတာ။ အစားထိုး အန်တီ့ကို မေးကြည့်တော့ ဆေးရုံတက်ရတယ်တဲ့။ H1N1 ကလဲ ဟိုတွေ့ ဒီတွေ့ ။ ဟိုလူရဲ့အသိကဖြစ်နေလို့ … ရုံးက ဖယ်ရီမောင်းတဲ့ ဒရိုင်ဘာကြီး ဖြစ်နေလို့ နဲ့ … ။ အတော်ကို များနေတော့ အန်တီအတွက် စိတ်ပူမိတယ်။ အန်တီက နှလုံးကို ကိုယ်ထဲမှာစက်ကလေးထည့်ပြီး ခုန်နေရသူ။ H1N1ကလဲ ရောဂါအခံရှိသူ ( သွေးတိုးအစ… အ၀လွန်သူအဆုံး) ဆိုကြောက်ရတယ်လို့  ဆိုတာကိုး။ ကိုယ်ကလဲ ကျန်းမာရေးဆို ကိုယ့်နယ်ပယ် မဟုတ်တော့ မကျွမ်းကျင်ဘူးလေ။ သတင်းစာမှာ H1N1ကြောင့် တယောက်သေရင် ဘေးမှာ အမြီးလေးနဲ့  ဘာရောဂါအခံရှိ (သို့ ) အ၀လွန် … ဒါမျိုးလေးတွေက ပါတတ်တော့...။ အန်တီ့အတွက် စိတ်ပူမိတာ ဆန်းလား။ အန်တီက ရုံးမှာ သန့် ရှင်းရေးလုပ်ရင် သူ့ အိမ်မှာ လုပ်နေသလိုပဲ။ စေတနာသိပ်ပါပြီး၊ သိပ်သပ်ရပ်တာ။ ပြီးရင် သူ့ မျက်နှာလေးက ချိုနေတာပဲ။ မြန်မာပြည်က ပြန်လာတော့ သူ့ ဖို့  ကျောက်စိမ်းလက်ကောက်လေး လက်ဆောင်ပေးတာ သူအရမ်းပျော်သွားတယ်။ သူက ကိုယ့်အတွက် သူ့ အိမ်က အပင်ပုပုလေးနဲ့  သားအတွက် ရေဗူးလေး လက်ဆောင်ပြန်ပေးတယ်။ အနေကြာလာတော့ ကိုယ့်အဒေါ်လို ခံစားလာရတာလေ။ နောက်တပတ် အန်တီပြန်လာတော့မှ အကြောင်းစုံသိရတယ်။ မူးလဲလို့ တဲ့။ သူ့ ခင်မျာ ခွင့်မရှိလို့  တပတ်ပဲ နားရတယ်။ ရင်ထဲမှာ မကောင်းဘူး။

ရုံးမှာ လူတွေတိုးလာလို့  နေရာအပြောင်းအလဲတွေ လုပ်တော့ ကိုယ့်ပြူတင်းလေးနဲ့  ကိုယ်ဝေးသွားတယ်။ ကိုယ့်နေရာကြီးက လမ်းဆုံလမ်းခွ ကွန်ပြူတာကြီး ချပြထားသလို ထင်းထင်းကြီး။ စိတ်တွေညစ်သာ။ နေရာတွေ ချတော့ ကိုယ့်အရာရှိက နေရာစီစဉ်သူ။ ဘာလို့ လဲ မသိဘူး အသားနဲနဲညိုတဲ့ ဒီနိုင်ငံသူ Indiaလူမျိုးနဲ့  India နိုင်ငံသား နှစ်ယောက်က ဟိုဘက် ကပ်ရပ်အခြမ်း ရောက်သွားတယ်။ အသားနဲနဲလတ်တဲ့ Indiaသူလေးကိုတော့ ဒီဘက်မှာပဲ ထားတယ်။ မိုက်ကယ်ဂျက်ဆင် သီချင်းသွားသတိရတယ်။ ကိုယ်လေ ဒါကြောင့် မျက်နှာသစ်လဲ whitening၊ သွားတိုက်လဲ whitening၊ ရေချိုးလဲ whitening ဆပ်ပြာနဲ့ ပဲ။ ကိုယ်က အညာသူမိုလား။

ခုတလော အသိ မြန်မာကလေးလေးတွေ အတန်းထဲမှာ ထိပ်ဆုံးက နေရာရနေတာ ဆက်တိုက်ကြားနေရတော့ ၀မ်းသာလိုက်တာ။ ဘလော့ဂါဘော်ဒါကြီးကိုပေါ သမီးလေးက သူတို့ အတန်းမှာ (prefect)ဘက်စုံစံပြကျောင်းသူတဲ့။ ကိုယ့်သူငယ်ချင်းသားလေးက PSLE အမှတ်ကောင်းလို့  အတန်းခုန်တက်ရတဲ့ ကျောင်းကို ရသွားတယ်တဲ့။ အမျိုးသားရဲ့တူလေးနဲ့  အဆင့်တစ်လုနေရတဲ့ ကောင်မလေးကလဲ မြန်မာမလေးဆိုပဲ။ ကိုယ့်ဆရာမသမီးလေးဆို တော်လွန်းလို့  တတန်းလုံးက ဒီနိုင်ငံကသူတွေက ၀ိုင်းမနာလိုတာ ခံရတဲ့အထိပဲတဲ့။ ကလေးတွေက မျက်နှာလေးမော့ပြီး ငါကမြန်မာလို့  ဂုဏ်ယူတတ်ကြပြီ။

ကဲ… ပုံပြင်လေးကတော့ ဒါပါပဲ… ဟုတ်ပါဘူး။ ဒီတွင် ဟိုဟိုဒီဒီ ပြီးပါပြီ။ စကားမစပ်… တခုကျန်တာသေးတာက….ဒီနိုင်ငံထုတ် မြန်မာမဂ္ဂဇင်းလေးတွေ ထွက်လာတာ ၀မ်းသာစရာ။ မျက်နှာဖုံးရှင်လေးတွေကလဲ လှလိုက်တာ။ အမှတ်တမဲ့ ကြည့်ရင် နိုင်ငံခြားမင်းသမီးလေးတွေအတိုင်း။ တခုပဲ စိုးရိမ်မိတယ်။ ဒီကရှေ့ လျှောက် Flu Seasonဆိုတော့ သူတို့  အအေးမိမှာကိုပါ။

တန်ခူး
4:12pm 31-Aug-2009

Thursday, August 27, 2009

ကျွန်တော်ပြောချင်သော ပန်းပွင့်လေးများအကြောင်း



ပုံကို ဒီနေရာမှယူပါတယ်

တွေ့ လိုက်တိုင်း ရင်ထဲကို ဆွတ်ပျံ့ ညွှတ်နူးသွားအောင် တတ်နိုင်လွန်းတဲ့ ပန်းကလေးတွေ ကျွန်တော့်ရင်ထဲမှာ အများကြီး ပွင့်ခဲ့ဖူးတယ်ဆို ပိုလွန်းရာများကျမလား…
တကယ်တော့ အဲဒီပန်းလေးတွေကို မတို့ ရက်..မထိရက်… ဟိုဝေးဝေးကသာ ငေးခဲ့ရတာမို့ … ပန်းလေးတွေတောင် သိပါ့မလားပဲ…
ပန်းလေးတွေကို အိပ်မက်မက်ခဲ့ဖူးတယ်…
ပန်းလေးတွေက ကာရံချိုချိုကဗျာတွေ ဖြစ်ခဲ့ဖူးတယ်…
ပန်းလေးတွေကြောင့်ပဲ စွယ်တော်မြေက ကျွန်တော့်နေ့ ရက်တွေ အရောင်စုံ စိုပြေလှပခဲ့တာ…
ခုချိန်ထိ… တမ်းတမိနေတုန်း… လွမ်းမိနေတုန်း… ရနံ့ သင်းပျံ့ နေတုန်း… ဆွတ်ပျံ့ ညွှတ်နူးနေတုန်း…

*************

စံပယ်တပွင့်  (သို့ ) မနှောင်းခင်ခင်

ပြောလက်စ စကားတွေ ရပ်တန့် သွားအောင်… အသက်ခဏရှုဖို့ မေ့လျော့သွားအောင်… လောကကြီးမှာ သူတယောက်ပဲ ရှိတယ်လို့  ထင်မှတ်မှားလောက်အောင်… စတွေ့ တဲ့နေ့ ကပဲ သူက ကျွန်တော့်ကို ဖမ်းစားခဲ့တာပါ… သူ့ ကိုစတွေ့ တော့ ကျွန်တော့်အခန်းနံရံ နေရာများများမှာ နေရာယူထားတဲ့ ပိုစတာမင်းသမီးလေး ဖိုဘီကိတ် ရန်ကုန်စက်မှုတက္ကသိုလ်မှာ လာများတက်နေတာလားလို့  သံသယဖြစ်လောက်အောင် သူရဲ့ မျက်ဝန်းနက်နက်လေးတွေကအစ မျက်နှာဖြူသွယ်သွယ်လေး အလယ် ဆံပင်ပျော့ပျော့လေးအဆုံး အားလုံးတူနေတော့တာ… လှတယ်ဆိုတာထက် ချစ်စရာကောင်းတယ်… ရင်ကိုအေးမြစေတယ်… အခြယ်အသကင်းတဲ့မျက်နှာလေးက ဘာလို့ များ ဒီလောက်စွဲမက်စရာ ကောင်းနေပါသလဲကွယ်… သူလေးနဲ့ လိုက်ဖက်အောင် သူ့ မိဘတွေပေးတတ်လွန်းတဲ့ နာမည်လေးက မနှောင်းခင်ခင်တဲ့… ချစ်တယ်… နာမည်လေးကအစ… တွေ့ လိုက်တိုင်း ကျွန်တော့်ရင်ကို အေးမြငြိမ်းချမ်းစေလို့  ကျွန်တော် သူ့ ကို တိတ်တ်ိတ်လေးခေါ်တဲ့ နာမည်လေးက စပယ်တဲ့… စပယ့်ကိုတွေ့ ရင် သတိလက်လွတ်ငေးတတ်လွန်းလို့  သူငယ်ချင်းတွေက စ ကြတဲ့အထိ… ဒါပေမယ့် ကံကြမ္မာက ရက်စက်တယ်… ဘာကြောင့်များ စပယ့်ကို ငေးကြည့်ခွင့်လေး တနှစ်သာပေးခဲ့ရသလဲ… စပယ်ကျောင်းပြီးသွားတော့ ကျွန်တော်ရင်ထဲ ဟာတာတာကြီး… အဲဒီဟာတာတာကြီးက ယနေ့ ထက်ထိဆို စပယ် ဘာများမှတ်ချက်ပေးဦးမလဲ… အရောင်လျော့ ဟောင်းနွမ်းနေတဲ့ ပိုစတာတွေက ကျွန်တော့် အခန်းနံရံမှာ ခုထိရှိနေတုန်းပါ… လွမ်းတယ်…မနှောင်းခင်ခင်ရယ်

*************

နှင်းဆီနီနီ (သို့ ) မအေမာမျိုးသိန်း

သူ့ ဆံပင်တွေကတဆင့် သူ့ ကို စ သတိထားမိခဲ့တာ… အဲဒီလောက်လှတဲ့ ဆံပင်တွေ ကျွန်တော့်ဘ၀မှာ တခါပဲတွေ့ ခဲ့ဖူးတယ်… အဲဒီဆံပင်ရှည်ရှည်ထူထူတွေနဲ့ လိုက်ဖက်တဲ့ မျက်နှာလေးကို သူက ပိုင်ဆိုင်ထားတယ်… သူ့ အလှက အနောက်တိုင်းဆန်တယ်… အပြုံးအရယ်နဲတဲ့ သူ့ မျက်နှာလေးက ကျွန်တော့်ကို ယစ်မူးစေတယ်… ကျွန်တော်လေ အိပ်မက်ထဲမှာ သူ့ ဆံပင်တွေ ခိုးနမ်းဖူးတယ်…သူက နှင်းဆီနီနီတပွင့်လို လှသွေးကြွယ်လွန်းသူ…သူမို့ လှမ်းလာရင် ကျွန်တော်ခြေလှမ်းတွေ ဦးတည်ရာမဲ့သလို မတည်မငြိမ်နဲ့ … သူ့ နံဘေး သူ့ ကို ငေးကြတဲ့ မျက်ဝန်းတွေနဲ့  ကျွန်တော်က ခဏခဏ ခလုပ်တိုက်မိတယ်… သတင်းကြီးတဲ့နှင်းဆီနီနီလေးနာမည်က အေမာမျိုးသိန်းတဲ့… မလှမ်းဝံ့တဲ့ ခြေရာတစုံကို နှင်းဆီနီနီလေးကတော့ ရိပ်မိမယ် မထင်ပါဘူး… ကျွန်တော်လေ သူ သုံးနေကျ အဖြူရောင်ဘီးလေးဖြစ်ရရင် တော်ပါပြီ… နှင်းဆီနီနီလေးက နှုတ်မဆက်ပဲ ဟိုးအဝေးကို ထွက်ခွာသွားတယ်… ပျောက်လို့  အရူးအမူးရှာလိုက်ရတာဗျာ… သူငယ်ချင်းတွေကပြောတယ်… သူနိုင်ငံခြားကို ထွက်သွားတာတဲ့… ကျွန်တော် သူ့ အတွက် တိတ်တိတ်ဝယ်ထားတဲ့ အဖြူရောင်ဘီးလေး တစစီကျိုးသွားတယ်… ဆံပင်ရှည်ရှည် ကောင်မလေးတွေ တွေ့ ရင် သူများလားလို့  လိုက်ငေးမိတုန်းပါ မအေမာမျိုးသိန်းရယ်

*************

ကံကော်ပွင့်လေး (သို့ ) မချိုနွယ်ထွန်း

နွေးအေးမှာ ထိုင်နေတုန်း သူငယ်ချင်းတယောက်က အရမ်းလှတဲ့ ကံကော်တပွင့်ကို လှမ်းပြခဲ့တာ… ယောင်ယမ်းပြီး လဘက်ရည်ပူပူတွေ ပါးစပ်ထဲ လောင်းချမိတဲ့အထိ သူ့ အလှက ထူးခြားလွန်းတယ်… လှတယ်… ချောတယ်… ချစ်စရာကောင်းတယ်… ယဉ်တယ်… ခပ်သွက်သွက်လျှောက်တတ်တဲ့ ခြေလှမ်းတွေနောက်မှာ ကျွန်တော့်နှလုံးသား တွယ်ငြိပါသွားတယ်… မျက်နှာလေးက မပြုံးလဲ ချိုနေတယ်… နာမည်နဲ့ လိုက်ပါဘိ မချိုနွယ်ထွန်းရယ်… ဒဏ္ဍာရီလိုလို ပုံပြင်လိုလို ဇာတ်လမ်းတပုဒ် ကြားဖူးတယ်… ကျွန်တော်တို့  ကျောင်းက နာမည်ကြီးအဆိုတော် တယောက်တောင် သူငြင်းပစ်ခဲ့လို့  အသဲကွဲဖူးတယ်တဲ့… လှချင်တိုင်းလှရက်နေတဲ့ ဟိုးထိပ်ဖျားမှာ ပွင့်နေတဲ့ ကံ့ကော်တပွင့်လိုပါပဲ… ကံ့ကော်ပွင့်ဖတ်လေးလို သူ့ ပါးလေးတွေက ဖြူနုနေတယ်… သူ့ ဘေးနားက ဖြတ်သွားရင်တောင် ကံ့ကော်ရနံ့ လေး ရလိုက်သလိုပါပဲ… ညညဂီတာတီးတော့ စိတ်ကူးထဲမှာ အရပ်မြင့်မြင့်နဲ့  သူလေး… ဒီလိုနဲ့  ငေးလိုက်…ဆွေးလိုက်…လွမ်းလိုက်နဲ့  တိတ်တိတ်လေး ကြွေရတဲ့ ဘ၀က ရာထူးမတက်ခင် ကျွန်တော့်ကံ့ကော်လေး ကျောင်းပြီးသွားတယ်… ကျွန်တော့်ဒိုင်ယာရီကြားထဲက ကံ့ကော်တပွင့် ခုထိ မညှိးခြောက်သေးဘူးဆို အံ့သြသွားမလား မချိုနွယ်ထွန်းရယ်

*************

ဇလပ်ဖြူ (သို့ ) မကြည်မြင့်သွင်

သူ့ ကို တွေ့ တိုင်း ယဉ်တကိုယ်မယ် သီချင်းကို တိုးတိုးညည်းမိတယ်… ကောင်းခြင်းငါးဖြာနဲ့  ပြည့်စုံလွန်းတဲ့ အလှပိုင်ရှင်က မြို့ ပြက ကွင်းတဲ့… မေဂျာတောင် ပြောင်းချင်တဲ့အထိ ကျွန်တော် ရူးသွပ်သွားတယ်… ထမီရှည်ရှည်ဝတ်တတ်တဲ့ သူ့ စတိုင်လေးက တမျိုးချစ်ဖို့ ကောင်းတယ်… သူ့ အသားလေးက ဇလပ်ပန်းလေးတွေလို ဖြူစိုဝင်းမွတ်လွန်းလို့  ကျွန်တော့် ကဗျာထဲမှာ ဇလပ်ဖြူလို့  သူ့ ကို နာမည်ပေးခဲ့တယ်… သူထိုင်နေကျ ထိုင်ခုံလေးပေါ်မှာ ကဗျာလေးတွေ တိတ်တိတ်သွားရေးခဲ့ဖူးတယ်…သူသတိထားမိခဲ့သလား…ပြန်တွေ့ ခဲ့ရင် မေးကြည့်ချင်ပါရဲ့ ဇလပ်ဖြူ… သူနဲ့ ပတ်သက်ရင် လှိုင်းတွန့် လေးတွေ အနဲငယ်ပါတဲ့ ဆံပင်ပျော့ပျော့လေးတွေရယ်… ချစ်စရာကောင်းလွန်းတဲ့ နှုတ်ခမ်းပါးပါးလေးတွေရယ်…ခြေဖမိုးဖြူဖြူနုနုလေးတွေကအစ ယနေ့ ထိ မေ့လို့ မရသေးပါ… စက္ကူမြှားပေါ် ကဗျာလေးတွေရေး သူလွယ်နေကျ ကချင်လွယ်အိတ်လေးထဲကို ထည့်ဖို့  အကြိမ်ကြိမ်ကြိုးစားခဲ့ဖူးပေမယ့် ဘယ်တော့မှ မအောင်မြင်ခဲ့ပါဘူး ဇလပ်ဖြူရယ်…အတန်းမတက်ပဲ မြို့ ပြအတန်းကို လှမ်းမြင်ရမယ့် ကော်ရစ်ဒါမှာ ကျောက်ချထားတဲ့ ကျွန်တော့်ကို သူငယ်ချင်းတွေ ဆဲယူရတဲ့အထိပါပဲ… ထုံးစံအတိုင်း သတ္တိနဲတဲ့ ကျွန်တော့်အတွက် အဖြေကို သူကိုယ်တိုင်ပေးခဲ့တယ်… နေနဲ့ လ… ရွှေနဲ့ မြ ကျွန်တော့် ချစ်သူရဲ့ ချစ်သူကို ကျွန်တော်က အားကျစွာ ငေးနေရုံမှအပ… ဘာများတတ်နိုင်ဦးမလဲလေ… မရှက်တမ်းဝန်ခံရရင် တွေ့ ချင်သေးတယ် မကြည်မြင့်သွင်…

*************

Kiss me Quick (သို့ ) မ၀င်းရွှေသွေး

မိုးပျံတံတားပေါ်မှာ နောက်နားက ကပ်ပါလာတဲ့ ဒေါက်ဖိနပ်သံလေးကြောင့် နောက်လှည့်ကြည့်မိတဲ့ တခဏ ကျွန်တော် အပြင်းအထန်ရောဂါ ရသွားခဲ့တာပါ…သူ့ လောက် ချစ်စရာကောင်းတဲ့သူတောင် သူ့ လိုချစ်စရာကောင်းမယ် မထင်ပါဘူး… နားကြားထဲမှာ ပန်ထားတဲ့ ပန်းသေးသေးလေးကို ကျွန်တော် မနာလိုလိုက်တာ… ကလေးလေး တယောက်လို ဆတ်တောက် ဆတ်တောက် လမ်းလျှောက်ဟန်လေးကိုက သိပ်ချစ်စရာ ကောင်းနေတော့တာ… ကျွန်တော့်ခြေလှမ်းတွေက အားစိုက်စရာမလို သူ့ နောက်ကို အလိုလို လိုက်ပါသွားတာ… ခရေပင်လမ်းကို ရောက်တော့ အရုပ်ကလေးတရုပ်လို ကလေးလေးတယောက်လို ချစ်စရာကောင်းတဲ့ သူ့ လက်ကလေးသာ ကိုင်တွဲ အတူလျှောက်လှမ်းလိုက်ချင်တယ်… သူ့ သူငယ်ချင်းမလေးက သူ့ ကို လှမ်းနှုတ်ဆက်လိုက်တော့ ဘယ်တော့မှ မမေ့နိုင်တဲ့ နာမည်တခု ရင်ထဲမှာ စွဲသွားတယ်… မ၀င်းရွှေသွေးတဲ့… မျက်နှာနုနုလေးနဲ့  လိုက်ဖက်လိုက်တဲ့ နာမည်လေးနော်… ကားပတ်ကင်ရောက်တော့ သူ့ ခြေလှမ်းတွေ ရပ်သွားတယ်… နောက်ကလိုက်လာတဲ့ ကျွန်တော်လဲ ဘာလုပ်ရမှန်းမသိတော့ သူငယ်ချင်းတယောက်ကို စောင့်သလိုလို မယောင်မလည် လုပ်မိတယ်… ကန်တင်းသွားဖို့  သူ့ သူငယ်ချင်း တယောက်ယောက်ကို စောင့်နေတယ် ထင်တယ်… ဘေးစောင်းမြင်နေရတဲ့ မျက်နှာလေးကို ခိုးကြည့်လို့ မှ မ၀သေး ချိုမြသွားတဲ့ သူ့ အပြုံးလေးကြောင့် သူစောင့်နေတဲ့ သူငယ်ချင်းဆီ ကျွန်တော်ပါ အကြည့်ရောက်သွားတယ်… ကျွန်တော် ထင်သလို မိန်းခလေးတယောက် ဟုတ်မနေခဲ့ပါ… ကျွန်တော့်မျှော်လင့်ချက်တွေက ဟိုးမြက်ခင်းပြင်ပေါ်မှာ… လက်ကလေး ယုယုယယ တွဲပြီး ကန်တင်းဘက်ထွက်သွားတဲ့ သူတို့ ကို ကြည့်ပြီး မစခင် ဆုံးသွားတဲ့ ကျွန်တော့်ဇာတ်လမ်းလေး အတွက် ကြေကြေကွဲကွဲ… အိုး… ခုနက သူ့ နားကြားထဲမှာ ပန်ထားတဲ့ ပန်းသေးသေးလေး ကျနေခဲ့ပါရောလား… ပန်းရောင်ပန်းသေးသေးလေးကို တမြတ်တန်ိး ကောက်ယူမိလိုက်တယ်… ပန်းလေးနာမည်က အမြန်နမ်းပါ… kiss me quick တဲ့… တိုးတိုးသွားတဲ့ ဒေါက်ဖိနပ်သံလေးနဲ့ အတူ… အဲဒီအလွမ်းတွေ ခဏခဏ အသစ်ပြန်ပြန်ဖြစ်တတ်တယ် မ၀င်းရွှေသွေးရေ…

*************

တကယ်တော့ အဲဒီနောက်ပိုင်း ကျွန်တော့်ရင်ထဲ ပန်းတွေ အများကြီး ထပ်ပွင့်ခဲ့သေးတာပါ… နောက်ကြုံမှ ဆက်ပြောတာပေါ့ဗျာ… ခုလောလောဆယ် ဒီပန်း ၅ပွင့်ကို ခဏလွမ်းပါရစေဦးဗျာ…

*************
မောင်လေး ရွာသားလေးက တက်ဂ်တာ ပန်း ၁ ပွင့်ထဲပါ… ကျွန်မက ပန်း၅ပွင့်ရေးလိုက်တာပါ… ကဲ… ရွာသားလေးရေ… အမမှာ ပန်းပွင့်တွေ အများကြီးရှိတယ်ဆိုတာ ယုံပြီလား… ဒါတောင် ရင်းနှီးတဲ့ ပန်းပွင့်တွေ ခေါင်းခေါက်ခံရမှာ စိုးလို့  ချန်ထားတာ…တက်ဂ်ဖို့  သတိတရရှိတဲ့အတွက် ကျေးဇူးပါနော်… RITမှာတုန်းက ကျွန်မငေးမောခဲ့ရတဲ့ အရမ်းလှတဲ့ အမကြီးတွေကို နာမည်အရင်းတွေ ယူပြီး ပန်းပွင့်လေးအဖြစ်ဖန်ဆင်းထားတာပါ… ကျွန်တော်ဆိုတဲ့ ယောင်္ကျားလေးဇာတ်ကောင်က အပြင်မှာ တကယ်မရှိပဲ ကျွန်မ ပူးဝင်ခံစားဖို့  ဖန်တီးထားခြင်းပါ… တော်ကြာ ချစ်မမတွေရဲ့ အကိုကြီးတွေက ကျွန်တော် ဘယ်ကောင်လဲ ဆို သတ်ချင်နေမှာမိုလို့  ကြိုပြောထားတာပါ… ကျွန်မရဲ့ ချစ်သော ပန်း၅ပွင့်လုံးကို ကြိုတင်ခွင့်မတောင်းပဲ (သူတို့ ဘယ်ရောက်နေမှန်းကို မသိတာပါ) နာမည်ရင်းတွေ ယူရေးမိတာကို စိတ်ဆိုးခဲ့ရင် ကိုယ့်ညီမလေးက ချစ်လွန်းလို့  ရေးတာလို့  ခွင့်လွှတ်လိုက်ပါနော်…

တက်ဂ်ဂိမ်းတို့  ထုံးစံ ထပ်တက်နေကျပေမယ့် ကိုယ်တောင် အတော် ဦးနှောက်စားရတဲ့ အကြောင်းအရာရွေးချယ်မှုမှားသွားရင် အိမ်ကလူနဲ့  ပြဿနာတက်ကိန်းရှိတဲ့ ဒီတက်ဂ်ဂိမ်းကို ဘယ်သူ့ မှ ဆက်မတက်ဂ်တော့ပါဘူး… ရွာသားလေးရေ… နောက်တခါ အဲလို ခက်ခက်ကြီှးှဆို တို့ ကို ရှောင်သွားနော်…

တန်ခူး
12:39pm 27-Aug-2009

Tuesday, August 25, 2009

သားနဲ့ Birthday Theme


သား ဦးလေး ကျွန်မမောင်လေး ငယ်ငယ်က သင်္ကြန်ဖြစ်ဖြစ်၊ သီတင်းကျွတ်ဖြစ်ဖြစ် ထူးထူးဆန်းဆန်း ရေကစားစရာ၊ မီးထွန်းစရာ တနှစ်နဲ့ တနှစ်မတူအောင် ပူဆာတတ်ပါတယ်။ ငယ်ငယ်လေးနဲ့  ဒီနှစ်တော့ သင်္ဘောပုံ မီးပုံးတွန်းချင်တယ်၊ ဒီနှစ်တော့ သေနတ်ပုံရေပြွတ်အကြီးကြီးဆော့ချင်တယ် ဒါမျိုးပူဆာတိုင်း အဖေနဲ့ အမေက ၀ယ်ပေးနေကြပါ။ သူ့ ကစားစရာဆို အားလုံးက ငေးရရင် သူက မြောက်ကြွမြောက်ကြွနဲ့  ပျော်နေတတ်တာမျိုး။ ဒီနေရာမှာ သားက သူ့ ဦးလေးနဲ့ တူတယ်ဆိုရပါမယ်။ သူ့ မွေးနေ့ အတွက် ကိတ်မုန့် ကို သူကိုယ်တိုင် စဉ်းစားတတ်ပါတယ်။ တနှစ်နဲ့ တနှစ် မတူတဲ့ ကိတ်မုန့် ဖြစ်မှပါ။ ကျွန်မတို့ က သူ့ ကို စမ်းချင်တာနဲ့  အရင်နှစ်ကနဲ့  ဆင်တူပြရင် သူက မှတ်မိပါတယ်။

သားစကားစပြောတတ်ခါစက စပြောတဲ့စကားက အဖေလဲမဟုတ်၊ အမေလဲ မဟုတ်ပါဘူး။ train train တဲ့။ ဟိုးငယ်ငယ်လေး ကတည်းက ရထားလေးတွေ ချစ်တတ်သူပါ။ သူ့ မွေးနေ့ ကိတ်၊ သူ့ မွေးနေ့ အကျီင်္ကလဲ ရထားပါမှ။ Thomas က သူရဲ့ အသည်းစွဲပေါ့။ Thomas ကိတ်ကို တနှစ်နဲ့ တနှစ် ဒီဇိုင်းမတူမှ ကြိုက်ပါတယ်။ အိမ်မှာလဲ ရထားကစားစရာတွေက တခြားကစားစရာထက် ပိုများပါတယ်။ မနှစ်ကအထိ သူ့  birthday themeက ရထားပါပဲ။

ဒီနှစ် နှစ်စပိုင်း ကတည်းက သူ့ မွေးနေ့ ကိတ်မုန့် ကို စဉ်းစားရတာ အမောပါ။ ရထားလိုချင်လား မေးရင် မလိုချင်တော့ပါဘူး။ Ben 10 ရောဂါထတုန်းက Ben 10 cake။ ကျွန်မမယ် အတော် ဦးနှောက်စားရပါတယ်။ ဘယ်ကိတ်မုန့် ဆိုင်မှာမှ Ben 10 မရှိတော့ ဒီမှာရှိတဲ့ ကိုယ့်ဘာသာ ပုံဖော်လို့ ရတဲ့ ကိတ်မုန့် ဆိုင်မှာ Ben 10 ဆိုတဲ့ စကားလုံးလေး ရေးပေးမယ်လို့  စိတ်ကူးထားရပါတယ်။ နှစ်လလောက်ကြာတော့ အချွှန်အတက်တွေနဲ့  ပုံဆိုးပန်းဆိုး Bionical Robot အရုပ်တွေကို အသဲအသန်ကြိုက်ပြန်တော့ ကိတ်မုန့် အတွက် အကြံအိုက်ရပြန်ပါတယ်။

မွေးနေ့ ရောက်ဖို့  ၃လလောက် အလိုမှ ဒီနှစ် birthday themeက ဆုံးဖြတ်ချက် ကျပါတော့တယ်။ Transformer ပါတဲ့။ Transformer မှာတောင် သူအကြိုက်ဆုံး Optimus Prime မှ။ မွေးနေ့ မရောက်ခင် ကိတ်မုန့် ဆိုင်မှာ Transformer ကိတ်မုန့် မှာလို့ ရတယ်ဆိုမှ တော်သေးရဲ့ပေါ့။ အကျီ်င်္လဲ Optimus Primeဆိုတော့ အတော်ရှာယူရပါတယ်။ နောက်ဆုံး ပြည့်စုံသွားမှ သူ့ ဆန္ဒအတိုင်း လုပ်ပေးလို့ ရပြီဆို ၀မ်းသာမိပါတယ်။ Optimus Prime သားသားကို သူ့ အဖေက ပေးတဲ့ မွေးနေ့ လက်ဆောင်ကလဲ Optimus Prime အရုပ်ပါပဲ။ သူ့ birthday themeအတိုင်း အိမ်မှာရော၊ ကျောင်းမှာပါ မွေးနေ့ ပွဲဆင်နွှဲရတော့ ပျော်နေတဲ့ သူ့ အပျော်တွေက ကိုယ့်ဆီပါကူးစက်ပါတယ်။

နောင်နှစ်ကျတော့ ဘာ birthday theme ဖြစ်မယ်မသိပါဘူး။ အရင်အလုပ်က ကျွန်မဘော့စ်ပြောတဲ့ စကားလေးကို ပြန်ကြားယောင်မိပါတယ်။ primary 3 ရောက်တဲ့အထိ ကျောင်းကပြန်လာရင် ချိုဘူးကြီးနဲ့ နို့ စို့ နေတဲ့ သူ့ သားလေးကို ချစ်လို့ မ၀လို့  ချိုဘူးကြီး မဖြတ်ပါဘူးတဲ့။ ကျွန်မကလဲ ခု Optimus Prime နဲ့  မွေးနေ့ ပွဲဆင်နွှဲနေတဲ့ သားကို ကြည့်ပြီး ရထားလေးတွေချစ်တတ်တဲ့ ၄နှစ်သား သားပုံရိပ်လေးကို လွမ်းမိပြန်တယ်။ အမြန်လူလားမြောက်ချင်ပေမယ့်လဲ ရင်ခွင်ထဲ ထွေးပွေ့ ချစ်လို့ ရသေးတဲ့ ကလေးလေးဘ၀ကိုလဲ တွယ်တာမိပြန်တယ်လေ။ အိမ်ပြန်တိုင်း ကျွန်မသွားချင်တဲ့နေရာကို စိတ်ရှည်လက်ရှည် လိုက်ပို့ တတ်တဲ့၊ ကျွန်မစားချင်တဲ့ အစားကို မညီးမညူ ၀ယ်ကျွေးတတ်တဲ့၊ ကျွန်မအတွက် ခုထိ အကျီင်္လေးတွေ လိုက်ရွေးပေး၊ အုန်းဆီလိမ်းပေး ကလေးလို ပြုစုတတ်တဲ့ အဖေ့ကိုလဲ လွမ်းမိပါတယ်။

(19-Aug-2009 က ၅နှစ်ပြည့်သွားတဲ့ သားလေးမွေးနေ့ အမှတ်တရ)
တန်ခူး
9:25pm 25-Aug-2009

Friday, August 14, 2009

နွယ်လိုလူ


ပုံကို ဒီနေရာမှယူပါတယ်။

“နီးစပ်ရာကို မှီတွယ်အမြစ်တွယ်တတ်တဲ့ နွယ်ပင်လေးတွေကို ငါက ချစ်ပေမယ့် နီးစပ်ရာကို စည်းမဲ့ကမ်းမဲ့ မှီတွယ်အမြစ်တွယ်တတ်တဲ့ နွယ်နဲ့ တူတဲ့လူတွေတော့ ငါသိပ်မုန်းတယ်”

**************************
နွေ

ကံ့ကော်တွေ တပွေ့ ကြီးနဲ့  ကားပေါ်က ဆင်းလာတဲ့ လူတယောက်ကို အတွေ့ မှာ နင်ကံမကောင်းဘူးနွေရယ်လို့  ငါတယောက်ထဲ ညည်းမိတယ်နွေ။ ကံ့ကော်တွေကို ငါချစ်ပေမယ့် ငါမမြင်ချင်ယောင်ဆောင်လိုက်တယ်။ တဆက်တည်း နံဘေးက သူသူ့ ကို တားမလို့ လုပ်တော့…။

“ဟယ်… ကံ့ကော်တွေ… ကံ့ကော်တွေ… ရာဇာ အဲဒါဘယ်သူ့ အတွက်လဲဟင်”

ဆောရီးပါနွေ။ ငါ သူသူ့ ကို အချိ်န်မှီ မတားလိုက်နိုင်တာအတွက်။ ကိုယ့်ရီးစား ကျောင်းမလာမှာ အသေအချာသိပါလျက်နဲ့  ဒီကံ့ကော်ပန်းတွေကို ဘာကြောင့်များ ယူလာရတာလဲဆိုတဲ့ မေးခွန်းကို ငါ ရူးရူးမိုက်မိုက် မမေးသင့်ဘူးနော်။ ပြီးတော့ နင်မနက်က ငါ့ကို ဖုန်းဆက်ပြောတဲ့ စကားတွေ သတိရမိတယ်။

(“ညက ရာဇာ အဆောင်ရှေ့ မှာ သီချင်းလာဆိုတယ်ခိုင်… ထူးထူးခြားခြား တပုဒ်ထဲဆိုပြီး သူပြန်သွားတယ်… ဘာသီချင်းဖြစ်မယ်လို့ နင်ထင်လဲဟင်… အခါလွန်မိုးတဲ့… ဘာမှမဆိုင်ဘူးနော်…ငါ့အတွက်လာဆိုတာလို့ ထင်ရလောက်အောင် ငါကမရူးသေးဘူးဟာ… ခဏကြာတော့ သူသူ့ ဆီက ရှိုက်သံကြားတယ်…တကယ်တော့ရာဇာက နင်ပြောနေကျ နွယ်လိုလူပဲဟ…ဒီနေ့ ငါကျောင်းမလာဘူးလို့ သူ့ ကို ကြိုပြောထားတယ်…ဘာတွေဖြစ်မလဲ… နင်စောင့်ကြည့်ခိုင်…အဲလိုလူမျိုး မလွမ်းတတ်အောင် ကျင့်လိုက်ဦးမယ်ဟာ”)

“နင်တို့ အတွက်ပေါ့ဟ… ခိုင် ဘယ်လိုလဲ နင်က ကျောက်ရုပ်ကြီးကျနေတာပဲ”

“အဲဒီပန်းတွေ အကုန်ငါ့ကိုပေး…မနက်ဖြန်ထိခံအောင် အရိုးလေးတွေ ရေစိမ်ထားလိုက်မယ်…ပြီးတော့မနက်ဖြန်ကျ နွေ့ ကိုပေးလိုက်မယ်”

နှစ်ယောက်လုံး အသံတိတ်သွားတော့ ငါရယ်ချင်သွားတယ်နွေ။ ရာဇာရဲ့ ရီဝေေ၀အကြည့်တွေ အောက်မှာ သူသူက ကြေကြေကွဲကွဲ။ ငါမုန်းလိုက်တာနွယ်ရယ်။ ငါနဲ့ နင် လှည်းတန်းကျူရှင်နောက် တကောက်ကောက်လိုက်ပြီး နင်ကြွေအောင် ငိုပြတတ်တဲ့ ရုပ်ကလေးကို ငါကကြားထဲက သနားပြီး ထောက်ခံမိခဲ့တာတွေ ပြန်တွေးပြီး ယူကျုံးမရဖြစ်မိတယ်။ ငါရယ်၊ နင်ရယ်… ပြီးတော့သူသူရယ်… အဲဒီကတည်းက သူငယ်ချင်းအရင်းကြီးတွေ။ တကယ်ပဲ သူသူ့ ကို စိတ်ဝင်စားခဲ့ရက်နဲ့  နင့်ကို ချဉ်းကပ်ခဲ့တာဆိုရင် သူက သွက်သွက်ခါအောင် ရူးနေပြီဟ။

“ငါဗိုက်ဆာတယ်… ကန်တင်းသွားရအောင်ဟာ”

“အိုကေ… ဘာစားချင်လဲပြော”

“နင်တို့ ပဲသွားတော့… ငါတော့မဆာဘူး”

ပျော်သွားကြတဲ့ မျက်နှာတွေနဲ့  သွက်လက်တဲ့ခြေလှမ်းတွေကို ငါမျက်နှာလွှဲလိုက်တယ်။ ဒီညနင်ဖုန်းဆက်ရင်တော့ နင်ကစလို့  ခပ်ရှုပ်ရှ ပ်နွယ်ပင်တွေ ဖြတ်ပစ်လိုက်တော့လို့  ငါပြောဖြစ်တော့မယ် ထင်ပါရဲ့ဟယ်။

**************************
ဝေ

“နင်ကနွယ်လိုလူလား… သူကနွယ်လိုလူလား… ဒါကတော့ နင်တို့ ၂ယောက်ပဲ သိမပေါ့ဝေ…”
“သူ့ ဘ၀က သနားစရာပါခိုင်ရယ်…ရှင်လျက်နဲ့ သေနေရသလိုပဲ…သူ့ အမျိုးသမီးရဲ့မောက်မာမှုတွေကို သူ့ ခမျာလည်စင်းခံနေရတာပါ”

“အင်း…နင့်ရောဂါက အတော်ကြီးနေပြီဝေ… အရာရှိနဲ့ အတွင်းရေးမှူး နောက်ဆုံးကျ ငြိကြလေသတည်းဆိုတဲ့ အနေနီးစပ်မှုဒဏ်ကို မလွန်ဆန်နိုင်တဲ့ ခပ်ညံ့ညံ့သူတွေထဲ နင်ပါသွားတာ ငါဖြင့် ၀မ်းနည်းလိုက်တာဟာ”

“ငါတို့ ရဲ့ လေးနက်တဲ့အချစ်ကို အနေနီးစပ်မှုလို့ တော့ ခပ်ပေါ့ပေါ့ နာမည်မတပ်လိုက်ပါနဲ့ ခိုင်…တကယ်တော့ အချိန်ပါပဲ…သူနဲ့ ငါနောက်ကျမှတွေ့ ခဲ့ကြလို့ ပါ…ကံကြမ္မာက တကယ်နားလည်နိုင်တဲ့ ချစ်သူ၂ယောက်ကို ရက်ရက်စက်စက် နောက်ကျမှ တွေ့ စေခဲ့တာ”

ဝေရယ်။ ငါနင့်ကို မကယ်နိုင်တော့ဘူးလား။ ဆံပင်ရှည်ရှည်လေးနဲ့ နင့်မျက်နှာနုနုလေး။ ဘာကြောင့်များ သူများမိသားစုကို ဖျက်ဆီးတတ်တဲ့နွယ်တပင်ဖြစ်ချင်ရတာလဲ။ နင့်ကို တစ်ရှူးထုတ်လှမ်းပေးရင်း ပျော်ပျော်ရွှင်ရွှင်နဲ့  ဆိုင်ထဲဝင်လာတဲ့ မိသားစုဆီ အကြည့်ရောက်တော့ ငါ့အသက်ရှုတောင် ခဏရပ်သွားတယ်ဝေ။ အိုကေ… နင်အဲလို ခေါင်းလေးငုံ့  ဆံပင်တွေ အုပ်ပြီး ငိုနေပါဦးနော်။ သူတို့  ငါတို့ နဲ့ မနီးမဝေးနေရာယူတော့ ငါ့ရင်ထဲ ကြိ်တ်ဆုတောင်းတဲ့အတိုင်း နင့်ဇာတ်လိုက်ကြီးက ငါတို့ စားပွဲကို ကျောခိုင်းလို့ ။

“ကဲ…၀အောင် ငိုလိုက်ဝေ…ဟင်း…ဇာတ်လမ်းကပြီးခါနီးပါပြီ…ငါ့မယ် စိတ်ပူလိုက်ရတာဟယ်…ငါ့သူငယ်ချင်းရေတိမ်များနစ်တော့မလားလို့ ”

“ဘာတွေပြောနေတာလဲခိုင်”

“ရှူး…ဘယ်မှမကြည့်နဲ့ … နင်လုပ်ရမယ့်အလုပ်က နောက်နားလေးက မိသားစု စကားပြောတာ နားထောင်နေရုံပဲ…”

(“သက်လေး… ပါးစပ်ပျက်နေတယ်ဆိုလို့  ဒီခေါ်လာတာ ဘာစားမလဲကြည့်နော်”)

အံ့သြသွားလားဝေ။ အဲဒီအသံကိုတော့ နင်ဘယ်ရောက်ရောက် မှတ်မိနေတယ်မိုလား။ နင်လှည့်ကြည့်မယ်ဆိုတာ ငါသိပြီးသားမို့  နင့်ဆရာ ကြောခိုင်းနေတာပဲ ခပ်ကောင်းကောင်းနော်။

(“သားက ဖါလူဒါ”)

(“မီးမီးက ကိုဖီးလ်”)

(“ဟုတ်ပြီ… မှာပေးမှာပေါ့… မေမေကြီးလဲ ဘာစားချင်လဲ မေးကြဦးလေ”)

(“မောင်ကြိုက်တာသာ မှာပါတော့ မောင်ရယ်…”)

(“သက်ကလဲလေ…လေသံလေးကပျော့လိုက်တာ…ဒါပထမဆုံးကိုယ်ဝန်လဲမဟုတ်ပဲနဲ့ … ကလေး၂ယောက်တောင် မွေးဖူးထားတာကို… အစာတော့ အဟာရပြည့်အောင်စားရမှာပေါ့ မ်ိန်းမရဲ့… အိမ်ထဲမှာနေ… ကလေးတွေ ဝေယျာဝစ္စ၊ ကိုယ့် ဝေယျာဝစ္စနဲ့  ကိုယ့်ဖို့ ကိုယ်လဲ ထည့်စဉ်းစားပါဦး မိန်းမရယ်”)

အိုး.. ဝေရယ်။ နင့်ခေါင်းတွေ ခါယမ်းပြီး နင့်နှုတ်ခမ်းတွေ ပြတ်လုမတတ် ဖိကိုက် နာကျင် ကြေကွဲနေရပြီနော်။ ရိုးရိုးယဉ်ယဉ်လေးနဲ့  ရှိသမျှရောင့်ရဲတင်းတိမ်ပုံရတဲ့ အမျိုးသမီးလေးကိုများ မောက်မာတယ်လို့  သူမို့ ပြောရက်ပလေ။ အဲဒါဟာ အကွက်ချလိမ်လည်မှုတခုပေါ့။

“ပြန်ရအောင်ခိုင်…ငါဆက်မကြားနိုင်တော့ဖူး”

“ခဏဝေ…ဒါက စင်္ကာပူမှာကျောင်းလျှောက်ဖို့ လျှောက်လွှာ…နင်ကစာတော်တာမို့  စကော်လာရဖို့ သေချာတယ်…အလုပ်ထွက်…ကျောင်းတက်ဖို့ အတွက်ပြင်ဆင်တော့”

“ကျေးဇူးပါခိုင်…ဒီနေ့ ကစလို့  ငါဟာနွယ်လိုလူ မဖြစ်စေရတော့ပါဘူး… ကတိပေးတယ်ဟာ”

**************************
ဆွေ

“နီးစပ်ရာကို မှီတွယ်အမြစ်တွယ်တတ်တဲ့ နွယ်ပင်လေးတွေကို ငါက ချစ်ပေမယ့် နီးစပ်ရာကို စည်းမဲ့ကမ်းမဲ့ မှီတွယ်အမြစ်တွယ်တတ်တဲ့ နွယ်နဲ့ တူတဲ့လူတွေတော့ ငါသိပ်မုန်းတယ်”

“ဘယ်လိုဆွေ…နွယ်လိုလူဟုတ်လား…တိုက်ဆိုင်လိုက်တာ သူငယ်ချင်းရယ်…ငါလဲအဲလိုတွေးမိတယ်သိလား”

“တီတီတီ”

“လာပြီခိုင်… ငါစပီကာဖွင့်ထားမယ်…နင်နားထောင်ကြည့်…နွယ်လိုလူတယောက်ကို ငါဘယ်လို ပညာပေးမလဲဆိုတာ”

“အိုး…စိတ်ဝင်စားစရာပါလားဆွေရေ…ကဲ… ဖုန်းကိုင်လိုက်ပါဦး”

“ဟယ်လို”

“ဆွေ”

“အေးပြော…ဘာကိစ္စလဲ”

“နင်နဲ့ ငါက ကိစ္စရှိမှပဲ ဆက်ရတော့မှာလားဆွေရယ်…သတိရလို့ ပါ”

ခွျှဲပျစ်ပျစ် စေးထန်းထန်းအသံကြောင့် နင့်မျက်နှာ တခုလုံး ရှုံ့မဲ့သွားတာ ငါကြိတ်ရယ်မိတယ်။

“ငါကတော့ နင့်လောက်မအားဘူးစည်သူ…အေး နင့်မိန်းမဆက်ခိုင်းတာဆိုရင်တော့ နင်နဲ့ ပြောစရာမလိုဘူး…သူ့ သာဖုန်းပေးလိုက်”

“သူမရှိပါဘူးဆွေရယ်…သူခရီးထွက်သွားတယ်…နင်အဲလို ပွင့်ပွင့်လင်းလင်း ပြောတတ်တာလေးတွေကို ငါက ခင်နေရတာ…ငါ့မိန်းမနင့်သူငယ်ချင်းဟန်နီက မြုံစိစိနဲ့ … ပြီးတော့ အနုပညာလဲမခံစားတတ်…တခါတခါ ငါစက်ရုပ်တယောက်နဲ့ အတူနေရသလိုပဲသိလား”

မြတ်စွာဘုရား။ မိန်းမခရီးသွားနေတုန်း မိန်းမအတင်းပြောပြီး မိန်းမသူငယ်ချင်းကို ဟိုလိုလို ဒီလိုလို နွယ်လိုငြိချင်သူပါလား။

“ဟဲ့…စည်သူ…နင်ချစ်လို့ ယူထားတဲ့ နင့်မိန်းမအရင်းခေါက်ခေါက်ကို နင်မို့ ဒီလိုပြောရက်တယ်…အဲလိုလူမျိုးငါက အထင်သေးတယ်သိလား…နောက်ပြီး တခါထဲ ပြောလိုက်မယ်…ငါနဲ့ နင် ဖုန်းပြောလောက်စရာ ဘာအကြောင်းမှ မရှိဘူး... နောက်တခါနင်ငါ့ကို ဘယ်တော့မှ ဖုန်းမဆက်ပါနဲ့ …ဟန်နီဖုန်းပဲ ငါကိုင်မယ်…နင့်ဖုန်းဆို ငါဘယ်တော့မှ မကိုင်ဖူး…ကိုယ့်သိက္ခာမငဲ့တောင် သူများသိက္ခာတော့ငဲ့သင့်တယ်…နင်ဟာလူလိုသိတဲ့လူဆိုရင်ပေါ့”

ဖုန်းချပြီးတော့ ဆွေပြတဲ့ အမှိုက်ပုံးထဲက နှင်းဆီအဖြူတစီးကို အတွေ့  ဇာတ်လမ်းကို ပိုရေလည်သွားတယ်။

“သူက ရာရာစစ ငါ့မွေးနေ့ ကို ပန်းစည်းပို့ တယ်တဲ့ခိုင်…ပြီးတော့ ကဒ်ပြားပေါ်မှာ ဟိုလိုဒီလို ရေးထားသေးတယ်…သူ့ နာမည်မရေးထားပေမယ့် သူလုပ်တာ ငါသိတယ်…ဒီအကြောင်းကို စကားစ အီချင်လို့ ဖုန်းခေါ်တာလေ…ပထမတော့ ကိုယ့်သူငယ်ချင်းမျက်နှာနဲ့  သည်းခံနေသေးတယ်…နောက်ပိုင်းတော့ သိပ်မဟုတ်တော့ဘူး ထင်တာ…ထင်တဲ့အတိုင်းပဲလေ…ရွံလိုက်တာခိုင်ရယ်”

“ဟုတ်တာပေါ့ဆွေရယ်… နင့်နေရာမှာ စိတ်ခပ်ပျော့ပျော့ အားနာတတ် မနူးမနပ်ကောင်မလေး တယောက်ဆို ဘာတွေဆက်ဖြစ်မလဲ”

“လာခိုင်…ခြံထဲဆင်းရအောင်”

“ဟယ်…ဆွေရယ်… ဟိုတခါက ဆောင်တော်ကူးရုံကြီး အကြီးကြီးပါ…ခုတော့ နင်အကုန်ရှင်းပစ်လိုက်တာလား”

“ဆောင်တော်ကူးပန်းတွေကို ငါကသိပ်ချစ်ပါတယ်…ဒါပေမယ့် နွယ်တွေက အထိန်းအသိမ်း မရှိတက်တော့ ဒီဘက်က သနပ်ခါးပင်လေးခမျာ အားတွေတိတ်တော့တာပေါ့… ဒါကြောင့် သူများအနှောက်အယှက်ပေးတဲ့ သူ့ နွယ်တွေကို ရှင်းပစ်လိုက်တာ…အပင်လေးတွေမှာ သူများကို အနှောက်အယှက်ဖြစ်တာကို ဥယျာဉ်မှူုးက ရှင်းပေးလို့ ရပေမယ့် အသိဥာဏ်ရှိတဲ့လူတွေမှာတော့ ကိုယ့်ကိုယ်ကို ရှင်းမှ ရမှာပေါ့ဟယ်… မဟုတ်ရင် နစ်သထက်နစ် နွယ်ကြားထဲ ရုံးမထွက်နိုင် ဘ၀ဆုံးရမှာပေါ့”

နွယ်ပင်လေးတွေချစ်တတ်ပေမယ့် နွယ်လို နီးစပ်ရာ မတွယ်ငြိတတ်တဲ့၊ စိတ်တည်ငြိမ်လေးနက်ပြီး ဂုဏ်သိက္ခာကို တန်ဖိုးထားတဲ့ ဆွေလိုလူချည်းသာ ဖြစ်လိုက်ပါတော့ ငါဆုတောင်းမိတယ်နွေ၊ဝေ နဲ့  ဆွေတို့ ရယ်။

**************************
တန်ခူး
1:14pm 14-Aug-2009

Sunday, August 9, 2009

ကျွန်မရဲ့ အိမ်နီးချင်းကလေး

ပုံကို ဒီနေရာမှ ယူပါတယ်။

သူ့ အကြောင်းရေးချင်နေတာ ကျွန်မဆီမှာ ဘလော့ဂ်တခုမရှိသေးခင် ကတည်းကပါ။ ဒီနိုင်ငံမှာ တချို့ တွေ အိမ်နီးချင်း ဒုက္ခတွေ ခံကြရတာ ကြားဖူးတာမို့  ကျွန်မကို ဘယ်တော့မှ စိတ်အနှောက်အယှက် မပေးတဲ့ ကျွန်မရဲ့ အိမ်နီးချင်းတွေကို ကျေးဇူးတင်မိပါတယ်။ ကျွန်မအိမ်ရဲ့ ဘယ်ဘက်အခြမ်းက အိမ်နီးချင်းက မလေးမိသားစုဖြစ်ပါတယ်။ မလေးမိသားစုတွေဆို မလေးတွေ တရုံးရုံး ကလေးတွေက ၀ရန်တာပေါ် ဆူဆူညံညံဆော့၊ ကာရာအိုကေတွေ အကျယ်ကြီးဆိုကြ ဒါမျိုးတွေကြားဖူးပေမယ့် ကျွန်မ အိမ်နီးချင်းတွေကတော့ အတော်ကို အနေအေးတဲ့ မလေးမိသားစုပါ။ ယောင်္ကျားက ဆောက်လုပ်ရေးဘက်မှာ လုပ်ပုံရပြီး မိန်းမကတော့ မူကြိုကျောင်းဆရာမပါ။ သားသမီး ၃ယောက်ရှိပေမယ့် အားလုံး စည်းကမ်းရှိရှိလေးတွေပါ။

ကျွန်မ ညာဘက်အခြမ်းက အိမ်နီးချင်းမိသားစုက စင်္ကာပူ တရုတ်မိသားစု ဖြစ်ပါတယ်။ အန်ကယ်ရော အန်တီပါအလုပ်လုပ်ကြပြီး အမြဲတပြုံးပြုံးနဲ့  အလွန်အေးဆေးကြပါတယ်။ သူ့ တို့ မှာ သားသမီး ၂ယောက်ပဲ ရှိပါတယ်။ တယောက်က NUS မှာ တက်နေတဲ့ ပါးချိုင့်လေးနဲ့  ခပ်ချောချော ကောင်မလေးဖြစ်ပြီး တယောက်ကတော့ အခု ကျွန်မရဲ့ ဒီပို့ စ် ဇာတ်လိုက်လေးပေါ့။ သူ့  အဲဒီအိမ်မှာ နေတယ်လို့  စ သတိထားမိတာ ကျွန်မ အမျိုးသားပါ။ လမ်းသွားရင် ကျောပိုးအိတ်ကလေးလွယ် ဒုတ်ကလေး တချောင်းနဲ့  ပေါ့ပေါ့ပါးပါး သွားတတ်တဲ့ သူ့ ကို ကျွန်မက ငယ်ငယ်ရွယ်ရွယ်နဲ့  မျက်စိမမြင်ရှာတဲ့ ကောင်လေး တယောက်အဖြစ်သာ သိထားခဲ့တာပါ။ တနေ့  ကျွန်မ အမျိုးသားက ကျွန်မတို့ အိမ်နားက ဘူတာရုံမှာ သူသီချင်းဆိုတာကို ၃ပုဒ်တိတိ နားထောင်ခဲ့ရတယ်ပြောမှ ကျွန်မလဲ အံ့သြခဲ့ရပါတယ်။ တကယ်တော့ သူက တရုတ်လို ဆိုတာပါ။ ဂီတ၀ါသနာပါတဲ့  ကျွန်မအမျိုးသားက တရုတ်လို နားမလည်ပေမယ့် နားထောင်ကောင်းလွန်းတဲ့ သူ့ အသံကြောင့် အကြာကြီးနားထောင်ပြီး ပိုက်ဆံတွေ အများကြီး လှူုခဲ့တယ်ဆိုပါတယ်။ သူက သူ့ အနုပညာနဲ့  ဖျော်ဖြေ စီးပွားရှာသူတဦးပါ။ တခါတခါ သူ့ ညီမ၀မ်းကွဲကောင်မလေးက ဘောက်စ်လေးသယ် သူတို့ မောင်နှမနှစ်ယောက် ဘူတာရုံတွေမှာ ဖျော်ဖြေဖို့  သွားတာမျိုးကို ဖြတ်ကနဲ လှမ်းတွေ့ တတ်ပေမယ့် ကျွန်မ သူ့ အသံကို တခါမှ နားမထောင်ဖူးခဲ့ပါဘူး။

အဲဒီနေ့ ကတော့ ရုံးမှာ လူပြောများတဲ့ တီဗွီအစီအစဉ်တခုကို ကျွန်မရော၊ ကျွန်မအမျိုးသားပါ ကြည့်မိကြပါတယ်။ Project Super Star Final ရွေးပွဲပါ။ တရုတ်အစီအစဉ်က အဆိုတော် ပြိုင်ပွဲပေါ့။ နောက်ဆုံး ဖိုင်နယ်တက်သွားတဲ့ ၂ယောက်ထဲမှာ တယောက်က ချစ်စရာလေယာဉ်မယ်လေးဖြစ်ပြီး နောက်တယောက်ကတော့ တခြားမဟုတ်ပါဘူး။ ကျွန်မရဲ့ အိမ်နီးချင်း မျက်မမြင်ကောင်လေးပါ။ ကျွန်မတို့  ၂ယောက်လုံး အံ့သြ၀မ်းသာဖြစ်သွားကြပြီး ဒီရှိုးကို အစက မကြည့်မိလေခဲ့ခြင်းလို့  နောင်တရမိပါတယ်။ အဲဒီနေ့ ကမှ သူ့ အဆို သူ့ အနုပညာကို ကျွန်မ ခံစားမိခဲ့ရပါတယ်။ ဘာတလုံးမှ နားမလည်ပေမယ့် သူ့ အသံနဲ့  သူ့ soul ဆွဲခေါ်ရာနောက်ကို ကျွန်မတို့  ၂ယောက်လုံး လိုက်ပါနစ်မျောသွားကြပါတယ်။ ပြီးတော့ အိမ်နီးချင်းဆိုတဲ့ သံယောဇဉ်ကလဲ မသေးဘူးမိုလား။ အဲဒီနေ့ က project super star ဘွဲ့ ကို သူမျက်ရည်တွေကြားထဲက ဆွတ်ခူးရသွားပါတယ်။ အားနည်းချက်နဲ့  သူ့ ဘ၀လေး နေ့ ချင်းညချင်း ပြောင်းလဲသွားတာကို ကျွန်မ အရမ်းဝမ်းသာသွားပြီး သူမျက်စိမမြင်တာ သိပေမယ့်လဲ အဲဒီညတွင်းချင်း စာရွက်ပေါ်မှာ မင်းရဲ့အိမ်နီးချင်းတယောက်ဖြစ်ရတာ ဂုဏ်ယူလို့ မဆုံးပါဘူးလို့  ရေးပြီး သူ့ အိမ်ရှေ့ တံခါးမှာ သွားကပ်ခဲ့ပါတယ်။

နောက်နေ့ ရုံးမှာ သူ့ အကြောင်းပဲ တပြောပြော။ ကျွန်မက ကျွန်မရဲ့အိမ်နီးချင်းပါလို့ ပြောတော့ ကျွန်မအရာရှိကအစ ကျွန်မအိမ်လိုက်လည်ချင်တယ် ချက်ချင်းဖြစ်ပါရော။ သူတို့ အိမ်လာလည်ကြရင် အိမ်ဘေးအိမ်ပဲ တကြည့်ကြည့်ပါ။ အဲဒီကစလို့  သာမာန် ဘူတာရုံက ဖျော်ဖြေသူလေးတယောက်က နေရာတိုင်းမှာ သူ့ ဓာတ်ပုံ၊ တီဗီ်ွိမှာလဲ သူ့ ပုံရိပ်တွေနဲ့  အရမ်းကို နာမည်ကြီးခဲ့ပါတယ်။ သူ project super star ဖြစ်ခါစမှာ သူ့ အိမ်ကို ကောင်မလေး ချောချော ၃ယောက်လောက် လာလာစောင့် သူသွားရာနောက် တကောက်ကောက် လိုက်တာတွေ့ ရပါတယ်။ နောက်ပိုင်းမှာ သူ့ အခွေတွေက ထိုင်ဝမ်အထိ အောင်မြင်တယ် ကြားရပါတယ်။ သူတို့ အိမ်ရဲ့ နံရံမှာ သူ့ အခွေ တခုအသစ်ထွက်တိုင်း ပိုစတာ တခုကပ်ထားတာ တွေ့ ရတာမို့  ပိုစတာ ၃ ခုဆိုတော့ အခွေ ၃ ခွေထုတ်ပြီးပြီလို့  ခန့် မှန်းရပါတယ်။ ကျွန်မတို့ ကလဲ တရုတ်သီချင်းလောကနဲ့  အလှမ်းဝေးသူမို့  သူ ဘယ်လောက် အောင်မြင်တယ်ဆိုတာ မသိပါဘူး။ သူက နာမည်ကြီး တယောက်ဖြစ်လာပြီမို့  သူ့ သွားတွေ၊ သူ့ အရေပြားတွေကို ပိုမို ချောမွေ့ ညီညာအောင် ပြုပြင်ပေးထားတာတွေ့ ရတော့ သူ့ ပုံစံလေးက ခေတ်မှီမှီလူချောလေးဖြစ်သွားပါတယ်။ ကျွန်မဒီအလုပ်ပြောင်းပြီး အတော်ကြာမှ ကျွန်မဘော့စ်က သူ့ ကို အတော်ကို ကြိုက်နှစ်သက်တာ သိခဲ့ရပါတယ်။ သူ့ အခွေအားလုံး ၀ယ်ယူထားတယ်ဆိုပဲ။

ဘ၀ကို အားငယ်အရှုံးမပေးပဲ သူ့ မှာရှိတဲ့ အရည်အချင်းနဲ့ အနုပညာကို ဇွဲမလျော့ပဲ ကြိုးစားခဲ့လို့  အောင်မြင်တဲ့ အနုပညာသမား တယောက်ဘ၀ ရခဲ့သည်မဟုတ်ပါလား။ သူက တခါတလေ အဆင်မပြေမှုတွေတွေ့ ရင် စိတ်ပျက်အားငယ်တတ်တဲ့ ကျွန်မကို အားပေးနေသလိုပါပဲ။ ကိုယ့်မှာရှိတဲ့ အရည်အချင်းကို အကျိုးရှိစွာ အသုံးချတတ်ရင် အားနည်းချက်တွေရှိနေတောင် အောင်မြင်မှုက လက်တကမ်းမှာပါ။ သူကတော့ တခြားမဟုတ်ပါဘူး။ ဒီနေ့  ကျွန်မထက် ငါးနှစ်ကြီးတဲ့ နောင်တောင် စင်္ကာပူနိုင်ငံရဲ့ အမျိုးသားနေ့  အခမ်းအနားမှာ အနုပညာဝမ်းစာ ပြည့်ဝစွာ ဖျော်ဖြေခဲ့တဲ့ အဖြူရောင် ၀တ်စုံလေးနဲ့ project super star Kelvin Tan Wei Lian ပါပဲ။ ဂုဏ်ယူပါတယ် အိမ်နီးချင်းလေးရေ။

တန်ခူး
10:14pm 9-Jul-2009

Friday, August 7, 2009

ပစ္စုပ္ပန်မှာ(အခုတလော...)…

ချစ်တဲ့ညီမလေးမေဓာဝီ နဲ့  ချစ်တဲ့ သူငယ်ချင်းသက်ဝေတို့  အတူတက်ဂ်ထားတာလေး ရေးပေးလိုက်တယ်နော်… နေမကောင်းနေလို့  နဲနဲနောက်ကျသွားတာခွင့်လွှတ်ပါ… တက်ဂ်ဖို့ သတိရတဲ့ ချစ်ညီမလေးမေနဲ့  ချစ်ဘော်ဒါသက်ဝေတို့ ကို ကျေးဇူးပါနော်…

**************
ပစ္စုပ္ပန်မှာ(အခုတလော...)…

တွေးနေမိတာက…
မြန်မြန်ပြန်နေကောင်းချင်ပြီ… သားလေးနဲ့ မြန်မြန်ပြန်ဆော့ချင်ပြီ…

ကိုယ့်ကိုယ်ကို ပြန်ဆင်ခြင်မိတာက…
ငါဆိုတဲ့ အတ္တကြီးကို ခင်တွယ်လွန်းနေတဲ့  တရားမရှိသူ…

ကျန်းမာရေး...
နေမကောင်းဖြစ်နေလို့  ဆေးခွင့်ယူ အိမ်မှာ နားနေတာလေ… ကိုယ်လေးနဲနဲငွေ့ ငွေ့ ရှိတယ်… လည်ပင်းနာတာတော့ ပျောက်သွားပြီ… ပြီးတော့ ကိုယ်လက်နာတယ်… ဆေးတွေပိပြီး ပင်ပန်းတယ်… ဒီနေ့ တော့ တော်တော်ပေါ့လာပြီ… ဒါကြောင့်ဒီပေါ်ရောက်နေတာပေါ့…

ဖတ်ဖြစ်တဲ့ စာအုပ်တွေက…
တအုပ်ထဲပါ…ဦးဝင်းငြိမ်းရဲ့ ရွှေ၆၃

ရောက်ဖြစ်နေတာက…
နေမကောင်းတော့ အိမ်မှာပဲပေါ့…

ရေးဖြစ်နေတာက…
ခုတက်ဂ်ဂိမ်းလေ…

နားထောင်ဖြစ်နေတာက…
ထုံးစံအတိုင်း နေမကောင်းရင် တရားဖက်တယ်… ဟိဟိ… ဆရာတော်ဦးဇောတိက တရားတွေပါ…

ရွတ်နေမိတဲ့ ကဗျာက…
ကဗျာမရွတ်ဖြစ်ပါဘူး… ပြောပြီးပါရော… နေမကောင်းတော့ ပရိတ်ရွတ်တယ်…ပဌန်းရွတ်တယ်… အထင်သိပ်မကြီးနဲ့ နော်… နေမကောင်းတဲ့အချိန်မို့ …
နေကောင်းသွားရင်… အမှတ်မရှိတဲ့ ကိုယ်က ဒီလို ကဗျာမျိုးရွတ်ချင်ရွတ်နေမှာ…

မောင်…
နှောင်တွယ်ရစ်ငင်
သံယောဇဉ်ကို
မအိုမပြောင်း
ဘ၀ဟောင်းထိ
ငြိစွဲမြဲခိုင်
ပိုင်ချင်တယ်…။

ဖြစ်ချင်နေတာက…
အပူအပင်ကင်းကင်းနဲ့  ကိုယ့်တိုင်းကိုယ့်ပြည်မှာ volunteer အလုပ်တွေ လုပ်ချင်တယ်…

စားဖြစ်နေတတ်တာက…
ဆန်ပြုတ်…ကြက်သားစွတ်ပြုတ်…ပန်းသီး…သင်္ဘောသီး…(မစားချင်သော်လည်း…)

သနားနေမိတာက…
ကိုယ်ကမှန်နေပါလျက် မျက်စိနားအတင်းအဓမ္မ မတရားအပိတ်ခံထားရသူတွေ

လွမ်းနေမိတာက…
မြန်မာပြည်က ကိုယ့်မိသားစုလေးပေါ့… သားလေးပြောသလို ပြောရရင် အဲဒီအိမ်ကလေး ဒီရွှေ့ ထားချင်တယ်… ဒါပေမယ့်… မဖြစ်သေးပါဘူး… ကိုယ်လွမ်းတဲ့အထဲ မြန်မာပြည်ကြီးလဲ ပါသကိုး….

မေ့လျော့ပစ်နေမိတာက…
ဇရာ…ဟိဟိ… ငယ်ငယ်လေးရှိသေးတာလေ…

ခါးသက်နေမိတာက…
ကိုယ်ချင်းစာတရားကင်းသူတွေ…

တမ်းတနေမိတာက…
RITကျောင်းသူဘ၀လေးပေါ့… ပျော်စရာတွေ တပုံကြီး ရခဲ့တဲ့နေရာ…

ကြိတ်ပြီးချီးကျူးနေမိတာက…
သူများတွေလိုပါပဲ… ပေါ်တင်ပဲ ချီးကျူးမိပါတယ်… ကိုယ်ကျိုးစွန့် အနစ်နာခံတတ်သူတွေ…

ကြိတ်ပြီးအထင်သေးနေမိတာက…
အပေါ်ကလိုပဲ… ပေါ်တင်ပဲ အထင်သေးမိတယ်လေ… မိမိကောင်းစားဖို့  တခြားသူတွေကို ချနင်းဖို့  ၀န်မလေးသူတွေ…

ဆန္ဒမရှိတဲ့နေရာ…
ကိုယ့်တိုင်းပြည်နဲ့ ဝေးရာ… (ကိုပေါလေသံနဲ့ ပြောရရင်…ဟဲ့တန်ခူး… ရှင့်ဘယ်သူက သွားခိုင်းသလဲ)

ဆန္ဒရှိနေတဲ့ကိစ္စ…
တရားရက်ရှည်စခန်းဝင်ချင်တယ်… ပြီးတော့ ကိုယ့်တိုင်းကိုယ့်ပြည် အပြီးပြန်နိုင်တဲ့ အခြေအနေတခုကို ရောက်ချင်တယ်…

မုန်းတီးနေမိတာက…
ကောက်ကျစ်စဉ်းလဲမှု…

ချစ်နေတာက…
သားကလေးလေ… အချစ်ဆုံးပါပဲ…

စိတ်ပျက်နေမိတာက…
တချို့ ကိစ္စတွေမှာ အဆုံးစွန်တွေး သွေးကြောင်လွန်းတဲ့ ကိုယ့်အကျင့်…

စွဲလမ်းနေမိတာက…
တိုင်လုံးကြီးတွေနဲ့  အမြဲတည်ငြိမ်ခံ့ညားနေတဲ့ စက်မှုတက္ကသိုလ်… ပြီးတော့ စွယ်တော်ပန်းတွေ…

လိုအပ်နေတာက…
ဟက်ဟက်ပက်ပက် ရယ်မောခြင်း… အဲဒီလို မရယ်ရတာကြာပေါ့…

တောင်းနေမိတဲ့ဆု…
စိတ်သွားတိုင်းကိုယ်ပါနိုင်ကြပါစေ… ရောဂါဆိုး ဘေးဆိုး ကပ်ဆိုး ရန်သူမျိုးငါးပါးမှ ကင်းဝေးနိုင်ကြပါစေ…

ထပ်ပြန်တလဲလဲအော်ဟစ်နေမိတာက
ကိုယ်ချင်းစာတရားရှိကြပါ…

ဝန်ခံချင်တာက
အတ္တကြီးသူတယောက်… သတ္တိကြောင်သူတယောက်…

**************
အတော်များများလဲ ရေးပြီး တက်ဂ်ပြီး ကုန်ကြပြီဆိုတော့ ချစ်သောညီမလေး ၃ယောက်ကို တက်ဂ်လိုက်ပါတယ်… သူများတွေ တက်ဂ်ပြီးပြီလားတော့ မသိ။ ချစ်ရင် ရေးပေးနော်။
၁) ညီမလေး အိမ့်ချမ်းမြေ့
၂) ညီမလေးခွန်မြလှိုင်
၃) ညီမလေးပုံရိပ်

တန်ခူး
3:49pm 7-Aug-2009

Tuesday, August 4, 2009

မြှောင်မြှောင်တို့ မိသားစု


ပုံကို ဒီနေရာမှ ယူပါသည်။
ရုံးမှာလဲ အလုပ်အတော်များ၊ အိမ်မှာလဲ ဧည့်ကမပြတ်၊ ဒီကြားထဲ နေမကောင်းက ဖြစ်လိုက်သေးတော့ ဘလော့လေးပစ်ထားမိတာ အတော်ကြာသွားပါတယ်။ မရေးတာ ကြာတော့ moodကလဲ ပျက်နေပါတယ်။ ဒီတော့ အာသန်ရာ သားအကြောင်းလေးနဲ့  အင်ဂျင်ပြန်နှိုးလိုက်ပါတယ်။ လာလည်သူများ အားလုံးကျေးဇူးပါ။

****************

ကျွန်မနဲ့ ကျွန်မမောင်လေး ၅နှစ်ကွာတာမို့  မောင်လေးမမွေးခင် အိမ်မှာ တယောက်ထဲ ဆော့ကစားခဲ့ရပါတယ်။ အဲဒီအခါ အမေစိုက်ထားတဲ့ ပန်းပင်လေးတွေကို လူလို သဘောထား ကြိမ်လုံးတလုံးနဲ့  စာသင်တိုင်း ကစားခဲ့ပါတယ်။ စာမရဘူးဆို အပင်တွေကို ရိုက်တော့ အရွက်နုတွေ ကြွေရင် အမေ့ အဆူခံရပါတယ်။ တယောက်ထဲ နေရတဲ့အခါ အဲဒီလို သက်မဲ့ ပစ္စည်းတွေကို စိတ်ကူးနဲ့ အဖော်လုပ်တတ်တဲ့ အကျင့်ရခဲ့တာပါ။

သားလေးကျတော့ ကျွန်မတို့ ငယ်ကလို အိမ်ဘေးက အဖော်တွေလဲ မရှိ။ ဒီတော့ သူက သူ့ ခွခေါင်းလေးကို သူ့ ညီလေးလို့  စိတ်ကူးယဉ် အဖော်လုပ်ပါတယ်။ သူ့ အဖေကလဲ သူနဲ့ ဆင်တူရိုးမှား နာမည်လေး တခုတောင် ပေးထားလိုက်သေး။ ဟိုတလောက သမီးလေး တယောက်ထဲ ရှိတဲ့ ကျွန်မသူငယ်ချင်းနဲ့  ခရီးအတူသွားတော့ သူ့ သမီးလေးမှာလဲ စိတ်ကူးဖော်လေးရှိသတဲ့လေ။ နာမည်က ဂျေဆင်တဲ့။ သူ့ မောင်လေးဆိုပဲ။ သားက သူ့ ညီလေး အကြောင်းပြော သူကလေး သူ့ မောင်လေးအကြောင်းပြောနဲ့  သူတို့ ကို ကြည့်ပြီး ကျွန်မအတော် စိတ်မကောင်းဖြစ်ရပါတယ်။ ကျွန်မသူငယ်ချင်းဆို သူ့ သမီးရဲ့ စိတ်ကူးဖော်လေး အကြောင်းသိပြီး စိတ်ပူလို့  အင်တာနက်ပေါ်မှာ တဦးတည်းသောကလေးတွေ အဲဒီလို ဖြစ်တတ်တာ ပုံမှန်လားဆိုတာ လိုက်ဖတ်ကြည့်ရတယ်တဲ့။ ဖြစ်တတ်တဲ့ သဘာဝတရားဆိုမှ စိတ်မပူပဲ သူ့ တို့ စိတ်ကူးဖော်လေးကို ကိုယ်ပါ အသိအမှတ်ပြုရပါတယ်။

သားက အခုစ်ိတ်ကူးဖော်က တဆင့်တက်လို့  တကယ်ရှိတဲ့ အဖော်လေးတွေ ရနေပါတယ်။ တခြားမဟုတ်ပါဘူး။ ကျွန်မတို့  အိမ်က အိမ်မြှောင်လေးတွေပါ။ ကျွန်မတို့  အိမ်မှာ အိမ်မြှောင်ကြီးကြီး ၂ကောင်နဲ့  အိမ်မြှောင်သေးသေးလေး ၂ ကောင်ရှိပါတယ်။ အဲဒါဆွေမျိုးတွေ စပ်ပြီး သူတို့ ကို မိသားစုကလေးအဖြစ် သားကို ပြောပြတော့ သားက သိပ်စိတ်ဝင်စားပါတယ်။ အိမ်မြှောင်ဖေဖေ၊ မေမေ နဲ့  ညီအကို ၂ ယောက်ပေါ့။ သူတို့ ကို များသောအားဖြင့် ကျွန်မတို့  ရေချိုးခန်းထဲမှာ တွေ့ ရတော့ သားက သူတို့ အိမ်က ရေချိုးခန်းထဲမှာလို့  မှတ်ထားပါတယ်။ သားအတွက် အဖော်သဘောမျိုးနဲ့  အိမ်မြှောင်မိသားစုကို ကျွန်မနဲ့  သူ့ အဖေ နာမည်လေးတွေ ပေးထားကြတယ်။ အိမ်မြှောင်ဖေဖေနာမည်ကလဲ သားဖေဖေနာမည်နဲ့  ခပ်ဆင်ဆင်။ ဥပမာ… သားဖေဖေ နာမည်က ဦးအောင်XXXXXX ဆို အိမ်မြှောင်ဖေဖေနာမည်က ဦးမြှောင်XXXXXX ပါ။ အိမ်မြှောင် ညီအကို ၂ယောက်က မြှောင်မြှောင်နဲ့ ကောင်ကောင်တဲ့။ သားက အဲဒီနာမည်လေးတွေ သိပ်သဘောကျတာ။

မြှောင်မြှောင်နဲ့ ကောင်ကောင်ကို သားက သူ့ အဖော်တွေလို သဘောထားပါတယ်။ သူအရုပ်အသစ်ဝယ်လာလဲ ကြွားတတ်ပါသေးတယ်။ တခါတခါ သူ့ ပြိုင်ဘက်တွေ ပေါ့။ မနက်မိုးလင်း အိပ်ရာထ ပျင်းရင် ကျွန်မက ဟယ် မြှောင်မြှောင်က ပထမ အိပ်ရာအရင်ထနေပြီလို့  ပြောလိုက် သားက မခံချင်ဖြစ်ပြီး အိပ်ရာက အသဲအသန် ထတော့တာပါပဲ။ သူက အမြဲပထမရချင်သူကို။ ကျွန်မက အသံတုလုပ်ပြီး အိမ်မြှောင်လေးတွေ အနေနဲ့  စကားပြောရင် သားက စကားအပြန်အလှန်ပြောတတ်ပါတယ်။ တခါတခါ ကျွန်မ အလုပ်ရှုပ်နေရင် သူ့ ဘာသာတောင် အသံတုလုပ်ပြီး အိမ်မြှောင်ဖြစ်လိုက် လူဖြစ်လိုက် စကားအပြန်အလှန်ပြောရော။ အိမ်မြှောင်အငယ်ကောင်လေးကို သူက အရုပ်တွေ ဘာတွေ ၀ယ်ပေးမယ်တောင် ချော့တတ်သေးတယ်။ အိမ်မြှောင်လေးတွေ ဆိုးလို့ ဆို သူ့ အဖေနဲ့ တောင် သွားတိုင်တတ်ပါတယ်။ တကယ်တော့ သားက အိမ်မြှောင်တွေ တကယ် စကားမပြောတတ်တာလဲ သူသိပါတယ်။ ဒါပေမယ့် သူ့ မှာ အိမ်မြှောင်မိသားစု အဖော်ရှိနေတာကို ကစားနည်းတခုအနေနဲ့  ပျော်နေတာပါ။

သားနဲနဲ အရွယ်ရလာရင် တိရိစ္ဆာန်လေးတွေ ချစ်တတ်တဲ့ သူ့ အတွက် petလေး မွေးပေးမယ်လို့  စိတ်ကူးထားပါတယ်။ အရင်က သားက အဖော်တယောက် အိမ်လာလည်ရင် ပြန်တဲ့အခါ ငိုနေတတ်လို့  ကျွန်မ အတော်စိတ်မကောင်းဖြစ်ရပါတယ်။ ခုတော့ သားက နဲနဲနားလည်လာပါပြီ။ သူ့ တို့ အိမ်သူတို့ ပြန်ရမယ်ဆိုတာ သဘောပေါက်လာပါပြီ။ ဆော့လိုက်တယ်… ပြန်တော့လဲ နှုတ်ဆက်လိုက်တာပါပဲ။ ခုတလော ကျွန်မ အိမ်မှာ ဧည့်သည်တွေ အတော်များတော့ သားက ပျော်နေပါတယ်။ တယောက်ပြန်သွားရင် သူက They are not Singapore people လို့  ပြောတတ်ပါတယ်။ သဘောက ဧည့်သည်တွေပေါ့။ မြန်မာပြည်က သူ့ အမျိုး ၀မ်းကွဲမောင်နှမ နာမည်တွေ သူက အမြဲမှတ်မိတတ်ပါတယ်။ သူ့ အကျီင်္လေးငယ်သွားရင် သူ့ ညီဝမ်းကွဲလေးကို ပေးမယ်လို့  ပြောတတ်ပါတယ်။ သူ့ ကစားဖော်က အမြဲတမ်း ၂ ယောက်ပါပဲ။ ကျွန်မနဲ့  သူ့ အဖေလေ။ အသက်အရွယ်ကြောင့် သားအတွက် မောင်နှမဖော် မွေးဖို့  သတ္တိမရှိတဲ့ ကိုယ့်ကိုယ်ကို အမြဲ အားမရဖြစ်မိပြီး တာဝန်တခု လစ်ဟင်းနေသလို ခံစားရပါတယ်။ ဘာပဲဖြစ်ဖြစ် သားက သူ့ ဘ၀လေးကို ပျော်အောင်နေတတ်တော့ ကျွန်မ နဲနဲစိတ်ချမ်းသာရသလို သားလေးကိုလဲ အရမ်း ကျေးဇူးတင်မိပါတယ်။

တန်ခူး
9:07 pm 4-Aug-2009

Friday, July 17, 2009

နံပါတ်တစ်

ပြီးခဲ့တဲ့ 2009 Wimbledon ပွဲမှာ ကျွန်မရဲ့ အကြိုက်ဆုံး အားကစားသမား Roger Federer ပြန်အနိုင်ရသွားတာ တွေ့ ရတော့ မျက်ရည်ဝဲမိတဲ့အထိ ကြည်နူးမိခဲ့ရသည်။ အခုဆို သူက world ranking မှာ အမှတ်အများဆုံးနဲ့  နံပါတ်တစ်နေရာကို ပြန်ရောက်သွားပြီ။ မနှစ်က တနှစ်လုံး သူ့ ခမျာ ယခင် နံပါတ်တစ်နေရာကို ပြန်ရဖို့  နံပါတ်တစ်pressureကို အတော်ခံလိုက်ရသည်။ မနှစ်က Wimbledonမှာ သူငိုတာတွေ့ ရတော့ ကျွန်မအတော် စိတ်မကောင်းဖြစ်ခဲ့မိသည်။ ဒီနှစ်ကတော့ သူ့ နေရာကို သူပြန်ရောက်သွားပြီ။ အားကစားဘက်မှာ နံပါတ်တစ်နေရာကို ကြိုးစားပန်းစား အရယူပေမယ့် တကယ့်လက်တွေ့ ဘ၀မှာတော့ သူ့ ပုံစံလေးနဲ့  လိုက်ဖက်စွာ ငြိမ်းချမ်းပုံရသည်။ Wimbledonမှာ ကိုယ်ဝန်နဲ့ လာအားပေးတဲ့ သူ့ ဇနီးကို တွေ့ တော့ သူတို့ မိသားစုလေးကို ပုံဖော်ကြည်နူးမိသည်။ ဒါနဲ့ ဆက်စပ်ပြီး ငယ်ငယ်က ကျောင်းမှာ အဆင့်လုပွဲ၊ RITက Rollလုပွဲတွေကို သွားသတိရမိသည်။

နံပါတ်တစ်ဆိုသည့် နေရာတခုမှာ ဂုဏ်ယူစရာကောင်းသလ်ို မကျဆုံးအောင် ထိန်းသိမ်းရသည်မှာ အတော်ပင်ပန်းသည်။ ကျွန်မကတော့ နံပါတ်တစ် နေရာရအောင် မတော်လှသည်မို့  အဲဒီစိတ်ဖိစီးမှုလဲ မရခဲ့ပါ။ ကျွန်မတို့  အလယ်တန်းနှင့် အထက်တန်းမှာ အဆင့်တစ်ကို အမြဲကန်ထရိုက်ဆွဲထားသည့် ကျွန်မသူငယ်ချင်း တရုတ်မလေးခင်ပြုံးရီ ကိုပဲ ကျေးဇူးတင်ရမည်လား။ ဘယ်လောက်ကြိုးစား ကြိုးစား အချိန်တန်လျှင် သူက တစ်။ ပြိုင်လို့ မရတဲ့ အဆုံး နှစ်၊သုံး၊လေး၊ငါး နှင့်သာ ကျေနပ်ခဲ့ရသည်။ သူကတော့ နဂိုပါရမီလဲပါမည် ဇွဲကလဲကောင်း ဥာဏ်ကလဲကောင်း နောက်ပြီးသူ့ ပြိုင်ဘက် ကျွန်မတို့ ကလဲ လိုက်မမှီဆိုတော့ သူ့ မှာ အဆင့်တစ် pressureသိပ်မတွေ့ ခဲ့ရ။

RITရောက်တော့ Rollလုပွဲတွေက နဲနဲ ပွဲကြမ်းလာသည်။ Roll 1ရဖို့ တော်ရုံကြိုးစားမှုမျိုးနဲ့  မရနိုင်။ တချို့ ကလဲ Roll ထိပ်ပိုင်းက မဟုတ်လျှင် သိပ်အဖက် မလုပ်ချင်ကြ။ Roll 1 ကောင်မလေးက Queen ထက် နာမည်ကြီးသည်။ Roll 1 ကောင်လေးတွေဆို ကောင်မလေးတွေက အထင်ကြီးတဲ့ မျက်လုံးတွေနှင့် ကြည့်ခံရသည်။ တချို့ ဆို စာမေးသူတွေ ၀ိုင်းဝိုင်းလည်ပြီး ရက်ချိန်းတောင် မလောက်။ ဆရာတွေ ပါးစပ်ဖျားမှာလဲ ရေပန်းစားသည်။ လမ်းမှာတွေ့ ရင်တောင် အဲဒါRoll 1လို့  ၀ိုင်းကြည့်တာ ခံရသည်။ အဲဒီလို အရမ်းနာမည်ကြီးသည့် Roll 1ဘ၀မှ ဘယ်တော့မှ ပြန်ပြုတ်မကျအောင် ထိန်းသိမ်းရသည့် ပေးဆပ်မှုကတော့ ကြီးလွန်းသည်။

နောက်နှစ်Roll 1ပြန်ရဖို့  ကြိုးပမ်းရင်းနှင့် စိတ်ရောဂါရသွားသူများလဲ မနည်း။ တချို့ ဆို pressureဒဏ်မခံနိုင်ဖြစ်ပြီး ကိုယ့်ကိုယ်ကို တောင်သေကြောင်း ကြံစည်ကြတာ ကြားဖူးသည်။ တချို့ ကတော့ တက္ကသိုလ်ဘ၀ရဲ့ လွတ်လပ်ခြင်းတွေကို ပေးဆပ်ပြီး မျက်နှာဗလာနှင့်။ ရှေ့ က ဖြတ်သွားသူကိုပင် မြင်ဟန်မတူ။ တချို့ က ကိုယ်မြတ်နိုးနေတဲ့ မိန်းခလေးကိုတောင် လျစ်လျုရှု Roll1 အတွက် နှလုံးသားကို စတေးပစ်ကြသည်။ အဆောင်က ကုတင်ကို အိပ်မိမှာ ကြောက်လို့  ထောင်ထားသည့် Roll1လဲရှိသည်။

တဖက်စွန်းကျအောင် ကြိုးစားပြီးမှ Roll1 ရတာရှိသလို တချို့ က အံ့သြစရာကောင်းအောင် ပေါ့ပေါ့ပါးပါးနှင့်။ ကျွန်မတို့ ကို ကွန်ပြူတာသင်ပေးခဲ့သည့် ဆရာ(sonata-cantata ကိုဧရာ) ဆို အလွန်ငြိမ်းချမ်းသည့် Roll1။ နှစ်ငယ်သမားတွေကို စာပြလိုက် သူဝါသနာပါသည့် စာရေး၊စာဖတ်အလုပ်လုပ်လိုက်နှင့် အေးအေးချမ်းချမ်းနှင့် Roll1သူ့ နေရာကိုတော့ ဘယ်သူမှ ယူလို့ မရ။ ကျွန်မတို့ ရဲ့ နှစ်ငယ်တန်းက ညီမလေးဆို ပြုံးပြုံးလေးနဲ့  ပြီးတော့သူ့ ချစ်သူကောင်လေးလဲ အချိန်ပေးရသေးပေမယ့် အချိန်တန်တော့ သူပဲRoll1။ ကျွန်မသူငယ်ချင်းဆို ဂီတာလေးတတီးတီးနဲ့  သူ့ အတွက် Roll1က အေးအေးဆေးဆေး။ ပါရမီ ပါကြတယ် ဆိုရမလားပဲ။ ကျွန်မတို့ နှစ်က နောက်Roll1 သူငယ်ချင်းဆို စာအုပ်လေး တအုပ် လက်ထဲကိုင်ပြီး အတန်းထဲကို ခပ်ပြုံးပြုံးလေးဝင်လာတတ်သည်။ စာမေးပွဲတွင်းလဲ သူ့ ပုံစံက အဲဒီလို သွေးအေးအေးပါပဲ။ တချို့ Roll1တွေလို ကွင်းကွင်းကွက်ကွက်ကြီး ထွက်မနေပဲ သူ့ ဘာသာ သူငယ်ချင်းတွေနဲ့  အေးအေးချမ်းချမ်း တသားတည်းကျနေတတ်သူပါ။

ကျွန်မက လူတွေကို စပ်စပ်စုစု လေ့လာတတ်တဲ့ အကျင့်အတိုင်း နံပါတ်တစ်တွေ လက်တွေ့ ဘ၀ထဲ ၀င်တဲ့အခါ ဘယ်လိုဘ၀တွေများ ရွေးချယ်ကြပါလိမ့်လို့  ဆက်နားစွင့်မိသည်။ အပေါ်က ပြောသလို Roll1 ကို သိပ်ပူပူလောင်လောင် မဟုတ်ပဲ စိတ်အေးအေးချမ်းချမ်းနဲ့  အရယူခဲ့သူတွေက ဘ၀ထဲထိ ငြိမ်းချမ်းနေကြတာတွေ့ ရသည်။ အကောင်းဆုံး ဥပမာပြရရင် ကျွန်မတို့  မမသီတာရဲ့ ခင်ပွန်းကိုဧရာပါ။ သူတို့ မိသားစုလေးတွေ့ ရင် ငြိမ်းချမ်းမှုက ကိုယ့်ဆီပါကူးစက်လာတတ်ပါသည်။ ကျွန်မတို့ နှစ်ငယ်တန်းက ညီမလေးဆိုလဲ ချစ်စရာ သမီးလေးနဲ့  ချစ်စရာမိသားစုလေးနဲ့  အေးချမ်းလို့ ။ ကျောင်းတုန်းက အလှမပြင် ဂီတာတဒေါင်ဒေါင်နဲ့  ယောင်္ကျားလေးတယောက်နဲ့ တူတဲ့ သူငယ်ချင်းကတော့ အလုပ်ခွင်မှာလဲ အောင်မြင်သလို မိသားစုမှာလဲ အောင်မြင်တဲ့ ဇနီးမယား မိခင်ကောင်းတယောက်ဖြစ်လို့ ။ နောက်သူငယ်ချင်းတယောက်ကတော့ တိုးတက်တဲ့ နိုင်ငံရဲ့ တက္ကသိုလ်တခုမှာ ငယ်ငယ်လေးနဲ့  ပါမောက္ခကြီးဖြစ်ပြီး လူပျိုကြီးဘ၀နဲ့  ပြုံးပြုံး ပြုံးပြုံး။

ကျောင်းတုန်းက ငါRoll1 ဆိုပြီး တော်ရုံလူက သူနဲ့ စကားပြောရင် ဥာဏ်မမှီထင်နေကြသူတွေက ဘ၀ထဲမှာလဲ အဲဒီလို ပူပူလောင်လောင်။ ခုထိ ငါRoll1 ဆိုတဲ့ မာနကြီးကို ပင်ပင်ပန်းပန်း သယ်ဆောင်သွားကြတုန်း။ အိမ်ထောင်ဘက်တောင် အချစ်ဆိုတာထက် သူနဲ့ တန်မယ့် အရည်အချင်းတွေ ပြည့်လျှံနေတဲ့ သူမျိုးကို ရွေးချယ်တဲ့သူလဲရှိရဲ့။ တချို့ ကတော့ ငါ့လို Roll1ရဲ့ စံတွေအတွေးအခေါ်တွေကို လိုက်မမှီဆို ချစ်လို့ ယူထားတဲ့ ဇနီးမယားကို ပြန်လှည့်မကြည့်သူလဲရှိရဲ့။ သူတို့ ဘ၀တွေ တကယ်ရော ပျော်ရွှင်နိုင်ကြပါသလား။

ဘာရယ်မဟုတ်ပါဘူး။ ဘ၀ဆိုတာ နေတတ်ရင် ကျေနပ်စရာမို့  တကယ့်ဘ၀ထဲရောက်ရင် နံပါတ်တစ်ဆိုတဲ့ နေရာကိုလဲ သူ့ နေရာနဲ့ သူ ထားတတ်၊ ခံယူတတ်ရင် အတော်ငြိမ်းချမ်းမှာပဲလို့  တွေးမိလို့  ဘ၀ထဲမရောက်သေးတဲ့ နံပါတ်တစ်လေးတွေအတွက် ရည်ရွယ်ပြီး ဒီပို့ စ်ကိုရေးလိုက်တာပါ။

တန်ခူး
11:40am 17-Jul-2009